മുല്ലപ്പെരിയാർ കേസിൽ സ്പെഷ്യൽ കൗൺസിലിനെ നിയമിച്ച് കേരളം

മുല്ലപ്പെരിയാർ ഉൾപ്പെടെയുള്ള അന്തർസംസ്ഥാന നദീജല തർക്ക കേസുകൾക്കായി കേരളം പ്രമുഖ അഭിഭാഷകൻ റോയ് എബ്രഹാമിനെ പുതിയ സ്പെഷ്യൽ കൗൺസിലായി നിയമിച്ചു.

ഇനി സുപ്രീംകോടതിയിലും വിവിധ ട്രിബ്യൂണലുകളിലും കേരളവുമായി ബന്ധപ്പെട്ട അന്തർസംസ്ഥാന നദീജല തർക്ക കേസുകളിൽ റോയ് എബ്രഹാം സീനിയർ അഭിഭാഷകൻ മോഹൻ കതാർക്കിക്കൊപ്പം സംസ്ഥാനത്തിനായി ഹാജരാകും. സർക്കാർ ഉത്തരവിലാണ് ഇക്കാര്യം വ്യക്തമാക്കുന്നത്.

അഭിഭാഷകൻ ജി.പ്രകാശിനെ മാറ്റി നിയമനം

എറണാകുളം ജില്ലയിലെ കൂത്താട്ടുകുളം സ്വദേശിയായ റോയ് എബ്രഹാം 1992 മുതൽ സുപ്രീംകോടതിയിൽ പ്രാക്ടീസ് ചെയ്തുവരികയാണ്.
രണ്ടാം പിണറായി വിജയൻ സർക്കാരിന്റെ കാലത്ത് മുല്ലപ്പെരിയാർ ഉൾപ്പെടെയുള്ള അന്തർസംസ്ഥാന നദീജല തർക്ക കേസുകളിൽ ഹാജരാകാൻ സംസ്ഥാനത്തിന്റെ മുൻ സ്റ്റാൻഡിങ് കൗൺസിൽ കൂടിയായിരുന്ന അഭിഭാഷകൻ ജി. പ്രകാശിനെയാണ് നിയമിച്ചിരുന്നത്.

അതേ സമയം റോയ് എബ്രഹാമിനെ നിയമിച്ചുള്ള പുതിയ ഉത്തരവിൽ ജി. പ്രകാശിനെ സ്ഥാനത്തുനിന്ന് മാറ്റിയതായി വ്യക്തമാക്കിയിട്ടില്ല. എന്നാൽ പുതിയ നിയമനം പകരം നിയമനമായാണ് സൂചന.

English Summary : The Government of Kerala has appointed senior Supreme Court advocate Roy Abraham as its new Special Counsel to represent the state in critical inter-state water dispute cases, including the ongoing Mullaperiyar dam litigation.