പ്രൊഫ. ശോഭീന്ദ്രൻ പ്രകൃതിസംരക്ഷണം ജീവിതദൗത്യമായി ഏറ്റെടുത്ത പച്ചമനുഷ്യൻ: ആലങ്കോട് ലീലാകൃഷ്ണൻ

മണ്ണിനെയും മനുഷ്യനെയും സമസ്ത ജീവജാലങ്ങളെയും ഒരുപോലെ സ്നേഹിച്ച് പ്രകൃതിസംരക്ഷണം ജീവിതദൗത്യമായി ഏറ്റെടുത്ത നിഷ്കാമകർമ്മിയായിരുന്നു പ്രൊഫ. ശോഭീന്ദ്രനെന്ന് പ്രശസ്ത എഴുത്തുകാരൻ ആലങ്കോട് ലീലാകൃഷ്ണൻ. വിദ്യാർത്ഥികളാൽ രൂപപ്പെടുത്തപ്പെട്ട അധ്യാപകനായിരുന്നു ശോഭീന്ദ്രൻ മാഷെന്നും വിദ്യാർത്ഥികളിൽനിന്ന് ആർജിച്ച ജീവിതബോധവും മാനവികതയുമാണ് അദ്ദേഹത്തിന്റെ ജീവിതത്തിനും പ്രവർത്തനങ്ങൾക്കും കരുത്തുപകർന്നതെന്നും അദ്ദേഹം പറഞ്ഞു.

പ്രമുഖ പരിസ്ഥിതി പ്രവർത്തകനും അധ്യാപകനുമായിരുന്ന പ്രൊഫ. ശോഭീന്ദ്രന്റെ മൂന്നാം ചരമവാർഷികത്തോടനുബന്ധിച്ച് പ്രൊഫ. ശോഭീന്ദ്രൻ ഗ്രീൻ ട്രസ്റ്റ് കോഴിക്കോട് അളകാപുരി ജൂബിലി ഹാളിൽ സംഘടിപ്പിച്ച സ്മൃതിസംഗമം ഉദ്ഘാടനം ചെയ്യുകയായിരുന്നു അദ്ദേഹം.

ഹരിത പുരസ്കാരം സമ്മാനിച്ചു

കോഴിക്കോട് കോർപ്പറേഷൻ മേയർ ഒ. സദാശിവൻ ചടങ്ങിൽ അധ്യക്ഷത വഹിച്ചു. ട്രസ്റ്റ് ഏർപ്പെടുത്തിയ ഈ വർഷത്തെ ഹരിത പുരസ്കാരം മലാപ്പറമ്പ് ദേശോദ്ധാരിണി വായനശാലയ്ക്ക് ആലങ്കോട് ലീലാകൃഷ്ണൻ സമ്മാനിച്ചു. വീടുകൾ കേന്ദ്രീകരിച്ച് നടപ്പാക്കിയ ‘ഹരിതഭവനം’ പദ്ധതിയിലൂടെ മാലിന്യസംസ്കരണത്തിലും പരിസ്ഥിതി സംരക്ഷണത്തിലും നടത്തിയ മാതൃകാപരമായ ഇടപെടലുകളെ മാനിച്ചാണ് പുരസ്കാരം നൽകിയത്.

നടനും സംവിധായകനുമായ ജോയ് മാത്യു, കവി പി. കെ. ഗോപി, പ്രൊഫ. സി. വാസുദേവൻ ഉണ്ണി, നടൻ വിനോദ് കോവൂർ എന്നിവർ അനുസ്മരണ പ്രഭാഷണങ്ങൾ നടത്തി.

ബാബു പറമ്പത്ത്, സനീഷ് കുമാർ ചിറക്കൽ, ഗോപിനാഥൻ, ഡോ. ശ്രീശൈലം ഉണ്ണികൃഷ്ണൻ, ടി. കെ. കിഷോർ കുമാർ, ഡോ. ടി. രാമചന്ദ്രൻ, പി. പി. മോഹനൻ, പി. രാധിക, പി. ശോഭീന്ദ്രൻ, ഷൗക്കത്ത് അലി എരോത്ത് തുടങ്ങിയവർ പങ്കെടുത്തു. ഡോ. ദീപേഷ് കരിമ്പുങ്കര സ്വാഗതവും എ. പി. സത്യൻ നന്ദിയും പറഞ്ഞു.

English Summary : Renowned Malayalam writer Alankode Leelakrishnan paid rich tributes to the late environmentalist and educator Prof. Shobheendran on his 3rd death anniversary. Speaking at a memorial event (Smriti Sangamam) organized by the Prof. Shobheendran Green Trust at Alakapuri Jubilee Hall, Kozhikode, Leelakrishnan described him as a selfless activist who dedicated his life to protecting nature, soil, and all living beings. He highlighted that Prof.