ശ്രീലങ്കയില്‍ ഇന്ത്യയുടെ സാഗര്‍ ബന്ധു; എത്തിച്ചത് 53 ടണ്‍ ദുരിതാശ്വാസ വസ്തുക്കളും സേനയെയും

ശ്രീലങ്കയിലെ പ്രളയവുമായി ബന്ധപ്പെട്ട് ഇന്ത്യയുടെ സാഗര്‍ ബന്ധു ദുരിതാശ്വാസ ഓപറേഷനില്‍ നാടണഞ്ഞത് 2000 ത്തോളം ഇന്ത്യക്കാര്‍. ശ്രീലങ്കയില്‍ 53 ടണ്‍ ദുരിതാശ്വാസ വസ്തുക്കളും ഇന്ത്യ വിതരണം ചെയ്തു. നവംബര്‍ 28 നാണ് സാഗര്‍ ബന്ധു പദ്ധതി പ്രകാരം ഇന്ത്യ ദുരിതാശ്വാസ സഹായം തുടങ്ങിയത്. ശ്രീലങ്ക ഇന്ത്യയുടെ അടിയന്തര സഹായം തേടിയിരുന്നു.

ഇന്ത്യന്‍ നാവിക സേനയും വ്യോമസേനയും അതിവേഗം ശ്രീലങ്കയിലെത്തിയിരുന്നു. ഐ.എന്‍.എസ് വിക്രാന്ത്, ഐ.എന്‍.എസ് ഉദയഗിരി, ഐ.എന്‍.എസ് സുകന്യ എന്നീ നാവിക സേനാ കപ്പലുകൾ ദൗത്യത്തിൽ പങ്കാളികളായി.
കൊളംബോയില്‍ രണ്ട് നാവിക സേനാ കപ്പലുകള്‍ 9.5 ടണ്‍ അടിയന്തര സഹായ വസ്തുക്കളുമായെത്തി. ടെന്റുകള്‍, ടാര്‍പോളിനുകള്‍, മരുന്നുകള്‍, ശുചീകരണ കിറ്റ്, പോര്‍ട്ടബിള്‍ മെഡിക്കല്‍ സ്‌റ്റേഷന്‍ എന്നിങ്ങനെയുള്ള വസ്തുക്കളുമായി എയര്‍ഫോഴ്‌സ് വിമാനവും എത്തി. 31.5 ടണ്‍ വസ്തുക്കളാണ് വ്യോമസേനാ വിമാനം വഴി ശ്രീലങ്കയിലെത്തിച്ചത്. അഞ്ചംഗ മെഡിക്കല്‍ സംഘവും 80 അംഗ ദേശീയ ദുരന്ത നിവാരണ സേനയും ശ്രീലങ്കയിലെത്തിയിരുന്നു. പിന്നീട് ഐ.എന്‍.എസ് സുകന്യ 12 ടണ്‍ ദുരിതാശ്വാസ വസ്തുക്കളുമായി പീന്നീ്ട് ട്രിങ്കോമാലിയിലെത്തി.

വിദേശികളും കൈകുഞ്ഞുങ്ങളുമുൾപ്പെടെ 150 പേരെ എയർലിഫ്‌റ്റ് ചെയ്തു

ശ്രീലങ്കന്‍ വ്യോമസേനയുമായി സംയുക്തമായി ഇന്ത്യന്‍ വ്യോമസേന രക്ഷാദൗത്യം നിര്‍വഹിച്ചു. ഐ.എന്‍.എസ് വിക്രാന്തില്‍ നിന്ന് ചേതക് ഹെലികോപ്ടര്‍ പറന്നുയര്‍ന്നു. വ്യോമസേനയുടെ മിഗ് 17 വിമാനങ്ങളും രക്ഷാദൗത്യത്തിലേര്‍പ്പെടുകയും 150 പേരെ വിവിധ സ്ഥലങ്ങളില്‍ നിന്ന് എയര്‍ലിഫ്റ്റ് ചെയ്യുകയും ചെയ്തു. വിദേശികളും കൈക്കുഞ്ഞുങ്ങളും ഇതില്‍ ഉള്‍പ്പെടും. ഭക്ഷണം വിതരണം ചെയ്യാനും ഇന്ത്യന്‍ വിമാനങ്ങള്‍ ഉപയോഗിച്ചു. ഒറ്റപ്പെട്ടുപോയ പ്രദേശങ്ങളില്‍ വെള്ളവും മെഡിക്കല്‍ കിറ്റുകളും വിതരണം ചെയ്തിരുന്നു.

2000 ത്തോളം ഇന്ത്യക്കാരെ തിരുവനന്തപുരത്താണ് എത്തിച്ചത്. ശ്രീലങ്കന്‍ വിദേശകാര്യ മന്ത്രി വിജിത ഹെരാത് ഇന്ത്യയുടെ അടിയന്തര സഹായത്തിന് വിദേശകാര്യ മന്ത്രി എസ് ജയ്ശങ്കറിന് നന്ദി അറിയിച്ചു. മൊറാടുവ മുന്‍സിപ്പല്‍ കൗണ്‍സില്‍ അംഗം ലിഹിനി ഫെര്‍നാഡോയും ഇന്ത്യയുടെ സഹായത്തിന് നന്ദി അറിയിച്ചു. ശ്രീലങ്കന്‍ എയര്‍ഫോഴ്‌സ്, നാവിക സേന, പൊലിസ്, ദുരന്ത നിവാരണ ഏജന്‍സികള്‍ എന്നിവയുമായി സഹകരിച്ചാണ് ഇന്ത്യ ഓപറേഷന്‍ സാഗര്‍ ബന്ധു നടപ്പാക്കിയത്.

English Summary: Indian Air Force collaborates with Sri Lankan Air Force for a vital rescue mission, airlifting 150 individuals and delivering essential supplies to remote areas.