കള്ളക്കടൽ ജാഗ്രത; മൂന്ന് ജില്ലകളിൽ കടലാക്രമണത്തിനും ശക്തമായ കാറ്റിനും സാധ്യത

കള്ളക്കടൽ പ്രതിഭാസത്തിന്റെ (Swell Waves) ഭാഗമായി സംസ്ഥാനത്തെ മൂന്ന് ജില്ലകളിലെ തീരങ്ങളിൽ കടലാക്രമണത്തിന് സാധ്യതയെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം (INCOIS) അറിയിച്ചു. തിരുവനന്തപുരം, കൊല്ലം, ആലപ്പുഴ ജില്ലകളിലെ തിരഞ്ഞെടുത്ത തീരപ്രദേശങ്ങളിലാണ് ജാഗ്രത നിർദേശം.

Kerala Weather : കേരളത്തിൽ അടുത്ത അഞ്ച് ദിവസവും മഴയ്ക്ക് സാധ്യത
സംസ്ഥാനത്ത് അടുത്ത അഞ്ച് ദിവസവും മഴ തുടരുമെന്ന് കേന്ദ്ര കാലാവസ്ഥാ വകുപ്പിന്റെ ജില്ലാതല പ്രവചനം.
https://metbeatnews.com/light-to-moderate-rain-forecasted-across-all-districts-for-next-5-days

1.6 മീറ്റർ വരെ ഉയരത്തിൽ തിരമാല

തിരുവനന്തപുരം കാപ്പിൽ മുതൽ പൊഴിയൂർ വരെ, കൊല്ലം ആലപ്പാട്ട് മുതൽ ഇടവ വരെ, ആലപ്പുഴ ചെല്ലാനം മുതൽ അഴീക്കൽ ജെട്ടി വരെ തീരങ്ങളിൽ ഇന്ന് (ഓഗസ്റ്റ് 11) രാത്രി 8.30 മുതൽ ഓഗസ്റ്റ് 12 രാത്രി 11.30 വരെ 1.1 മുതൽ 1.6 മീറ്റർ വരെ ഉയരമുള്ള തിരമാലകൾക്ക് (High Waves) സാധ്യതയുണ്ട്. ഇതിന്റെ ഭാഗമായി കടലാക്രമണത്തിനും സാധ്യതയുണ്ടെന്നാണ് മുന്നറിയിപ്പ്.

കന്യാകുമാരി തീരത്തും ജാഗ്രത

കള്ളക്കടൽ പ്രതിഭാസത്തിന്റെ ഭാഗമായി കന്യാകുമാരി തീരത്തും കടലാക്രമണ സാധ്യതയുണ്ട്. ഇന്ന് മുതൽ ഓഗസ്റ്റ് 13 രാവിലെ 5.30 വരെ 1.3 മുതൽ 1.7 മീറ്റർ വരെ ഉയരമുള്ള തിരമാലകൾക്ക് സാധ്യതയുണ്ടെന്നാണ് INCOIS മുന്നറിയിപ്പ്.

കടലാക്രമണ സാധ്യത കണക്കിലെടുത്ത് മത്സ്യത്തൊഴിലാളികളും തീരദേശവാസികളും ജാഗ്രത പാലിക്കണം. കടൽക്ഷോഭമുള്ള സമയത്ത് തീരത്തേക്ക് പോകുന്നതും കടലിൽ ഇറങ്ങുന്നതും ഒഴിവാക്കണം.

കേരള തീരത്ത് മത്സ്യബന്ധനത്തിന് തടസമില്ല

അതേസമയം, കേരളം, കർണാടകം, ലക്ഷദ്വീപ് തീരങ്ങളിൽ ഇന്ന് മത്സ്യബന്ധനത്തിന് തടസമില്ലെന്ന് കേന്ദ്ര കാലാവസ്ഥാ വകുപ്പ് അറിയിച്ചു. എന്നാൽ വിവിധ സമുദ്രമേഖലകളിൽ ശക്തമായ കാറ്റിനും മോശം കാലാവസ്ഥയ്ക്കും സാധ്യതയുള്ളതിനാൽ മുന്നറിയിപ്പുള്ള മേഖലകളിൽ മത്സ്യബന്ധനത്തിന് പോകരുതെന്ന് നിർദേശമുണ്ട്.

അറബിക്കടലിലും ശക്തമായ കാറ്റിന് സാധ്യത

ഓഗസ്റ്റ് 11, 13 മുതൽ 15 വരെ സോമാലിയ–ഒമാൻ തീരം, മധ്യ-പടിഞ്ഞാറൻ അറബിക്കടൽ, തെക്ക്-പടിഞ്ഞാറൻ അറബിക്കടൽ, വടക്കൻ അറബിക്കടൽ, മധ്യ-കിഴക്കൻ അറബിക്കടൽ എന്നിവിടങ്ങളിൽ മണിക്കൂറിൽ 45 മുതൽ 55 കിലോമീറ്റർ വരെ, ചില അവസരങ്ങളിൽ 65 കിലോമീറ്റർ വരെ വേഗതയിൽ ശക്തമായ കാറ്റിന് (Strong Winds) സാധ്യതയുണ്ട്. ഓഗസ്റ്റ് 12നും സോമാലിയ–ഒമാൻ തീരം ഉൾപ്പെടെയുള്ള അറബിക്കടൽ മേഖലകളിൽ സമാന രീതിയിൽ ശക്തമായ കാറ്റിന് സാധ്യതയുണ്ട്.

ബംഗാൾ ഉൾക്കടലിലും കാറ്റ് ശക്തമാകും

ഓഗസ്റ്റ് 11ന് തെക്ക്-പടിഞ്ഞാറൻ ബംഗാൾ ഉൾക്കടൽ, തെക്കൻ ശ്രീലങ്കൻ തീരം, കന്യാകുമാരി പ്രദേശം, മധ്യ-കിഴക്കൻ ബംഗാൾ ഉൾക്കടൽ, വടക്കൻ ബംഗാൾ ഉൾക്കടൽ എന്നിവിടങ്ങളിൽ മണിക്കൂറിൽ 45–55 കിലോമീറ്റർ വരെ, ചില അവസരങ്ങളിൽ 65 കിലോമീറ്റർ വരെ വേഗതയിൽ കാറ്റിന് സാധ്യതയുണ്ട്. ഓഗസ്റ്റ് 13 മുതൽ 15 വരെ തെക്ക്-പടിഞ്ഞാറൻ ബംഗാൾ ഉൾക്കടൽ, തെക്കൻ ശ്രീലങ്കൻ തീരം, തെക്കൻ തമിഴ്നാട് തീരം, കന്യാകുമാരി പ്രദേശം എന്നിവിടങ്ങളിലും ശക്തമായ കാറ്റ് തുടരും.

മഹാരാഷ്ട്ര തീരത്തും മുന്നറിയിപ്പ്

ഓഗസ്റ്റ് 11, 12 തീയതികളിൽ വടക്കൻ മഹാരാഷ്ട്ര തീരത്തും സമീപ സമുദ്രമേഖലകളിലും മണിക്കൂറിൽ 40–50 കിലോമീറ്റർ വരെ, ചില അവസരങ്ങളിൽ 60 കിലോമീറ്റർ വരെ വേഗതയിൽ ശക്തമായ കാറ്റിനും മോശം കാലാവസ്ഥയ്ക്കും (Bad Weather) സാധ്യതയുണ്ട്.

മുന്നറിയിപ്പ് ബാധകമായ സമുദ്രമേഖലകളിൽ നിർദേശിച്ച തീയതികളിൽ മത്സ്യബന്ധനത്തിന് പോകരുത്. മുന്നറിയിപ്പുള്ള സമുദ്രമേഖലകളുടെ കൃത്യമായ വിവരങ്ങൾക്കായി അധികൃതർ നൽകിയ ഭൂപടം പരിശോധിക്കണമെന്നും നിർദേശമുണ്ട്.

English Summary : The Indian National Centre for Ocean Information Services (INCOIS) has issued a high wave and coastal erosion warning for select coastal stretches in Kerala and Tamil Nadu due to the "Kallakkadal" (swell wave) phenomenon.