കേരളത്തിൽ മഴ തുടരും; അഞ്ച് ജില്ലകളിൽ ഇന്ന് ഒറ്റപ്പെട്ട മഴയ്ക്ക് സാധ്യത

സംസ്ഥാനത്ത് മഴ തുടരുമെന്ന് കേന്ദ്ര കാലാവസ്ഥാ വകുപ്പ്. ഇന്ന് മുതൽ 23 വരെയുള്ള അഞ്ച് ദിവസങ്ങളിലും കേരളത്തിലെ എല്ലാ ജില്ലകളിലും ചെറിയ മഴയ്ക്ക് സാധ്യത.

ഇന്ന് അഞ്ച് ജില്ലകളിൽ ഒറ്റപ്പെട്ട കനത്ത മഴയ്ക്ക് സാധ്യതയുണ്ട്. കോട്ടയം, എറണാകുളം, ഇടുക്കി, കണ്ണൂർ, കാസർഗോഡ് ജില്ലകളിലാണ് ഒറ്റപ്പെട്ട സ്ഥലങ്ങളിൽ കനത്ത മഴ ലഭിക്കാൻ സാധ്യതയെന്ന് കാലാവസ്ഥാ വകുപ്പ് മുന്നറിയിപ്പ് നൽകി. ഇവിടെ മഞ്ഞ അലർട്ട് പ്രഖ്യാപിച്ചിരിക്കുകയാണ്.

തിരുവനന്തപുരം, കൊല്ലം, പത്തനംതിട്ട, ആലപ്പുഴ, തൃശൂർ, പാലക്കാട്, മലപ്പുറം, കോഴിക്കോട്, വയനാട് ജില്ലകളിലും ഇന്ന് നേരിയതോ മിതമായതോ ആയ മഴയ്ക്ക് സാധ്യതയുണ്ട്.

Kerala Weather 19/08/26 : മധ്യ, തെക്കൻ കേരളത്തിൽ ഒറ്റപ്പെട്ട മഴ സാധ്യത
തൃശ്ശൂർ മുതൽ തിരുവനന്തപുരം വരെയുള്ള ജില്ലകളുടെ ഇടനാട് കിഴക്കൻ മേഖലകളിൽ ഇന്ന് മഴ സാധ്യത.
https://metbeatnews.com/isolated-rain-today-over-mid-kerala

ഓഗസ്റ്റ് 20 മുതൽ 23 വരെ സംസ്ഥാനത്തെ ഒരു ജില്ലയിലും പ്രത്യേക മഴ മുന്നറിയിപ്പ് ഇല്ല. അടുത്ത ദിവസങ്ങളിലും വിവിധയിടങ്ങളിൽ മഴ ലഭിക്കാം.

എവിടെയും ഓറഞ്ച്, റെഡ് അലർട്ടുകൾ നൽകിയിട്ടില്ല. എന്നിരുന്നാലും, ഒറ്റപ്പെട്ട കനത്ത മഴയ്ക്ക് സാധ്യതയുള്ളതിനാൽ താഴ്ന്ന പ്രദേശങ്ങളിലുള്ളവരും മലയോര മേഖലകളിലുള്ളവരും ജാഗ്രത പാലിക്കണം.

കേരള, ലക്ഷദ്വീപ് തീരങ്ങളിൽ ഇന്ന് കള്ളക്കടൽ സാധ്യതയെ തുടർന്ന് ദേശീയ സമുദ്ര നിരീക്ഷണ കേന്ദ്രം (Incois) റെഡ് അലർട്ട്പ്രഖ്യാപിച്ചിട്ടുണ്ട്. ഇതിൻറെ ഭാഗമായി ഇന്നലെ രാത്രി ഒമ്പതരയോടെ തീരദേശങ്ങളിൽ സംസ്ഥാന ദുരന്തനിവാരണ അതോറിറ്റി കവചം മുന്നറിയിപ്പ് നൽകി. കവചം ഹയറണുകൾ തീരദേശങ്ങളിൽ പുറപ്പെടുവിച്ചു. തീരപ്രദേശത്തുള്ളവർ ജാഗ്രത പാലിക്കണം. കന്യാകുമാരി കടലിലും തെക്കൻ തമിഴ്നാടിന്റെ ചില ഭാഗങ്ങളിലും കള്ളക്കടലിനെ തുടർന്ന് റെഡ് അലർട്ട് പ്രഖ്യാപിച്ചിട്ടുണ്ട്.

English Summary : The Central Meteorological Department has predicted continued rainfall across Kerala over the next five days. A yellow alert for isolated heavy rainfall has been issued for five districts today: Kottayam, Ernakulam, Idukki, Kannur, and Kasaragod.