നിങ്ങൾ കിണർ കുഴിക്കാൻ ഉദ്ദേശിക്കുന്നവരാണോ എങ്കിൽ ഇക്കാര്യങ്ങൾ ശ്രദ്ധിക്കുക

വേനലിന്റെ തീവ്രത അനുദിനം കൂടി വരികയാണ്. ആഗോള താപനത്തിന്റെ ഫലമായി ഭൂമി കൂടുതൽ ചൂട് പിടിക്കുകയും ഭൂമിയിൽ തങ്ങി നിൽക്കുന്ന താപം കിണർ നിർമ്മാണ പ്രവർത്തനങ്ങളെ സാരമായി ബാധിക്കുന്നു. ജോലി ചെയ്തുകൊണ്ടിരിക്കുമ്പോൾ അസാധാരണമായി കിണറിൽ അനുഭവപ്പെടുന്ന അത്യുഷ്ണം നിരവധി ശാരീരിക ബുദ്ധിമുട്ടുകൾ ഉണ്ടാക്കുന്നു.

അതുകൊണ്ടുതന്നെ ശരിയായി പരിഹാര മാർഗ്ഗങ്ങൾ സ്വീകരിച്ചുകൊണ്ട് ഈ ജോലി ചെയ്യുവാൻ ശ്രദ്ധിക്കണം. കിണർ പരമാവധി വ്യാസത്തിൽ കുഴിച്ചും മുകളിൽ ഓലക്കൊണ്ട് പന്തൽ കെട്ടിയും കിണറിലേക്ക് ഒരു ടേബിൾ ഫാൻ ഇറക്കിയിട്ടുകൊണ്ടും ജോലി ചെയ്യാം.

കിണർ കുഴിക്കുമ്പോൾ ജലത്തിന്റ സാന്നിധ്യം എങ്ങിനെ മനസിലാക്കാം?

ഭൂമിക്കടിയിൽ സംഭരിക്കപ്പെട്ടിട്ടുള്ള ഭൂഗർഭ ജലമാണ് കിണറുകളിലൂടെ നാം ശേഖരിക്കുന്നത്. മഴവെള്ളം ഭൂമിയുടെ ഉപരിതലത്തിലൂടെ അരിച്ചിറങ്ങി അന്തർ ഭാഗത്തുള്ള വിള്ളലുകൾ, പാറ കെട്ടുകളുടെ വിടവുകൾ എന്നിവയിൽ കൂടി വന്ന് രൂപപ്പെടുന്ന ജലം വർഷങ്ങളായി ശേഖരിക്കപ്പെട്ടു വരുന്നതാണ്. മഴവെള്ളത്തിന്റെ ലഭ്യത, മണ്ണിന്റെ ഘടന, ഭൂപ്രകൃതി, ഭൂവിനിയോഗം എന്നിവ ജലത്തിന്റെ യാത്രയെയും ശേഖരിക്കപ്പെടുന്നതിനെയും സ്വാധീനിക്കുന്ന ഘടകങ്ങൾ ആണ്.
ഭൂമിക്കടിയിൽ പ്രകൃത്യ ഉണ്ടാകുന്ന ജലശേഖരത്തിന്റെ സാന്നിധ്യം അറിയുവാൻ രൂപകൽപ്പന ചെയ്തിട്ടുള്ള Water Detector Machine ഉപയോഗിച്ച് വെള്ളത്തിന്റെ സ്ഥാനം നിർണ്ണയിക്കാം.

ഓരോ സ്ഥലത്തിന്റെയും പ്രത്യേകതക്കനുസരിച്ച് എത്ര ചുറ്റളവിൽ കിണർ കുഴിക്കണം?

ഉയർന്നതും താഴ്ന്നതുമായ ഭൂപ്രദേശങ്ങളിലും ചതുപ്പ് നിലങ്ങളിലും വിത്യസ്ത അനുപാതങ്ങളിലാണ് കിണറിന്റെ ചുറ്റളവ് നിർണ്ണയിക്കുന്നത്.
ഉയർന്ന ഭൂപ്രദേശത്ത് കിണർ കുഴിക്കുമ്പോൾ നിർബന്ധമായും രണ്ടു മീറ്ററിനും മൂന്ന് മീറ്ററിനും ഇടയിൽ വ്യസത്തിൽ വേണം കിണർ കുഴിക്കാൻ. പെട്ടെന്ന് വെള്ളം കാണുന്ന താഴ്ന്ന പ്രദേശമാണെങ്കിൽ ചുരുങ്ങിയത് ഒന്നര മീറ്ററിന് മുകളിലെങ്കിലും വ്യാസം കുറയാതെ കിണർ കുഴിക്കാൻ ശ്രദ്ധിക്കണം.

കിണറിന്റെ അനുപാതം എങ്ങനെ കണക്കാക്കാം?

കിണർ കുഴിക്കുന്നത് കോൽ കണക്കിൽ ആണ്. ഒരു കോൽ എന്ന് പറയുന്നത് 72 സെന്റീ മീറ്റർ ആണ്. ചുറ്റളവും താഴ്ച്ചയും കോൽ കണക്കിൽ കണക്കാക്കുന്നു.
9 കോൽ വട്ടത്തിൽ ഒരു കിണറിന്റെ ചുറ്റളവ് കണക്കാക്കുന്നത് എങ്ങനെയാണെന്ന് നോക്കാം.
9 ഗുണനം 72= 648
ഇങ്ങിനെയാണ് ഒരു കിണറിന്റെ ചുറ്റളവ് കണക്കാക്കുന്നത്. ഇനി ഇതിന്റെ വ്യാസം കാണുന്നത് കൂടി നോക്കാം
648 നെ 3.14 കൊണ്ട് ഹരിക്കുക. Ex : 648 ഹരണം 3.14= 206 cm. 9 കോലിന്റെ വ്യാസം 206 സെന്റീ മീറ്റർ ആണ്.

ഈ ഫോർമാറ്റിൽ കിണറിന്റെ ഏത് വട്ടത്തെയും നമുക്ക് എളുപ്പം കണക്കാക്കാം. സ്ഥലപരിമിതി ഉള്ളവർക്ക് കിണർ വട്ടത്തിൽ കുഴിച്ച് മുകളിൽ ബീമ് സ്ഥാപിച്ച് സ്ലാബുകൾ ഇട്ട് ഉപയോഗിക്കാവുന്നതുമാണ്.

പരമാവധി വട്ടത്തിൽ കിണർ കുഴിക്കുമ്പോൾ ലഭിക്കുന്ന പ്രയോജനം

കിണറിന്റെ വ്യാസം രണ്ടു മീറ്ററിന് മുകളിൽ കുഴിക്കുന്നത് വഴി മാക്സിമം ആഴത്തിലേക്ക് വായു തടസ്സം വലിയ പ്രശ്നമില്ലാതെ കുഴിച്ചു പോകാൻ സാധിക്കുന്നു. , കിണറിൽ വെള്ളത്തിന്റ സംഭരണ ശേഷി വർദ്ധിക്കുന്നു, കിണറിൽ കാണുന്ന കരിങ്കൽ പാറ പൊട്ടിച്ചെടുത്ത് വട്ടം കുറയാതെ താഴ്ച്ച വർദ്ധിപ്പിക്കാൻ സാധിക്കുന്നു.

English Summary: If you are planning to dig a well, keep these things in mind

Photo Courtesy: civilsocietyonline.com

വിവരങ്ങൾക്ക് കടപ്പാട് : ജെനീഷ്
കുന്നംകുളം, തൃശൂർ