മെലിസ ചുഴലിക്കാറ്റ്: ജമൈക്കയില്‍ 19 പേരും ഹെയ്തിയില്‍ 30 പേരും കൊല്ലപ്പെട്ടു

ജമൈക്കയില്‍ കനത്ത നാശം വിതച്ച മെലിസ ചുഴലിക്കാറ്റില്‍ ഇതുവരെ മരണ സംഖ്യ 19 ആയി. ഹെയ്തിയിലും 30 പേര്‍ കൊല്ലപ്പെട്ടിട്ടുണ്ട്. കാണാതായവര്‍ക്കു വേണ്ടിയുള്ള തെരച്ചിലും ദുരിതാശ്വാസ രക്ഷാ പ്രവര്‍ത്തനങ്ങളും ഇപ്പോഴും പുരോഗമിക്കുകയാണെന്ന് ജമൈക്കന്‍ വാര്‍ത്താ വിനിമയ മന്ത്രി ദന മോറിസ് ദിക്‌സണ്‍ പറഞ്ഞു.

കരീബിയന്‍ ദ്വീപ് രാഷ്ട്രമായ ജമൈക്കിയില്‍ 174 വര്‍ഷത്തിനിടെ എത്തിയ ഏറ്റവും ശക്തമായ ചുഴലിക്കാറ്റാണ് മെലിസ.

285 കി.മി വേഗതയിലാണ് മെലിസ വീശിയടിച്ചത്. ജമൈക്ക രാജ്യത്തെ പൂര്‍ണമായും ആവരണം ചെയ്താണ് ചുഴലിക്കാറ്റ് കടന്നുപോയത്. നിരവധി വീടുകളുടെ മേല്‍ക്കൂരകള്‍ പറന്നു പോയിരുന്നു. കഴിഞ്ഞ ചൊവ്വാഴ്ചയാണ് ചുഴലിക്കാറ്റ് ജമൈക്കയില്‍ കരതൊട്ടത്.

ജമൈക്കയില്‍ ഇപ്പോഴും വൈദ്യുതി വിതരണം പുനഃസ്ഥാപിക്കാനായില്ല. കുറേ ദിവസങ്ങളായി വെള്ളവും ഭക്ഷണവും കിട്ടാനില്ലാത്ത അവസ്ഥയാണ്.

തലസ്ഥാനമായ കിങ്‌സറ്റണിലെ വിമാനത്താവളത്തില്‍ മറ്റു രാജ്യങ്ങളില്‍ നിന്നുള്ള സഹായങ്ങള്‍ എത്തുന്നുണ്ട്. എയര്‍പോര്‍ട്ടില്‍ സൗകര്യമില്ലാത്തതിനാല്‍ സഹായ വസ്തുക്കള്‍ ഇവിടെ ശേഖരിക്കാന്‍ കഴിയുന്നില്ല. സൈനിക വാഹനങ്ങളിലും മറ്റുമായി സഹായ ഏജന്‍സികള്‍ ഇവ ദുരിതാശ്വാസ മേഖലയിലേക്ക് കൊണ്ടുപോകുന്നുണ്ട്.

കരിങ്കടല്‍ തീരത്തെ മധ്യ ജമൈക്കന്‍ നഗരങ്ങളിലേക്ക് ഒരു മണിക്കൂര്‍ യാത്ര ഉണ്ടായിരുന്നത് റോഡുകളിലും മറ്റും തടസ്സങ്ങളുള്ളതിനാല്‍ എട്ടു മണിക്കൂറായി കൂടി.

English Summary: Hurricane Melissa: 19 killed in Jamaica, 30 in Haiti