കണ്ണിമാങ്ങ പൊഴിച്ചിലിന് മരുന്നടിക്കാം നനയ്‌ക്കേണ്ടത് ഇങ്ങനെ

കഴിഞ്ഞ ശൈത്യകാലത്ത് നല്ല രീതിയില്‍ തണുപ്പ് കിട്ടിയതു മൂലം മാവു നന്നായി പൂവിട്ടിട്ടുണ്ട്. ഇത് മാമ്പഴ കര്‍ഷകരില്‍ പ്രതീക്ഷയ്ക്കിടയാക്കിയിട്ടുണ്ട്. കൂടാതെ മാമ്പൂ പൂക്കുമ്പോള്‍ പെയ്യുന്ന മഴയും ഇത്തവണ കുറവായതിനാല്‍ വിളവ് ഈ വര്‍ഷം കൂടുമെന്നാണ് പ്രതീക്ഷ. എന്നിരുന്നാലും ഫെബ്രുവരിയില്‍ തന്നെ ചൂട് 40 ഡിഗ്രിയിലേക്ക് എത്തുന്ന സാഹചര്യം കണ്ണിമാങ്ങ എന്ന ഉണ്ണിമാങ്ങ പൊഴിച്ചിലിന് കാരണമാകും. വേനലില്‍ കണ്ണിമാങ്ങ കൊഴിഞ്ഞു പോകാതാരിക്കാന്‍ എന്തെല്ലാം കാര്യങ്ങള്‍ ശ്രദ്ധിക്കണമെന്ന് നോക്കാം.

നന മാത്രം പോര

നന്നായി നനച്ചു കൊടുത്താലും കണ്ണിമാങ്ങ പൊഴിയുന്നു എന്നാണ് പല കര്‍ഷകരുടേയും പരാതി. മാവിന്റെ ചുവട്ടില്‍ മാത്രം നനച്ചാല്‍ പോര എന്നതാണ് ഇതിന് പ്രതിവിധി. മാവിന്റെ ചുവട്ടില്‍ നിന്ന് ശിഖിരങ്ങള്‍ നില്‍ക്കുന്ന അത്ര ദൂരം, അതായത് കൊമ്പുകള്‍ക്ക് താഴെ വരുന്ന ഭാഗത്ത് നനയ്ക്കണം.

മരുന്നു തളിയ്ക്കലും ഗുണം ചെയ്യും

നാഫ്‌തൈല്‍ അസറ്റിക് ആസിഡ് (NAA (Naphthyl Acetic Acid) 30 ഗ്രാം ഒരു ലിറ്റര്‍ വെള്ളത്തിലെന്ന തോതില്‍ ഉപയോഗിക്കാം. ഇതിന്റെ മാര്‍ക്കറ്റില്‍ ലഭ്യമായ Planofix 10 ലിറ്റര്‍ വെള്ളത്തില്‍ 2 എം.എല്‍ എന്ന തോതില്‍ ലയിപ്പിച്ച് സേ്രപ ചെയ്യുന്നതും ഗുണം ചെയ്യും. ഡോസ് കൂടിയാല്‍ മരം ഉണങ്ങിപ്പോകും. അതിനാല്‍ ഡോസ് കൂടാതെ ശ്രദ്ധിക്കണം.

മുന്‍വര്‍ഷങ്ങളില്‍ കണ്ണിമാങ്ങാ പൊട്ടിപൊഴിഞ്ഞ പ്രദേശങ്ങളിലെ മാവില്‍ ബോറിക് ആസിഡ് ( മെഡിക്കല്‍ ഷോപ്പില്‍ നിന്ന് കിട്ടുന്നത് ) 2 ഗ്രാം 1 ലിറ്റര്‍ വെള്ളത്തില്‍ എന്ന തോതില്‍ കലക്കി സ്‌പ്രേ ചെയ്യുക. കണ്ണിമാങ്ങാ പരുവമാകുമ്പോള്‍ ജൈവാംശം കുറവുള്ള മണ്ണില്‍ നന തുടങ്ങാം. മരത്തില്‍ നിന്ന് 50 cm അകലത്തില്‍ പുതയിട്ട് കൊടുക്കുന്നത് ഈര്‍പ്പം നിലനിര്‍ത്താന്‍ നല്ലതാണ്. പച്ച തുള്ളാന്‍ പോലെയുള്ള കീടങ്ങളുടെ സാന്നിധ്യമുണ്ടെങ്കില്‍ വെര്‍ട്ടിസീലിയം 40ഗ്രാം നല്‍കിയും വിളക്കു കെണികള്‍ ഉണ്ടാക്കിയും ഇവയെ നിയന്ത്രിക്കാം. നിയന്ത്രിച്ചില്ലെങ്കില്‍ ഇവ കണ്ണിമാങ്ങാ പൊഴിച്ചിലിന് ഇടയാക്കും.

English Summary - The recent cold winter and low rainfall during the flowering stage have set the stage for a high mango yield this year. However, with February temperatures hitting nearly 40°C, farmers face the risk of premature mango dropping (baby mangoes falling off).