ചൂടും ആര്‍ദ്രതയും കൂടിയ കാലാവസ്ഥ, കര്‍ഷകര്‍ എന്തൊക്കെ ശ്രദ്ധിക്കണം

ഉയര്‍ന്ന അന്തരീക്ഷ ആര്‍ദ്രതയും ഊഷ്മാവും അനുഭവപ്പെടുന്നതിനാല്‍ കര്‍ഷകര്‍ വിളകളില്‍ ശ്രദ്ധിക്കണം. ആകാശം പൊതുവെ ഭാഗികമായും ചിലയിടങ്ങളില്‍ പൂര്‍ണമായും മേഘാവൃതമോ മഴയോ ഉള്ള സാഹചര്യമാകും വരും ദിവസങ്ങളിലുണ്ടാകുക. ശക്തി കുറഞ്ഞ മഴയും ഈ കാലയളവില്‍ ലഭിക്കും.

കാര്‍ഷിക വിള ഉണക്കുമ്പോള്‍

തുറസായ സ്ഥലങ്ങളില്‍ കാര്‍ഷിക ഉല്‍പന്നങ്ങള്‍ ഉണക്കാന്‍ ബുദ്ധിമുട്ടുണ്ടാകും. മഴയിലും കാറ്റിലും നേര്‍ത്ത തണ്ടുള്ള പച്ചക്കറികള്‍ ഒടിഞ്ഞു വീഴാന്‍ സാധ്യത. ഉയര്‍ന്ന താപനിലമൂലം വെയിലത്തു ഉണക്കുന്ന വിത്തുകള്‍, റബര്‍, കശുവണ്ടി മുതലായവ നശിച്ചു പോകുകയോ ഗുണനിലവാരം കുറയുകയോ ചെയ്‌തേക്കും. ചൂടു മൂലം മണ്ണിലെ ജലാശം നഷ്ടപ്പെടുന്നതിനാല്‍ വിളകള്‍ നനച്ചു കൊടുക്കുകയും വേണം.

ശ്രദ്ധിക്കേണ്ടത്

വിത്ത്, റബര്‍, കശുവണ്ടി, മഞ്ഞള്‍, കൊപ്ര എന്നിവ ശ്രദ്ധാപൂര്‍വം വെയിലത്ത് ഉണക്കുക. വാഴ, പച്ചക്കറികള്‍, താങ്ങുകള്‍ ആവശ്യമുള്ള കിഴങ്ങു വര്‍ഗങ്ങള്‍ എന്നിവയ്ക്ക് ശക്തമായ താങ്ങു നല്‍കുക. വളം, വിത്ത്, കാലിത്തീറ്റകള്‍, എന്നിവ ഈര്‍പ്പം തട്ടാത്തതും കീടങ്ങള്‍ ഇല്ലാത്തതുമായ മുറികളില്‍ ഉയര്‍ത്തിക്കെട്ടി പലക പാകിയ പ്രതലങ്ങളില്‍ സൂക്ഷിക്കണം.

കന്നുകാലികളെ ബലക്ഷയമുള്ള തൊഴുത്തുകളില്‍ പാര്‍പ്പിക്കരുത്. മണ്ണില്‍ നിന്ന് ജലനഷ്ടം ഉണ്ടാകാതിരിക്കാന്‍ വിളകള്‍ക്ക് പുതയിടുക. വിളകള്‍ക്ക് ഈ കാലാവസ്ഥയില്‍ ഉണ്ടാകാന്‍ ഇടയുള്ള രോഗങ്ങളും പരിഹാരങ്ങളും അടുത്ത പോസ്റ്റില്‍ പരാമര്‍ശിക്കാം.

English Summary : Hot and humid weather, what should farmers pay attention to?

ഞങ്ങളുടെ കാര്‍ഷിക കാലാവസ്ഥാ വാട്‌സ്ആപ്പ് ഗ്രൂപ്പില്‍ വിവരങ്ങള്‍ക്ക് കര്‍ഷകര്‍ മാത്രം ചേരുക. Click Here