ഹിമാചലില്‍ ഇന്നും മേഘവിസ്‌ഫോടനം, ജൂണ്‍ 20 മുതല്‍ ഇതുവരെ മരിച്ചത് 386 പേര്‍

ഹിമാചല്‍പ്രദേശില്‍ 2025 ലെ മണ്‍സൂണ്‍ കാലത്തുണ്ടായ മേഘവിസ്‌ഫോടനത്തിലും മറ്റും ഇതുവരെ കൊല്ലപ്പെട്ടത് 386 പേര്‍. 4,465 കോടി രൂപയുടെ നാശനഷ്ടമുണ്ടെന്നാണ് സംസ്ഥാന ദുരന്ത നിവാരണ അതോറിറ്റിയുടെ കണക്ക്. 218 പേര്‍ മഴക്കെടുതിയിലും 168 പേര്‍ റോഡപകടങ്ങളിലുമാണ് മരിച്ചത്.

ജൂണ്‍ 20 നാണ് ഹിമാചലില്‍ ഇത്തവണ കാലവര്‍ഷമെത്തിയത്. 26,955 കോഴികളും പക്ഷികളും മഴക്കെടുതിയില്‍ ചത്തു. 451 പേര്‍ക്ക് പരുക്കേറ്റു. 1,544 വനീടുകള്‍ പൂര്‍ണമായും തകര്‍ന്നു. 41 കടകളും 38 തൊഴുത്തുകളും 66 ലയങ്ങളും തകര്‍ന്നു.

ഇന്നും ഹിമാചലില്‍ വീണ്ടും മേഘവിസ്‌ഫോടനമുണ്ടായി. നിരവധി വാഹനങ്ങള്‍ മണ്ണിനും അവശിഷ്ടങ്ങള്‍ക്കുമടിയില്‍ കുടുങ്ങി. ബിലാസ്പൂര്‍ ജില്ലയിലാണ് ശനിയാഴ്ച പുലര്‍ച്ചെ മേഘ വിസ്‌ഫോടനമുണ്ടായത്.

കൃഷിയിടങ്ങള്‍ക്ക് ഒലിച്ചുപോയി. നൈന ദേവി നിയമസഭാ മണ്ഡലത്തിലെ നാംഹോള്‍ പ്രദേശത്തെ ഗുത്രഹാന്‍ ഗ്രാമത്തിലാണ് മേഘവിസ്‌ഫോടനം. ആള്‍നാശം സംബന്ധിച്ചതായി വിവരമില്ല.

തലസ്ഥാനമായ ഷിംലയില്‍ മൂടല്‍മഞ്ഞ് ദൃശ്യപരത കുറഞ്ഞത് വാഹനങ്ങളില്‍ യാത്ര ചെയ്യുന്നവര്‍ക്ക് ബുദ്ധിമുട്ടുണ്ടാക്കി. ശനി, ഞായര്‍ ദിവസങ്ങളില്‍ സംസ്ഥാനത്തിന്റെ ഒറ്റപ്പെട്ട ഭാഗങ്ങളില്‍ കനത്ത മഴയുണ്ടാകുമെന്ന് പ്രാദേശിക കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കിയിട്ടുണ്ട്.

അട്ടാരിലേ റോഡ് (ദേശീയപാത-3), ഔട്ട്‌സൈഞ്ച് റോഡ് (എന്‍.എച്ച് 305), അമൃത്സര്‍ഭോട്ട റോഡ് (എന്‍.എച്ച.്503.എ) എന്നിവയുള്‍പ്പെടെ 503 റോഡുകളാണ് വെള്ളിയാഴ്ച വൈകുന്നേരം സംസ്ഥാനത്ത് അടച്ചത്.

സംസ്ഥാന അടിയന്തര പ്രവര്‍ത്തന കേന്ദ്രത്തിന്റെ (എസ്.ഇ.ഒ.സി) കണക്കനുസരിച്ച് അടുത്തിടെയുണ്ടായ വെള്ളപ്പൊക്കവും മണ്ണിടിച്ചിലുകളും കാരണം സംസ്ഥാനത്ത് ഏകദേശം 953 പവര്‍ ട്രാന്‍സ്‌ഫോര്‍മറുകളും 336 ജലവിതരണ പദ്ധതികളും തടസപ്പെട്ടു.