കള്ളക്കടൽ ജാഗ്രത; തിരുവനന്തപുരം, കണ്ണൂർ, കാസർഗോഡ് തീരങ്ങളിൽ മുന്നറിയിപ്പ്

കേരള തീരത്ത് കള്ളക്കടൽ പ്രതിഭാസത്തിന് സാധ്യതയുള്ളതിനാൽ മത്സ്യത്തൊഴിലാളികൾക്കും തീരദേശവാസികൾക്കും ജാഗ്രത നിർദേശം നൽകിയിരിക്കുകയാണ് അധികൃതർ. തിരുവനന്തപുരം, കണ്ണൂർ, കാസർഗോഡ് തീരങ്ങളിൽ നാളെ(സെപ്റ്റംബർ 2) വൈകുന്നേരം 5.30 വരെ ഉയർന്ന തിരമാലകൾക്കും കടലാക്രമണത്തിനും സാധ്യതയുണ്ടെന്നാണ് ദേശീയ സമുദ്ര വിവര വിശകലന കേന്ദ്രമായ (INCOIS) അറിയിച്ചിരിക്കുന്നത്.

തിരുവനന്തപുരം കാപ്പിൽ മുതൽ പൊഴിയൂർ വരെയുള്ള തീരത്തും, കണ്ണൂർ-കാസർഗോഡ് ജില്ലകളിൽ വളപട്ടണം മുതൽ ന്യൂ മാഹി വരെയും കുഞ്ചത്തൂർ മുതൽ കോട്ടക്കുന്ന് വരെയും ആണ് ജാഗ്രത നിർദേശം നൽകിയത്. 1.0 മുതൽ 1.2 മീറ്റർ വരെ ഉയരമുള്ള തിരമാലകൾക്കാണ് സാധ്യത.
അതുപോലെ കന്യാകുമാരി തീരത്ത് 1.2 മുതൽ 1.4 മീറ്റർ വരെ ഉയരത്തിൽ തിരമാലകൾ ഉണ്ടാകാനും കടലാക്രമണത്തിനും സാധ്യതയുണ്ടെന്നും INCOIS അറിയിച്ചു.

Kerala Monsoon Update: കാലവർഷം മൂന്ന് മാസം പിന്നിട്ടു; കേരളത്തിൽ 21% മഴ കുറവ്, പ്രതീക്ഷ സെപ്‌തംബറിൽ
ഇന്നത്തോടെ കേരളത്തിൽ കാലവർഷം മൂന്ന് മാസം പിന്നിടുകയാണ്. ഈ മൂന്നു മാസങ്ങളിലും മഴയുടെ അളവ് താരതമ്യേന കുറവാണ്.
https://metbeatnews.com/rainfall-deficit-after-first-three-months-september-remains-key

നിർദ്ദേശങ്ങൾ പാലിക്കുക

അപകട മേഖലകളിൽ താമസിക്കുന്നവർ നിർദേശപ്രകാരം സുരക്ഷിത സ്ഥാനങ്ങളിലേക്ക് മാറണമെന്നും ചെറിയ വള്ളങ്ങളും ബോട്ടുകളും കടലിൽ ഇറക്കുന്നത് ഒഴിവാക്കണമെന്നും മുന്നറിയിപ്പുണ്ട്. തിരമാല ശക്തമാകുന്ന സമയത്ത് മത്സ്യബന്ധന യാനങ്ങൾ കടലിലേക്ക് ഇറക്കുന്നതും കരയ്ക്കടുപ്പിക്കുന്നതും അപകടകരമായതിനാൽ ഇരു പ്രവർത്തനങ്ങളും ഒഴിവാക്കണമെന്ന് നിർദേശമുണ്ട്.
വിനോദസഞ്ചാരവും കടലിൽ ഇറങ്ങിയുള്ള വിനോദങ്ങളും ഒഴിവാക്കണം.
മത്സ്യത്തൊഴിലാളികൾക്കും പ്രത്യേക മുന്നറിയിപ്പ് നിർദേശമുണ്ട്.

മത്സ്യബന്ധനത്തിന് തടസ്സമില്ല

കേരളം, കർണാടക, ലക്ഷദ്വീപ് തീരങ്ങളിൽ ഇന്ന് (സെപ്റ്റംബർ 1) മത്സ്യബന്ധനത്തിന് തടസമില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു. എന്നാൽ വിവിധ തീരപ്രദേശങ്ങളിൽ ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ടെന്നും മത്സ്യത്തൊഴിലാളികൾ ജാഗ്രത പാലിക്കണമെന്നും നിർദ്ദേശമുണ്ട്.

ശക്തമായ കാറ്റിന് സാധ്യത

ഇന്ന് മുതൽ സെപ്തംബർ 3 വരെ തെക്കൻ തമിഴ്നാട് തീരം, ഗൾഫ് ഓഫ് മാന്നാർ, തെക്കുപടിഞ്ഞാറൻ ബംഗാൾ ഉൾക്കടൽ, തെക്കൻ ശ്രീലങ്കൻ തീരം എന്നിവിടങ്ങളിൽ മണിക്കൂറിൽ 45 മുതൽ 55 കിലോമീറ്റർ വരെയും ചില അവസരങ്ങളിൽ 65 കിലോമീറ്റർ വരെയും വേഗതയിൽ ശക്തമായ കാറ്റിന് സാധ്യതയുണ്ട്.
മാത്രമല്ല ഇന്ന് സോമാലിയ, ഒമാൻ തീരം, മധ്യ-പടിഞ്ഞാറൻ അറബിക്കടൽ, തെക്കുപടിഞ്ഞാറൻ അറബിക്കടൽ, വടക്കുപടിഞ്ഞാറൻ അറബിക്കടലിനോട് ചേർന്ന മേഖലകൾ എന്നിവിടങ്ങളിലും ശക്തമായ കാറ്റിന് സാധ്യതയുണ്ട്.

പശ്ചിമ ബംഗാൾ-ഒഡീഷ തീരങ്ങൾ, വടക്കുപടിഞ്ഞാറൻ ബംഗാൾ ഉൾക്കടൽ, ആൻഡമാൻ കടൽ എന്നിവിടങ്ങളിലും മണിക്കൂറിൽ 40 മുതൽ 50 കിലോമീറ്റർ വരെയും ചില അവസരങ്ങളിൽ 60 കിലോമീറ്റർ വരെയും വേഗതയിൽ കാറ്റിനും മോശം കാലാവസ്ഥയ്ക്കും സാധ്യതയുണ്ട്.

സെപ്റ്റംബർ 2, 3 തീയതികളിലും അറബിക്കടലിലെയും സോമാലിയ തീരത്തെയും വിവിധ മേഖലകളിൽ ശക്തമായ കാറ്റിന് സാധ്യതയുണ്ട്. സെപ്റ്റംബർ 4, 5 തീയതികളിലും സോമാലിയ തീരം, തെക്കുപടിഞ്ഞാറൻ അറബിക്കടൽ, മധ്യ-പടിഞ്ഞാറൻ അറബിക്കടൽ എന്നിവിടങ്ങളിൽ മണിക്കൂറിൽ 45 മുതൽ 55 കിലോമീറ്റർ വരെയും ചില അവസരങ്ങളിൽ 65 കിലോമീറ്റർ വരെയും വേഗതയിൽ കാറ്റ് വീശിയേക്കാം. മുന്നറിയിപ്പ് നിലനിൽക്കുന്ന സമുദ്രമേഖലകളിൽ ഈ ദിവസങ്ങളിൽ മത്സ്യബന്ധനത്തിന് പോകരുതെന്നാണ് നിർദേശം.

English Summary : The Indian National Centre for Ocean Information Services (INCOIS) has issued a high wave and rough sea alert for select coastal stretches in Kerala—specifically Thiruvananthapuram, Kannur, and Kasaragod—as well as the Kanyakumari coast due to the expected 'Kallakkadal' phenomenon (swell waves).