കേരളത്തിൽ ഉയർന്ന അൾട്രാവയലറ്റ് കിരണ മുന്നറിയിപ്പ്; ആറു ജില്ലകളിൽ ഓറഞ്ച് അലർട്ട്

സംസ്ഥാനത്ത് അടുത്ത 24 മണിക്കൂറിൽ ഉയർന്ന അൾട്രാവയലറ്റ് (UV) കിരണ തീവ്രത അനുഭവപ്പെടുമെന്ന് മുന്നറിയിപ്പ്. വിവിധ ജില്ലകളിൽ UV ഇൻഡക്സ് 5 മുതൽ 10 വരെ രേഖപ്പെടുത്തിയതായി അധികൃതർ അറിയിച്ചു. മലപ്പുറം, കോഴിക്കോട്, വയനാട്, തൃശൂർ, പാലക്കാട്, കോട്ടയം ജില്ലകളിൽ 7 മുതൽ 10 വരെ UV ഇൻഡക്സ് രേഖപ്പെടുത്തിയതിനാൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്. ഇടുക്കിയിൽ UV ഇൻഡക്സ് 10 ആയി ഉയർന്നിട്ടുണ്ട്.കൊല്ലം, ആലപ്പുഴ ജില്ലകളിൽ 8 എന്ന നിലയിലും പത്തനംതിട്ടയിൽ 8, തൃശൂരിൽ 7, പാലക്കാട് 7, മലപ്പുറം 6, കോഴിക്കോട് 6 എന്ന നിലയിലും UV ഇൻഡക്സ് രേഖപ്പെടുത്തി. തിരുവനന്തപുരം, എറണാകുളം, കണ്ണൂർ, കാസർഗോഡ് ജില്ലകളിൽ 5 എന്ന നിലയിലാണ് UV ഇൻഡക്സ്.UV ഇൻഡക്സ് 6 മുതൽ 7 വരെയായാൽ മഞ്ഞ അലർട്ടും, 8 മുതൽ 10 വരെയായാൽ ഓറഞ്ച് അലർട്ടും, 11 ന് മുകളിലായാൽ റെഡ് അലർട്ടുമാണ് പ്രഖ്യാപിക്കുന്നത്.

കഴിഞ്ഞ ദിവസം പത്തനംതിട്ട, ആലപ്പുഴ ജില്ലകളിൽ UV സൂചിക 8 രേഖപ്പെടുത്തിയിരുന്നു. കോട്ടയം, ചങ്ങനാശേരി, തൃശൂർ, പാലക്കാട്, കോഴിക്കോട് തുടങ്ങിയ ജില്ലകളിൽ UV സൂചിക 6 മുതൽ 7 വരെയായിരുന്നു. കോന്നി, ചെങ്ങന്നൂർ മൂന്നാർ എന്നീ സ്റ്റേഷനുകളിൽ ഓറഞ്ച് അലർട്ട് രേഖപ്പെടുത്തി. 7 സ്റ്റേഷനുകളിൽ മഞ്ഞ അലേർട്ട് രേഖപ്പെടുത്തിയിരുന്നു. അതേ സമയം നൂനമർദ്ദത്തെ തുടർന്ന് മേഘാവൃതമായ അന്തരീക്ഷം ഉണ്ടായതോടെ UV index പലയിടത്തും കുറഞ്ഞിരുന്നു. ഇന്ന്നും മേഘാവൃതമായ അന്തരീക്ഷത്തിൽ അൽപ്പം മാറ്റമുണ്ട്. അതിനാൽ ചൂട് കൂടുകയും ഒപ്പം UV index കൂടുകയും ചെയ്തു. നേരിട്ട് വെയിൽ ഭൂമിയിൽ പതിക്കുന്ന സാഹചര്യത്തിലാണ് അൾട്രാവയലറ്റ് റേഡിയേഷൻ കൂടുതലാവുന്നത്. ചർമ്മത്തിൽ വരുന്ന കാൻസറുകൾക്ക് ഈ അൾട്രാവയലറ്റ് റേഡിയേഷൻ കാരണമാകും.

സൂചിക 6 ന് മുകളിലുള്ള പ്രദേശങ്ങളിലുള്ളവര്‍ പുറത്തിറങ്ങുമ്പോള്‍ മുന്‍കരുതലെടുക്കണം. മലയോരങ്ങൾ, ഉഷ്ണമേഖലാ പ്രദേശങ്ങള്‍ എന്നിവിടങ്ങളില്‍ പൊതുവേ യു.വി സൂചിക ഉയര്‍ന്നതായിരിക്കും. മേഘങ്ങളില്ലാത്ത തെളിഞ്ഞ ആകാശമാണെങ്കിലും ഉയര്‍ന്ന യു.വി സൂചികയുണ്ടാകാന്‍ സാധ്യതയുണ്ട്.
പകല്‍ 10 മുതല്‍ 3 വരെയുള്ള സമയങ്ങളിലാണ് ഉയര്‍ന്ന അള്‍ട്രാവയലറ്റ് സൂചിക രേഖപ്പെടുത്തപ്പെടുന്നത്. അതിനാല്‍ ആ സമയങ്ങളില്‍ കൂടുതല്‍ നേരം ശരീരത്തില്‍ നേരിട്ട് സൂര്യപ്രകാശം ഏല്‍ക്കുന്നതു പരമാവധി ഒഴിവാക്കുന്നതാണ് സുരക്ഷിതം.
തൊഴിലാളികള്‍ക്ക് സൂര്യാഘാതം ഏല്‍ക്കുന്നതിനുള്ള സാഹചര്യമുള്ളതിനാല്‍ ഫെബ്രുവരി 12 മുതല്‍ മേയ് 20 വരെ ജോലി സമയം പുനഃക്രമീകരിച്ച് സംസ്ഥാനലേബര്‍ കമ്മിഷണര്‍ ഉത്തരവിറക്കിയിരുന്നു.

English Summary : A warning has been issued for high ultraviolet (UV) radiation levels across Kerala over the next 24 hours. UV index values ranging from 5 to 10 have been recorded in various districts.