കുണ്ടള ഡാമിൽ റെഡ് അലർട്ട്; അഞ്ച് ഷട്ടറുകളും തുറന്ന് വെള്ളം പുറത്തേക്ക്

കുണ്ടള ഡാമിലെ അഞ്ച് ഷട്ടറുകളും തുറന്ന് അധികജലം പുറത്തേക്ക് ഒഴുക്കിത്തുടങ്ങി. ഇന്ന് രാവിലെ 11 മണി മുതലാണ് ഷട്ടറുകൾ 50 സെന്റീമീറ്റർ വീതം ഉയർത്തി ജലം പുറത്തേക്ക് ഒഴുക്കിയത്. പരമാവധി 60 ക്യുമെക്സ് വെള്ളം ഘട്ടംഘട്ടമായി കുണ്ടളയാറിലൂടെ മാട്ടുപ്പെട്ടി ഡാമിലേക്ക് ഒഴുക്കുന്നതിനാണ് ജില്ലാ ദുരന്തനിവാരണ അതോറിറ്റി അനുമതി നൽകിയത്.

പള്ളിവാസൽ ജലവൈദ്യുത പദ്ധതിയുടെ ഭാഗമായ കുണ്ടള ഡാമിലെ ജലനിരപ്പ് ക്രമീകരിക്കുന്നതിന്റെ ഭാഗമായാണ് നടപടി. നിലവിൽ ഡാമിൽ റെഡ് അലർട്ട് നിലനിൽക്കുന്നുണ്ട്.

Kerala Weather : ബംഗാൾ ഉൾക്കടലിൽ ന്യൂനമർദം രൂപപ്പെട്ടു; നവംബർ 16-ഓടെ ചുഴലിക്കാറ്റായി ശക്തിപ്രാപിക്കാൻ സാധ്യത
ബംഗാൾ ഉൾക്കടലിൽ ന്യൂനമർദം രൂപപ്പെട്ടു. ഇത് ശക്തിപ്രാപിച്ച് ഈ സീസണിലെ മൂന്നാമത്തെ ചുഴലിക്കാറ്റായി മാറാൻ സാധ്യത.
https://metbeatnews.com/low-pressure-area-forms-likely-to-intensify-by-november-16

ഷട്ടറുകൾ തുറന്നതോടെ കുണ്ടളയാറിലെ ജലനിരപ്പ് നിലവിലുള്ളതിനേക്കാൾ 30 മുതൽ 70 സെന്റീമീറ്റർ വരെ ഉയരാൻ സാധ്യതയുണ്ടെന്ന് അധികൃതർ മുന്നറിയിപ്പ് നൽകി. ഡാമിന് താഴെ കുണ്ടളയാറിന്റെ ഇരുകരകളിലും താമസിക്കുന്നവർ അതീവ ജാഗ്രത പാലിക്കണമെന്ന് ജില്ലാ ദുരന്തനിവാരണ അതോറിറ്റി ചെയർപേഴ്‌സണും ജില്ലാ കലക്ടറുമായ ഡോ. ദിനേശൻ ചെറുവാട്ട് അറിയിച്ചു.

ജലം തുറന്നുവിടുന്നതിന് മുമ്പ് ഓറഞ്ച് ബുക്കിൽ നിർദേശിച്ചിട്ടുള്ള എല്ലാ മുൻകരുതൽ നടപടികളും ബന്ധപ്പെട്ട ഉദ്യോഗസ്ഥർ സ്വീകരിക്കണമെന്നും ഉത്തരവിൽ വ്യക്തമാക്കിയിട്ടുണ്ട്.

English Summary : Authorities have issued a Red Alert at the Kundala Dam in Idukki district, Kerala, and opened all five shutters by 50 cm each to release excess water. Starting at 11:00 AM today, the District Disaster Management Authority (DDMA) permitted the phased release of up to 60 cumecs of water into the Mattupetty Dam via the Kundalayar River to regulate water levels under the Pallivasal Hydroelectric Project.