ആദ്യ മലയാളി ബഹിരാകാശ യാത്രികൻ; ചരിത്ര നിമിഷത്തിന് മണിക്കൂറുകൾ മാത്രം

ബഹിരാകാശത്തെത്തുന്ന ആദ്യ മലയാളിയെന്ന ചരിത്രനേട്ടത്തിന്റെ വക്കിലാണ് അമേരിക്കൻ ബഹിരാകാശ ഏജൻസിയായ നാസ (NASA)യിലെ ശാസ്ത്രജ്ഞനും ബഹിരാകാശ യാത്രികനുമായ ഡോ. അനിൽ മേനോൻ. അന്താരാഷ്ട്ര ബഹിരാകാശ നിലയത്തിലേക്കുള്ള (International Space Station – ISS) എട്ടുമാസം നീളുന്ന ദൗത്യത്തിന്റെ ഭാഗമായി നാളെ വൈകീട്ട് 7.47 ന് അനിൽ മേനോനും സംഘവും യാത്ര തിരിക്കും.

കസാഖ്സ്താനിലെ ബൈക്കോനൂർ കോസ്മോഡ്രോം (Baikonur Cosmodrome) എന്ന ലോകത്തിലെ ഏറ്റവും പഴക്കമേറിയ വിക്ഷേപണകേന്ദ്രത്തിൽ നിന്ന് റഷ്യയുടെ സോയൂസ് എം.എസ്.-29 (Soyuz MS-29) പേടകത്തിലാണ് യാത്രതിരിക്കുക. റഷ്യൻ ബഹിരാകാശ ഏജൻസിയായ റോസ്കോസ്മോസ് (Roscosmos) ആണ് ഈ ദൗത്യം ഏകോപിപ്പിക്കുന്നത്. അനില്‍ മേനോനെയും സംഘത്തെയും വഹിച്ചുള്ള സോയുസ് എം.എസ് 29 പേടകം ബൈകാനൂരില്‍ നിന്ന് വിക്ഷേപിക്കുന്നതിന്റെ തല്‍ത്സമയ സംപ്രേഷണം ചൊവ്വാഴ്ച വൈകിട്ട് ഇന്ത്യന്‍ സമയം 7.15 മുതല്‍ Metbeat News ല്‍ കാണാം. താഴെ കാണുന്ന വിഡിയോ വിൻഡോ പ്ലേ ചെയ്താൽ മതിയാകും.

കേരളത്തിന് അഭിമാന നിമിഷം

അമേരിക്കയിൽ ജനിച്ചുവളർന്നെങ്കിലും കുടുംബവേരുകൾ പാലക്കാട്ടായതിനാൽ ഈ ചരിത്രയാത്ര കേരളത്തിനും പ്രത്യേകിച്ച് പാലക്കാടിനും ഒറ്റപ്പാലത്തിനും അഭിമാന നിമിഷമാണ്. 1984-ൽ സോയൂസ് ടി-11 (Soyuz T-11) പേടകത്തിൽ കയറി ബഹിരാകാശത്തെത്തിയ രാകേഷ് ശർമയാണ് ആദ്യ ഇന്ത്യൻ ബഹിരാകാശ യാത്രികൻ.

നാല് പതിറ്റാണ്ടുകൾക്ക് ശേഷം മലയാളി വംശജനായ അനിൽ മേനോൻ ചരിത്രത്തിന്റെ പുതിയ അധ്യായമാണ് എഴുതുന്നത്. ബഹിരാകാശത്തെത്തുന്ന ആദ്യ മലയാളിയെന്ന നേട്ടം ഇനി അദ്ദേഹത്തിന്റെ പേരിലാകും.
ഐ.എസ്.എസിൽ എട്ടുമാസത്തോളം താമസിക്കുന്നതിനിടെ ഫ്ലൈറ്റ് എൻജിനീയറുടെ ചുമതലകൾക്കൊപ്പം നിരവധി ശാസ്ത്രീയ പരീക്ഷണങ്ങൾക്കും അദ്ദേഹം നേതൃത്വം നൽകും.

സ്വാതന്ത്ര്യസമര നായകൻ ചേറ്റൂർ ശങ്കരൻനായരുടെ പിന്മുറക്കാരൻ

അനിൽ മേനോന്റെ കുടുംബപാരമ്പര്യവും ശ്രദ്ധേയമാണ്. ഇന്ത്യൻ നാഷണൽ കോൺഗ്രസിന്റെ ആദ്യ മലയാളി അധ്യക്ഷനും ബ്രിട്ടീഷ് ഇന്ത്യയിലെ ആദ്യ ഇന്ത്യൻ അഡ്വക്കേറ്റ് ജനറൽ (Advocate General) ആയിരുന്ന സർ ചേറ്റൂർ ശങ്കരൻനായരുടെ പിന്മുറക്കാരനാണ് അദ്ദേഹം.
വൈസ്രോയിയുടെ എക്സിക്യൂട്ടീവ് കൗൺസിലിൽ അംഗമായിരിക്കെ ജാലിയൻവാലാബാഗ് കൂട്ടക്കൊല (Jallianwala Bagh Massacre)യിൽ പ്രതിഷേധിച്ച് രാജിവെച്ച ദേശീയനേതാവെന്ന നിലയിലും ശങ്കരൻനായർ ചരിത്രത്തിൽ ഇടം നേടിയിട്ടുണ്ട്.

ചേറ്റൂരിന്റെ മൂന്നാമത്തെ മകളായ കിഴക്കേപ്പാട്ട് പാലാട്ട് മാധവിയമ്മയുടെ കുടുംബത്തിലൂടെയാണ് അനിൽ മേനോന്റെ പാരമ്പര്യം തുടരുന്നത്. മാധവിയമ്മയുടെയും എം.എ. കാൻഡത്തിന്റെയും മകളായ കല്യാണിക്കുട്ടിയമ്മയുടെ മകനാണ് അനിൽ മേനോന്റെ പിതാവ് കെ.പി. ശങ്കരൻ മേനോൻ. അമ്മ ലിസ സാമോലെങ്കോ (Lisa Samolenko) യുക്രൈനിൽ ജനിച്ച് പിന്നീട് അമേരിക്കയിലേക്ക് കുടിയേറിയതാണ്.

ഹാർവഡിൽ നിന്ന് നാസയിലേക്ക് (From Harvard to NASA)

ബഹിരാകാശ യാത്രികനാകുന്നതിന് മുമ്പേ അനിൽ മേനോൻ അക്കാദമിക രംഗത്ത് ശ്രദ്ധേയനായിരുന്നു. ഹാർവഡ് സർവകലാശാലയിൽ (Harvard University) നിന്ന് ന്യൂറോബയോളജിയിൽ ബിരുദം നേടിയ അദ്ദേഹം പിന്നീട് സ്റ്റാൻഫഡ് സർവകലാശാലയിൽ (Stanford University) നിന്ന് മെക്കാനിക്കൽ എൻജിനീയറിങ്ങിലും ബിരുദം നേടി.

തുടർന്ന് മെഡിക്കൽ പഠനം പൂർത്തിയാക്കി എമർജൻസി മെഡിസിൻ ഫിസിഷ്യൻ (Emergency Medicine Physician) ആയി സേവനം ആരംഭിച്ചു. തുടർന്ന് എയ്‌റോസ്‌പേസ് മെഡിസിൻ (Aerospace Medicine) മേഖലയിൽ വിദഗ്ധ പരിശീലനം നേടി. നാഡീവ്യവസ്ഥയെ ക്രമേണ ദുർബലമാക്കുന്ന ഹണ്ടിങ്ടൺസ് ഡിസീസ് (Huntington’s Disease) സംബന്ധിച്ച ഗവേഷണങ്ങളും അദ്ദേഹത്തെ ശ്രദ്ധേയനാക്കി.

യുദ്ധഭൂമിയിലും ദുരന്തമുഖത്തും സേവനം

അമേരിക്കൻ വ്യോമസേനയിൽ (U.S. Air Force) സേവനമനുഷ്ഠിച്ച അനിൽ മേനോൻ, ഓപ്പറേഷൻ എൻഡ്യൂറിങ് ഫ്രീഡം (Operation Enduring Freedom) പദ്ധതിയുടെ ഭാഗമായി അഫ്ഗാനിസ്ഥാനിലും പ്രവർത്തിച്ചു. ഹെയ്തി, നേപ്പാൾ എന്നിവിടങ്ങളിലെ ഭൂകമ്പ രക്ഷാപ്രവർത്തനങ്ങളിലും അദ്ദേഹം സജീവസാന്നിധ്യമായിരുന്നു. എവറസ്റ്റ് മേഖലയിലെ പർവതാരോഹകർക്ക് അടിയന്തര വൈദ്യസഹായം നൽകുന്ന ഹിമാലയൻ റെസ്ക്യൂ അസോസിയേഷനിലും (Himalayan Rescue Association) സേവനം അനുഷ്ഠിച്ചു.

റോട്ടറി അംബാസഡോറിയൽ സ്കോളർ (Rotary Ambassadorial Scholar) എന്ന നിലയിൽ ഇന്ത്യയിൽ ഒരു വർഷം ചെലവഴിച്ച അദ്ദേഹം പോളിയോ പ്രതിരോധ കുത്തിവയ്പ്പ് പദ്ധതികളിലും പങ്കാളിയായി.

പൈലറ്റിൽ നിന്ന് ബഹിരാകാശ ശാസ്ത്രജ്ഞനിലേക്ക്

വൈദ്യശാസ്ത്രജ്ഞൻ മാത്രമല്ല, മികച്ച പൈലറ്റുകൂടിയാണ് അനിൽ മേനോൻ. 1,000 മണിക്കൂറിലേറെ വിമാനപറക്കൽ പരിചയമുള്ള അദ്ദേഹം സർട്ടിഫൈഡ് ഫ്ലൈറ്റ് ഇൻസ്ട്രക്ടർ (Certified Flight Instructor) കൂടിയാണ്.

2014-ൽ ഫ്ലൈറ്റ് സർജൻ (Flight Surgeon) ആയി നാസയിൽ ചേർന്ന അദ്ദേഹം അന്താരാഷ്ട്ര ബഹിരാകാശ നിലയത്തിലെ ബഹിരാകാശ യാത്രികരുടെ ആരോഗ്യസംരക്ഷണ ചുമതലകളിൽ പ്രവർത്തിച്ചു.

സ്‌പേസ്എക്‌സിന്റെ വളർച്ചയിൽ നിർണായക പങ്ക് (SpaceX Mission)

2018-ൽ അദ്ദേഹം സ്‌പേസ്എക്സ് (SpaceX) കമ്പനിയിൽ ചേർന്നു. സ്ഥാപനത്തിന്റെ ആദ്യ ഫ്ലൈറ്റ് സർജനും (Flight Surgeon) പിന്നീട് മെഡിക്കൽ ഡയറക്ടറും (Medical Director) ആയി.
മനുഷ്യരെ ബഹിരാകാശത്തേക്ക് എത്തിച്ച ആദ്യ സ്വകാര്യ ദൗത്യമായ ഡെമോ-2 (Demo-2), ലോകത്തിലെ ആദ്യ സമ്പൂർണ സിവിലിയൻ ഭ്രമണദൗത്യമായ ഇൻസ്പിരേഷൻ-4 (Inspiration4), ഭാവിയിലെ ചന്ദ്ര-ചൊവ്വ ദൗത്യങ്ങൾക്കായി വികസിപ്പിക്കുന്ന സ്റ്റാർഷിപ്പ് (Starship) പദ്ധതികൾ എന്നിവയുടെ മെഡിക്കൽ-സാങ്കേതിക വികസനത്തിലും അദ്ദേഹം നിർണായക പങ്കുവഹിച്ചു.

12,000 അപേക്ഷകരിൽ നിന്ന് നാസയുടെ തിരഞ്ഞെടുപ്പ്

2021-ൽ നാസ പുതിയ ബഹിരാകാശ യാത്രികരെ തിരഞ്ഞെടുക്കുമ്പോൾ ലോകമെമ്പാടുമുള്ള 12,000-ത്തിലധികം അപേക്ഷകരിൽ നിന്നാണ് അനിൽ മേനോനെ തെരഞ്ഞെടുത്തത്.
ആസ്ട്രോനോട്ട് ഗ്രൂപ്പ്-23 (Astronaut Group 23) അംഗമായ അദ്ദേഹം രണ്ടുവർഷം നീണ്ട കഠിനപരിശീലനം വിജയകരമായി പൂർത്തിയാക്കിയാണ് ഇപ്പോൾ തന്റെ ആദ്യ ബഹിരാകാശ ദൗത്യത്തിന് തയ്യാറായിരിക്കുന്നത്.

ഭാര്യയും ബഹിരാകാശ സഞ്ചാരി

അനിൽ മേനോന്റെ ഭാര്യ അന്ന മേനോൻ (Anna Menon) ബഹിരാകാശ എഞ്ചിനീയറും ബഹിരാകാശ സഞ്ചാരിയുമാണ്. 2024 സെപ്റ്റംബറിൽ പോളാരിസ് ഡോൺ (Polaris Dawn) സ്വകാര്യ ബഹിരാകാശ ദൗത്യത്തിന്റെ ഭാഗമായി അവർ അഞ്ച് ദിവസത്തോളം ഭൂമിയുടെ ഭ്രമണപഥത്തിൽ സഞ്ചരിച്ചിരുന്നു.
2016-ൽ വിവാഹിതരായ ഇരുവർക്കും ജെയിംസ്, ഗ്രേസ് എന്നിങ്ങനെ രണ്ട് മക്കളുണ്ട്.

ഐ.എസ്.എസിൽ എന്തൊക്കെയാകും അനിൽ മേനോന്റെ ദൗത്യം?

അന്താരാഷ്ട്ര ബഹിരാകാശ നിലയത്തിൽ കഴിയുന്ന എട്ടുമാസത്തിനിടെ മനുഷ്യശരീരത്തിൽ മൈക്രോഗ്രാവിറ്റി (Microgravity) ഉണ്ടാക്കുന്ന മാറ്റങ്ങളാണ് പ്രധാനമായും അദ്ദേഹം പഠിക്കുക. രക്തയോട്ടത്തിലെ വ്യത്യാസങ്ങൾ, ശരീരത്തിലെ ദ്രാവകങ്ങൾ മുകളിലേക്കുള്ള നീക്കം, കുടിവെള്ളത്തിൽ നിന്ന് ഐ.വി. ഫ്ലൂയിഡുകൾ (IV Fluids) നിർമ്മിക്കുന്ന സാങ്കേതികവിദ്യ, ആർട്ടിഫിഷ്യൽ ഇന്റലിജൻസ് (Artificial Intelligence – AI) ഉപയോഗിച്ചുള്ള മെഡിക്കൽ പരിശോധനകൾ, ഭാവിയിലെ ചന്ദ്ര-ചൊവ്വ ദൗത്യങ്ങൾക്ക് ആവശ്യമായ ആരോഗ്യസാങ്കേതികവിദ്യകൾ എന്നിവയാണ് ഗവേഷണത്തിന്റെ പ്രധാന മേഖലകൾ.

മലയാളികൾക്ക് ഇരട്ട അഭിമാനം

നാസയുടെ ബഹിരാകാശ ദൗത്യത്തിലൂടെ ആദ്യ മലയാളിയായി ചരിത്രം കുറിക്കാൻ ഒരുങ്ങുന്ന അനിൽ മേനോനും, ഇന്ത്യയുടെ ആദ്യ മനുഷ്യ ബഹിരാകാശ ദൗത്യമായ ഗഗൻയാൻ (Gaganyaan) പദ്ധതിക്കായി തിരഞ്ഞെടുക്കപ്പെട്ട പാലക്കാട് നെന്മാറ സ്വദേശി ഗ്രൂപ്പ് ക്യാപ്റ്റൻ പ്രശാന്ത് ബാലകൃഷ്ണൻ നായരും മലയാളികൾക്ക് ഇരട്ട അഭിമാനമാണ്.

ഒരാൾ ലോകത്തിലെ ഏറ്റവും വലിയ ബഹിരാകാശ ഏജൻസിയായ നാസയുടെ ദൗത്യത്തിലും, മറ്റൊരാൾ ഇന്ത്യയുടെ സ്വന്തം മനുഷ്യ ബഹിരാകാശ പദ്ധതിയിലും പങ്കാളിയാകുമ്പോൾ, കേരളത്തിന്റെ പേര് ആഗോള ബഹിരാകാശ ചരിത്രത്തിൽ കൂടുതൽ തിളക്കത്തോടെ രേഖപ്പെടുത്തപ്പെടുകയാണ്.

English Summary : Dr. Anil Menon, a NASA scientist and astronaut of Keralite heritage, is set to make history as the first Malayali in space. Departing from the Baikonur Cosmodrome in Kazakhstan aboard Russia’s Soyuz MS-29 spacecraft, Dr. Menon will embark on an 8-month mission to the International Space Station (ISS) managed by Roscosmos, where he will serve as a Flight Engineer and lead key scientific experiments.