ബ്രിട്ടനിൽ ആഞ്ഞടിക്കുന്ന 'ഗോറെറ്റി' (Storm Goretti) കൊടുങ്കാറ്റും കനത്ത മഞ്ഞുവീഴ്ചയും കാരണം ലണ്ടനിലും ബർമിംഗ്ഹാമിലും ഇറങ്ങേണ്ട രണ്ട് എയർ ഇന്ത്യ വിമാനങ്ങൾ വഴിതിരിച്ചുവിട്ടു. ലാൻഡിംഗിന് തൊട്ടുമുമ്പ് കാലാവസ്ഥ മോശമായതിനെത്തുടർന്ന് പൈലറ്റുമാർ വിമാനങ്ങൾ മറ്റ് വിമാനത്താവളങ്ങളിലേക്ക് തിരിക്കുകയായിരുന്നു.

മുംബൈ - ലണ്ടൻ വിമാനം (AI131): ലണ്ടനിലെ ഹീത്രൂ വിമാനത്താവളത്തിൽ ഇറങ്ങേണ്ടിയിരുന്ന ഈ വിമാനം മോശം കാലാവസ്ഥയെത്തുടർന്ന് കുറച്ചുനേരം ആകാശത്ത് വട്ടംചുറ്റിയ ശേഷം ഗാറ്റ്‌വിക് (Gatwick) വിമാനത്താവളത്തിലേക്ക് തിരിച്ചുവിട്ടു.

അമൃത്സർ - ബർമിംഗ്ഹാം വിമാനം (AI117): ബർമിംഗ്ഹാമിൽ ലാൻഡ് ചെയ്യേണ്ടിയിരുന്ന ഈ വിമാനം മഞ്ഞുവീഴ്ച ശക്തമായതോടെ ലണ്ടനിലെ ഹീത്രൂ വിമാനത്താവളത്തിലേക്ക് തിരിച്ചുവിട്ടു.

ഇന്ധനം കുറവായതിനെത്തുടർന്ന് ഈ വിമാനം അടിയന്തര ലാൻഡിംഗിന് അനുമതി തേടിയിരുന്നു (Squawk 7700).
സുരക്ഷിതമായി ലാൻഡ് ചെയ്തു
രണ്ട് വിമാനങ്ങളും നിശ്ചയിച്ച വിമാനത്താവളങ്ങളിൽ നിന്ന് മാറി മറ്റ് ഇടങ്ങളിൽ സുരക്ഷിതമായി ഇറങ്ങിയെന്നും യാത്രക്കാർക്ക് ആവശ്യമായ സഹായങ്ങൾ നൽകിവരികയാണെന്നും എയർ ഇന്ത്യ വക്താവ് അറിയിച്ചു.

യുകെയിൽ അതിശക്തമായ കാറ്റും മഞ്ഞുവീഴ്ചയും തുടരുന്നതിനാൽ റെഡ് അലർട്ട് ഉൾപ്പെടെയുള്ള മുന്നറിയിപ്പുകൾ നിലവിലുണ്ട്. ഇത് വ്യോമഗതാഗതത്തെ കാര്യമായി ബാധിച്ചിട്ടുണ്ട്.

Metbeat news