ന്യൂസിലാൻ്റിൽ കനത്ത മഞ്ഞു വീഴ്ച; വാഹനങ്ങൾക്ക് ചങ്ങലകൾ ഘടിപ്പിച്ചില്ലെങ്കിൽ 750 ഡോളർ പിഴ

ന്യൂസിലാൻ്റിലെ സൗത്ത് ഐലൻഡിൽ ഉണ്ടായ കനത്ത മഞ്ഞുവീഴ്ച കാരണം ക്രൗൺ റേഞ്ച് റോഡ് അടച്ചു. ഇവിടെ ആദ്യമായി വാഹനങ്ങൾക്ക് ചങ്ങലകൾ ഘടിപ്പിച്ചില്ലെങ്കിൽ 750 ഡോളർ പിഴ ഈടാക്കും.

നോർത്ത്, അപ്പർ സൗത്ത് ദ്വീപുകളിൽ ശക്തമായ കാറ്റ് വീശുന്നതിനാൽ, ഫെറികളും വിമാന സർവീസുകളും റദ്ദാക്കിയിട്ടുണ്ട്. ചില ഹൈവേകളും അടച്ചു. മഞ്ഞുവീഴ്ച കാരണം ഒട്ടാഗോ പ്രദേശത്തെ സ്കൂളുകളും ഇന്ന് അടച്ചിടേണ്ടി വന്നു.

ഇന്ന് രാവിലെ 5 മണിക്ക് മുമ്പ് കേപ് റീംഗയിൽ മണിക്കൂറിൽ 137 കിലോമീറ്റർ വേഗതയിൽ കാറ്റ് വീശിയതായി കാലാവസ്ഥ കേന്ദ്രം റിപ്പോർട്ട് ചെയ്തു.

കഴിഞ്ഞ 24 മണിക്കൂറിനുള്ളിൽ 12 സെന്റീമീറ്റർ മഞ്ഞ് വീണതായി സൗത്ത് ഐലൻഡിലെ Coronet Peak സ്കീ ഫീൽഡ് റിപ്പോർട്ട് ചെയ്തു. ഏകദേശം 10 സെന്റീമീറ്റർ മഞ്ഞ് ലഭിച്ചതായും സ്കീ ഫീൽഡ് ശനിയാഴ്ച തുറക്കുമെന്ന് പ്രതീക്ഷിക്കുന്നതായും The Remarkables സ്കീ ഫീൽഡ് പ്രഖാപിച്ചിട്ടുണ്ട്.

റോഡിൽ മഞ്ഞ് പുതച്ച നിലയിലായതിനാൽ ബസുകളിൽ ചെയിൻ ഘടിപ്പിക്കുന്നതിന് കാലതാമസമുണ്ടാകുമെന്ന് ജീവനക്കാർ അറിയിച്ചു. എല്ലാ വാഹനങ്ങളിലും നിർബന്ധമായും ചങ്ങലകൾ ഘടിപ്പിക്കണമെന്ന് ഉത്തരവുണ്ട്.

കനത്ത മഞ്ഞും ഐസും കാരണം Lauder-നും Wedderburn-നും ഇടയിലുള്ള സ്റ്റേറ്റ് ഹൈവേ 85 ഇനിയൊരു അറിയിപ്പ് ഉണ്ടാകുന്നതുവരെ അടച്ചിട്ടിരിക്കുകയാണ്.

200 വിമാന സർവിസുകൾ റദ്ദാക്കി

വെല്ലിംഗ്ടൺ, തരാനകി, മാൾബറോ എന്നിവിടങ്ങളിൽ തുടരുന്ന മോശം കാലാവസ്ഥ മൂലം വെല്ലിംഗ്ടണിൽ 200-ഓളം വിമാനങ്ങൾ റദ്ദാക്കി. ഇന്ന് രാവിലെ മുതൽ വിമാന സേവനങ്ങൾ റദ്ദാക്കേണ്ടി വന്നതിനാൽ ആയിരക്കണക്കിന് യാത്രക്കാർ വിമാനങ്ങൾ റീബുക്ക് ചെയ്യാൻ നെട്ടോട്ടമോടുകയാണ്. "സുരക്ഷിതമാകുമ്പോൾ" മാത്രമേ വെല്ലിംഗ്ടൺ സേവനങ്ങൾ പുനരാരംഭിക്കൂ എന്ന് എയർ ന്യൂസിലാൻഡ് വ്യക്തമാക്കി.

വൈദ്യുതി മുടങ്ങി

വെല്ലിംഗ്ടൺ മേഖലയിലും, പോരിരുവ, ഹട്ട് വാലി എന്നിവിടങ്ങളിലുമായി ഏകദേശം 3500 ഉപഭോക്താക്കൾക്ക് വൈദ്യുതിയില്ല. ലോവർ ഹട്ടിൽ കനത്ത മഴ തുടരുകയാണെന്നും വെള്ളപ്പൊക്കം, മണ്ണിടിച്ചിൽ, വൈദ്യുതി തടസ്സങ്ങൾ ഉണ്ടാകുമെന്നും ഹട്ട് സിറ്റി കൗൺസിൽ ജനങ്ങൾക്ക് മുന്നറിയിപ്പ് നൽകി.

വാഹനത്തിന്റെ മുകളിൽ മരം വീണ് ഒരാൾക്ക് പരിക്ക്

ന്യൂ പ്ലിമൗത്തിൽ വാഹനത്തിന് മുകളിൽ മരം കടപുഴകി വീണ് ഒരാൾക്ക് ഗുരുതരമായി പരിക്കേറ്റു. വെല്ലിംഗ്ടൺ റീജിയണൽ എമർജൻസി മാനേജ്‌മെന്റ് ഓഫീസ് താമസക്കാരോട് പുറത്തിറങ്ങിയാൽ "ജാഗ്രത പാലിക്കാനും" "സാധ്യമെങ്കിൽ വീട്ടിൽ തന്നെ തുടരാനും" മുന്നറിയിപ്പ് നൽകിയിട്ടുണ്ട്.

ശക്തമായ കാറ്റിന് മഴയ്ക്കും സാധ്യത

ന്യൂനമർദ്ദം കാരണം രാജ്യവ്യാപകമായി ശക്തമായ മഴയ്ക്കും ശക്തമായ കാറ്റിനും സാധ്യത ഉണ്ടെന്നുള്ള മുന്നറിയിപ്പുകൾ നിലവിൽ തുടരുന്നു.

ന്യൂസിലൻഡ് മലയാളികൾ അറിയേണ്ട വാർത്തകൾക്കും നാട്ടിലെയും ന്യൂസിലാൻഡിലെയും കാലാവസ്ഥാ വിവരങ്ങൾക്കും ഈ ഗ്രൂപ്പിൽ ജോയിൻ ചെയ്യുമല്ലോ ? അതിനായി ഇവിടെ ക്ലിക്ക് ചെയ്യുക

English Summary : Heavy Snow and Wild Weather Lash New Zealand: Flight Cancellations, Power Outages, and a $750 Fine Warning for Motorists. A severe winter storm has brought heavy snowfall, destructive winds, and torrential rain across New Zealand, causing widespread disruptions, property damage, and travel chaos.

Tag : NewZealandMalayali, #newzealandmalayalamnews #NewZealandNews #wildweather #wellington #northislandnz