ഇന്ന് (സെപ്റ്റംബർ 23) ഭൂമിയിൽ പകലും രാത്രിയും തുല്യ ദൈർഘ്യത്തിൽ അനുഭവപ്പെടുന്ന അപൂർവ പ്രകൃതി പ്രതിഭാസമായ 'ശരത്കാല വിഷുവം' (Autumnal Equinox). ഭൂമധ്യരേഖയ്ക്ക് നേരെ മുകളിലായി സൂര്യൻ നേരിട്ട് പ്രകാശം ചൊരിയുന്ന ദിവസമാണിത്. ഇതോടെ വടക്കൻ അർദ്ധഗോളത്തിൽ ഔദ്യോഗികമായി ജ്യോതിശാസ്ത്രപരമായ ശരത്കാലത്തിന് (Astronomical Autumn) തുടക്കമായി.

എന്താണ് വിഷുവം (Equinox)?

ഭൂമി സൂര്യനെ വലംവെക്കുന്നതിനിടയിൽ, ഭൂമിയുടെ അക്ഷത്തിന്റെ ( Axis) ചെരിവ് കാരണം സൂര്യന്റെ വെളിച്ചം ഭൂമധ്യരേഖയിൽ (Equator) കൃത്യമായി ലംബമായി പതിക്കുന്ന ഘട്ടത്തെയാണ് 'വിഷുവം' അഥവാ 'സമരാത്രിദിനം' എന്ന് വിളിക്കുന്നത്. 'ഇക്വിനോക്സ്' എന്ന ലത്തീൻ വാക്കിന്റെ അർത്ഥം തന്നെ 'തുല്യ രാവ്' (Equal Night) എന്നാണ്. ഈ ദിവസം ഭൂമധ്യ രേഖാ പ്രദേശത്ത് എവിടെയും പകലിനും രാത്രിയ്ക്കും ഏകദേശം 12 മണിക്കൂർ വീതമായിരിക്കും ദൈർഘ്യം.

പ്രധാന സവിശേഷതകൾ

ശരത്കാലത്തിന്റെ വരവ്: വടക്കൻ അർദ്ധഗോളത്തിൽ (ഇന്ത്യ ഉൾപ്പെടെയുള്ള ഏഷ്യൻ രാജ്യങ്ങൾ, യൂറോപ്പ്, നോർത്ത് അമേരിക്ക) ചൂട് കുറഞ്ഞ് തണുപ്പ് ആരംഭിക്കുന്ന ശരത്കാലത്തിന്റെ തുടക്കമാണിത്. എന്നാൽ തെക്കൻ അർദ്ധഗോളത്തിൽ ഇത് വസന്തകാലത്തിന്റെ (Spring Season) തുടക്കമാണ്.

സൂര്യൻ കൃത്യം കിഴക്ക് ഉദിക്കും: വർഷത്തിൽ രണ്ട് ദിവസങ്ങളിൽ മാത്രമാണ് (മാർച്ചിലെയും സെപ്റ്റംബറിലെയും വിഷുവങ്ങൾ) സൂര്യൻ കൃത്യമായി 90 ഡിഗ്രി കിഴക്ക് ഉദിച്ച് കൃത്യം പടിഞ്ഞാറ് അസ്തമിക്കുന്നത്.

പകലിന്റെ ദൈർഘ്യം കുറയുന്നു: ഇന്നത്തെ ദിവസത്തിന് ശേഷം വടക്കൻ അർദ്ധഗോളത്തിൽ പകലിന്റെ ദൈർഘ്യം കുറഞ്ഞു വരികയും രാത്രിയുടെ ദൈർഘ്യം കൂടുകയും ചെയ്യും. ഡിസംബർ 21-ലെ ശീതകാല അയനാന്തം (Winter Solstice) വരെ ഇത് തുടരും.
വർഷത്തിൽ രണ്ടുതവണയാണ് ഇത്തരത്തിൽ രാപ്പകൽ സമദിനങ്ങൾ ഉണ്ടാകുന്നത്. ആദ്യത്തേത് മാർച്ച് 21-ന് (Vernal/Spring Equinox) അഥവാ മോഷാദി വിഷുവം. രണ്ടാമത്തേതാണ് സെപ്റ്റംബർ 23-ന് നടക്കുന്ന താലാദി വിഷുവം.

കാലാവസ്ഥാ മാറ്റങ്ങൾക്കും സൂര്യന്റെ ദക്ഷിണായന പ്രയാണത്തിനും അടിവരയിടുന്ന ഈ ദിനം പ്രകൃതിസ്‌നേഹികൾക്കും ജ്യോതിശാസ്ത്രജ്ഞർക്കും ഒരുപോലെ ആഘോഷ നിമിഷമാണ്.

English Summary : Autumnal Equinox Today: Earth Experiences Equal Day and Night as Autumn Begins. Today marks the Autumnal Equinox, a natural phenomenon where day and night are of roughly equal length across the globe.