കേരളത്തിൽ അഞ്ച് ദിവസം മഴ ; ഇന്ന് 4 ജില്ലകളിൽ ഓറഞ്ച് അലർട്ട്, ജാഗ്രത ശക്തമാക്കണം

കേരളത്തിൽ അടുത്ത അഞ്ച് ദിവസവും മഴ ശക്തമായി തുടരാൻ സാധ്യതയെന്ന് കേന്ദ്ര കാലാവസ്ഥ വകുപ്പ്. ഒറ്റപ്പെട്ടയിടങ്ങളിൽ അതിശക്തമായ മഴയ്ക്കും ഇടിമിന്നലിനും സാധ്യതയുള്ളതിനാൽ വിവിധ ജില്ലകളിൽ ഓറഞ്ച്, മഞ്ഞ അലർട്ടുകൾ പ്രഖ്യാപിച്ചു. മലയോര മേഖലകളിൽ ഉരുൾപൊട്ടൽ, മണ്ണിടിച്ചിൽ, മലവെള്ളപ്പാച്ചിൽ എന്നിവയ്ക്കുള്ള സാധ്യത കണക്കിലെടുത്ത് പൊതുജനങ്ങൾ ജാഗ്രത പാലിക്കണമെന്ന് സംസ്ഥാന ദുരന്ത നിവാരണ അതോറിറ്റി നിർദേശിച്ചു.

ഒക്ടോബർ 22 മുതൽ 26 വരെയുള്ള ദിവസങ്ങളിലാണ് വിവിധ ജില്ലകളിൽ മഴ മുന്നറിയിപ്പുള്ളത്. ഇന്ന് (ഒക്ടോബർ 22) മലപ്പുറം, കോഴിക്കോട്, വയനാട്, കണ്ണൂർ ജില്ലകളിൽ ഓറഞ്ച് അലർട്ടാണ്. തിരുവനന്തപുരം മുതൽ കാസർഗോഡ് വരെയുള്ള മറ്റ് പത്ത് ജില്ലകളിൽ മഞ്ഞ അലർട്ടും പ്രഖ്യാപിച്ചിട്ടുണ്ട്.

ഒക്ടോബർ 23ന് ഒൻപത് ജില്ലകളിലാണ് ഓറഞ്ച് അലർട്ട്. തിരുവനന്തപുരം, കൊല്ലം, പത്തനംതിട്ട, കോട്ടയം, ഇടുക്കി, കോഴിക്കോട്, വയനാട്, കണ്ണൂർ, കാസർഗോഡ് ജില്ലകളിലാണ് മുന്നറിയിപ്പ്. ആലപ്പുഴ, എറണാകുളം, തൃശ്ശൂർ, പാലക്കാട്, മലപ്പുറം ജില്ലകളിൽ മഞ്ഞ അലർട്ടും നിലവിലുണ്ട്.

ഒക്ടോബർ 24ന് പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട് ജില്ലകളിലാണ് ഓറഞ്ച് അലർട്ട്. തിരുവനന്തപുരം, കൊല്ലം, കണ്ണൂർ, കാസർഗോഡ് ജില്ലകളിൽ മഞ്ഞ അലർട്ടാണ്.

ഒക്ടോബർ 25ന് പത്തനംതിട്ട, കോട്ടയം, ഇടുക്കി, എറണാകുളം, തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർഗോഡ് ജില്ലകളിൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്. തിരുവനന്തപുരം, കൊല്ലം, ആലപ്പുഴ ജില്ലകളിൽ മഞ്ഞ അലർട്ടും തുടരും.

ഒക്ടോബർ 26ന് സംസ്ഥാനത്തെ 14 ജില്ലകളിലും മഞ്ഞ അലർട്ടാണ് പ്രഖ്യാപിച്ചിരിക്കുന്നത്. അന്നും ഒറ്റപ്പെട്ടയിടങ്ങളിൽ ശക്തമായ മഴയ്ക്ക് സാധ്യതയുണ്ടെന്നാണ് കാലാവസ്ഥാ വകുപ്പിന്റെ മുന്നറിയിപ്പ്.

ഓറഞ്ച് അലർട്ട് പ്രഖ്യാപിച്ച ജില്ലകളിൽ ഒറ്റപ്പെട്ടയിടങ്ങളിൽ അതിശക്തമായ മഴയ്ക്ക് സാധ്യതയുണ്ട്. മഴയ്ക്കൊപ്പം ഇടിമിന്നലിനും സാധ്യതയുണ്ട്. മഞ്ഞ അലർട്ട് പ്രഖ്യാപിച്ച ജില്ലകളിൽ ഒറ്റപ്പെട്ടയിടങ്ങളിൽ ശക്തമായ മഴയാണ് പ്രതീക്ഷിക്കുന്നത്.

മലയോര മേഖലകളിൽ പ്രത്യേക ജാഗ്രത

മഴ ശക്തമാകുന്ന സാഹചര്യത്തിൽ ഉരുൾപൊട്ടൽ, മണ്ണിടിച്ചിൽ, മലവെള്ളപ്പാച്ചിൽ എന്നിവയ്ക്ക് സാധ്യതയുള്ള പ്രദേശങ്ങളിൽ താമസിക്കുന്നവർ അധികൃതരുടെ നിർദേശങ്ങൾ കർശനമായി പാലിക്കണം. അപകടസാധ്യതയുള്ള പ്രദേശങ്ങളിൽനിന്ന് മാറിത്താമസിക്കാൻ നിർദേശമുണ്ടായാൽ സുരക്ഷിതമായ സ്ഥലങ്ങളിലേക്ക് മാറണം.

ദുരന്തസാധ്യതയുള്ള മേഖലകളിൽ താമസിക്കുന്നവർ തങ്ങളുടെ പ്രദേശത്ത് ദുരിതാശ്വാസ ക്യാമ്പുകൾ തുറന്നിട്ടുണ്ടോ എന്ന് മുൻകൂട്ടി മനസ്സിലാക്കണം. ആവശ്യമെങ്കിൽ പകൽ സമയത്തുതന്നെ സുരക്ഷിതമായ സ്ഥലങ്ങളിലേക്ക് മാറണം. ഇതിനായി തദ്ദേശസ്ഥാപനങ്ങളിലെയും റവന്യൂ വകുപ്പിലെയും ഉദ്യോഗസ്ഥരുടെ സഹായം തേടാം.

നദീതീരങ്ങളിലും അണക്കെട്ടുകളുടെ താഴ്ഭാഗങ്ങളിലും താമസിക്കുന്നവരും ജാഗ്രത പാലിക്കണം. ജലനിരപ്പ് ഉയരുകയോ ഒഴുക്ക് ശക്തമാകുകയോ ചെയ്യുന്ന സാഹചര്യങ്ങളിൽ അപകടസാധ്യത അവഗണിക്കരുത്.

ശക്തമായ കാറ്റിനും മുന്നൊരുക്കം വേണം

ശക്തമായ കാറ്റിന് സാധ്യതയുള്ളതിനാൽ ഉറപ്പില്ലാത്ത വീടുകളിലും ദുർബലമായ മേൽക്കൂരകളുള്ള വീടുകളിലും താമസിക്കുന്നവർ പ്രത്യേക ജാഗ്രത പാലിക്കണം. അപകടാവസ്ഥയിലുള്ള മരങ്ങൾ, വൈദ്യുതത്തൂണുകൾ, പരസ്യബോർഡുകൾ, മതിലുകൾ എന്നിവ ശ്രദ്ധയിൽപ്പെട്ടാൽ ബന്ധപ്പെട്ട അധികൃതരെ അറിയിക്കണം. കാറ്റിൽ മരങ്ങൾ കടപുഴകിവീഴാനും പോസ്റ്റുകൾ തകർന്നുവീഴാനും സാധ്യതയുള്ളതിനാൽ ഇവയ്ക്ക് സമീപം നിൽക്കുന്നത് ഒഴിവാക്കണം.

മഴ മുന്നറിയിപ്പുള്ള ദിവസങ്ങളിൽ അടിയന്തര ആവശ്യങ്ങൾക്കല്ലാത്ത യാത്രകൾ പരമാവധി ഒഴിവാക്കണം. വെള്ളച്ചാട്ടങ്ങൾ, ജലാശയങ്ങൾ, മലയോര പ്രദേശങ്ങൾ എന്നിവിടങ്ങളിലേക്കുള്ള വിനോദയാത്രകൾ മുന്നറിയിപ്പ് മാറുന്നതുവരെ ഒഴിവാക്കണമെന്നും നിർദേശമുണ്ട്.

നദികളിലും ജലാശയങ്ങളിലും ഇറങ്ങരുത്

ശക്തമായ മഴ പെയ്യുമ്പോൾ നദികൾ മുറിച്ചുകടക്കാനോ നദികളിലും മറ്റ് ജലാശയങ്ങളിലും കുളിക്കാനോ മീൻപിടിക്കാനോ മറ്റ് ആവശ്യങ്ങൾക്കായി ഇറങ്ങാനോ പാടില്ല. ജലാശയങ്ങൾക്ക് മുകളിലുള്ള പാലങ്ങളിൽ കയറി കാഴ്ച കാണുക, സെൽഫിയെടുക്കുക, ചിത്രങ്ങൾ പകർത്തുക തുടങ്ങിയവയും ഒഴിവാക്കണം.

ജലാശയങ്ങളോട് ചേർന്ന റോഡുകളിലൂടെയും അറ്റകുറ്റപ്പണികൾ നടക്കുന്ന റോഡുകളിലൂടെയും യാത്ര ചെയ്യുമ്പോൾ പ്രത്യേക ജാഗ്രത വേണം. വെള്ളം കയറിയ റോഡുകളിലൂടെയോ കരകവിഞ്ഞൊഴുകുന്ന ജലാശയങ്ങളിലൂടെയോ വാഹനം ഓടിക്കാൻ ശ്രമിക്കരുത്. ശക്തമായ മഴയിൽ റോഡുകളിലെ കാഴ്ചപരിധി കുറയാനും അപകടസാധ്യത വർധിക്കാനും ഇടയുണ്ട്.

English Summary : The Indian Meteorological Department (IMD) has issued a five-day heavy rainfall warning across Kerala from October 22 to 26, prompting the State Disaster Management Authority to sound an orange alert in up to 11 districts due to the threat of isolated torrential downpours, thunderstorms, and potential landslides in hilly regions.