സൗദിയിൽ തണുപ്പുകാലത്തിന് തുടക്കം; ആറു മേഖലകളിൽ ശക്തമായ മഴ

സൗദി അറേബ്യയിൽ തണുപ്പുകാലത്തിന് തുടക്കമായതോടെ രാജ്യത്തിന്റെ വിവിധ മേഖലകളിൽ കാലാവസ്ഥയിൽ പ്രകടമായ മാറ്റം. കഴിഞ്ഞ ദിവസങ്ങളിൽ ആറു മേഖലകളിൽ മികച്ച മഴ ലഭിച്ചതായി ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. റിയാദ് മേഖലയിലെ അൽ മജ്മഅയിലാണ് ഏറ്റവും ഉയർന്ന മഴ രേഖപ്പെടുത്തിയത്. ഇവിടെ 73.4 മില്ലിമീറ്റർ മഴയാണ് ലഭിച്ചത്.

അൽ ദവാദ്മി വിമാനത്താവളത്തിൽ 69.6 മില്ലിമീറ്ററും അൽ ജുറുമിലെ കിങ് അബ്ദുൽ അസീസ് റോയൽ റിസർവിൽ 60.2 മില്ലിമീറ്ററും മഴ രേഖപ്പെടുത്തി. ഷഖ്‌റയിൽ 33.8 മില്ലിമീറ്ററും ഇമാം അബ്ദുൽ അസീസ് ബിൻ മുഹമ്മദ് റോയൽ റിസർവിൽ 14.2 മില്ലിമീറ്ററും അൽ ഖുവയ്യിയയിലെ ഹൽബാനിൽ 13.2 മില്ലിമീറ്ററും അൽ തുമാമ വിമാനത്താവളത്തിൽ 11.4 മില്ലിമീറ്ററും മഴ ലഭിച്ചു.

അൽ ഖസീം മേഖലയിലെ ഖിബയിലെ അൽ സാഹിയയിൽ 33.2 മില്ലിമീറ്ററും അൽ റാസിലെ ദഖ്‌നയിൽ 28.4 മില്ലിമീറ്ററും ബുറൈദയിൽ 25.6 മില്ലിമീറ്ററും ഉനൈസയിൽ 22.6 മില്ലിമീറ്ററും മഴ രേഖപ്പെടുത്തി. കിഴക്കൻ പ്രവിശ്യയിലെ ഹഫർ അൽ ബാത്തിനിലും ജുബൈലിലും വിവിധ നിരീക്ഷണ കേന്ദ്രങ്ങളിൽ 12 മുതൽ 24 മില്ലിമീറ്റർ വരെ മഴ ലഭിച്ചു.

താപനില ഗണ്യമായി കുറയാൻ സാധ്യത

മക്ക മേഖലയിൽ അൽ നൂരിയയിൽ 28.8 മില്ലിമീറ്ററും മദീന മേഖലയിലെ അൽ ഹനകിയ്യയിൽ 28.6 മില്ലിമീറ്ററും മഴ രേഖപ്പെടുത്തി. അൽ ഉംറയിൽ 7.6 മില്ലിമീറ്ററും അൽ റുസൈഫയിൽ 7.3 മില്ലിമീറ്ററുമാണ് മഴ ലഭിച്ചത്. ഹാഇലിലെ അൽ മദൈൻ പ്രദേശത്തും 8.1 മില്ലിമീറ്റർ മഴ രേഖപ്പെടുത്തിയതായി കാലാവസ്ഥാ കേന്ദ്രം വ്യക്തമാക്കി.

അതേസമയം, വരും ദിവസങ്ങളിൽ സൗദിയുടെ വിവിധ മേഖലകളിൽ താപനില ഗണ്യമായി കുറയാൻ സാധ്യതയുണ്ടെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ചില പ്രദേശങ്ങളിൽ തണുത്ത കാലാവസ്ഥയും ഭാഗികമായോ പൂർണമായോ മേഘാവൃതമായ അന്തരീക്ഷവും തുടർന്നേക്കും. തണുപ്പുകാലത്തിന്റെ വരവോടെ രാജ്യത്തിന്റെ വിവിധ ഭാഗങ്ങളിൽ കാലാവസ്ഥയിൽ കൂടുതൽ മാറ്റങ്ങളുണ്ടാകുമെന്നാണ് വിലയിരുത്തൽ.

English Summary : Winter weather has officially arrived in Saudi Arabia, bringing widespread rainfall across six major regions and signaling a significant drop in temperatures in the coming days, according to the National Center for Meteorology (NCM).