സംസ്ഥാനത്ത് ഇന്ന് ഇടിയോട് കൂടി അതി ശക്തമായ മഴയാണ് പെയ്തത്. അര മണിക്കൂറോളമാണ് ശക്തമായ മഴയും കാറ്റും നീണ്ടു നിന്നത്. കിഴക്കന്‍ മേഖലയിലും മധ്യ,തെക്കന്‍ ജില്ലകളിലും മഴ തകൃതിയായി പെയ്തു.

കോഴിക്കോട് ജില്ലയിലെ കുന്നമംഗലത്ത് ഇന്ന് വൈകിട്ട് ലഘു മേഘവിസ്‌ഫോടനം ഉണ്ടായി. കുന്ദമംഗലത്ത് ഇന്ന് അര മണിക്കൂറില്‍ 5 സെ.മി മഴ രേഖപ്പെടുത്തി. ലഘു മേഘവിസ്‌ഫോടനമായി (Mini cloudburst) ഇത് കണക്കാക്കാം. ഒരു മണിക്കൂര്‍ ഒരു പ്രദേശത്ത് 5 സെ.മി മഴ ലഭിച്ചാല്‍ ലഘു മേഘവിസ്‌ഫോടനവും 10 സെ.മി മഴ ലഭിച്ചാല്‍ മേഘവിസ്‌ഫോടനവുമായാണ് (cloudburst ) കണക്കാക്കുന്നത്.

ഇന്ന് വൈകിട്ട് കോഴിക്കോട് പെയ്ത മേഘം

കേന്ദ്ര കാലാവസ്ഥ വകുപ്പിന്റെ അടുത്ത 5 ദിവസത്തേക്കുള്ള മഴ സാധ്യത പ്രവചനം പ്രകാരം വിവിധ ജില്ലകളിൽ കേന്ദ്ര കാലാവസ്ഥ വകുപ്പ് മഞ്ഞ അലർട്ട് പ്രഖ്യാപിച്ചിരിക്കുന്നു. അതേസമയം, നാളെ ആൻഡമാൻ കടൽ, തെക്കൻ തമിഴ്‌നാട് തീരം, ഗൾഫ് ഓഫ് മന്നാർ, അതിനോട് ചേർന്ന കന്യാകുമാരി പ്രദേശം എന്നിവിടങ്ങളിൽ മണിക്കൂറിൽ 35 മുതൽ 45 കിലോമീറ്റർ വരെയും ചില അവസരങ്ങളിൽ 55 കിലോമീറ്റർ വരെയും വേഗതയിൽ ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ട്.

ഇന്ന് വൈകിട്ട് കോഴിക്കോട്ട് ഉണ്ടായ ഇടിമിന്നൽ

അടുത്ത 3 മണിക്കൂറിൽ സന്നിധാനം, പമ്പ, നിലയ്ക്കൽ എന്നിവിടങ്ങളിൽ ഇടിമിന്നലോടു കൂടിയ നേരിയ/ഇടത്തരം മഴയ്ക്കും മണിക്കൂറിൽ 40 കിലോമീറ്റർ വരെ വേഗതയിൽ ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. കടലാക്രമണത്തിന് സാധ്യതയുള്ളതിനാൽ മത്സ്യത്തൊഴിലാളികളും തീരദേശവാസികളും ജാഗ്രത പാലിയ്ക്കുക.

കള്ളക്കടൽ പ്രതിഭാസത്തിനും ഉയർന്ന തിരമാലക്കും സാധ്യതയുള്ള ഘട്ടത്തിൽ കടലിലേക്ക് മത്സ്യബന്ധന യാനങ്ങൾ ഇറക്കുന്നത് പോലെ തന്നെ അപകടകരമാണ് കരയ്ക്കടുപ്പിക്കുന്നതും. ആയതിനാൽ തിരമാല ശക്തിപ്പെടുന്ന ഘട്ടത്തിൽ കടലിലേക്ക് ഇറക്കുന്നതും കരയ്ക്കടുപ്പിക്കുന്നതും ഒഴിവാക്കേണ്ടതാണ്. മാത്രമല്ല ബീച്ചിലേക്കുള്ള യാത്രകളും കടലിൽ ഇറങ്ങിയുള്ള വിനോദങ്ങളും പൂർണമായും ഒഴിവാക്കുക.

തെക്ക് പടിഞ്ഞാറൻ ബംഗാൾ ഉൾക്കടലിൽ ശ്രീലങ്കയ്ക്ക് സമീപം ന്യൂനമർദം രൂപപെട്ടിട്ടുണ്ട്.തെക്ക് കിഴക്കൻ അറബിക്കടലിൽ തെക്കൻ കേരള തീരത്തിന് സമീപമായി ചക്രവാതച്ചുഴിയും നിലനിൽക്കുന്നു. ഇതിന്റെ ഫലമായി കേരളത്തിൽ അടുത്ത 5 ദിവസം ഇടിമിന്നലോട് കൂടിയ നേരിയ/ഇടത്തരം മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് പറയുന്നു.

English Summary: A low-pressure system has formed near Sri Lanka, while a cyclone persists off Kerala's coast. Expect thunderstorms and moderate rain in Kerala over the next 5 days.