മലേഷ്യയിൽ മിന്നൽ പ്രളയം; നിരവധി മേഖലകൾ വെള്ളത്തിനടിയിൽ

മലേഷ്യയിലെ സെലങ്കോറിൽ കനത്ത മഴയെ തുടർന്നുണ്ടായ മിന്നൽ പ്രളയത്തിൽ നിരവധി പ്രദേശങ്ങൾ വെള്ളത്തിനടിയിലായി. സെക്ഷൻ 25ലെ പ്രളയസാധ്യത കൂടുതലുള്ള താമാൻ ശ്രീ മുഡയിലാണ് വീണ്ടും വെള്ളം കയറിയത്. സെക്ഷൻ 26ലെ കംപുങ് ബാരു ഹികോമിനെയും വെള്ളപ്പൊക്കം ബാധിച്ചു.

ഇന്ന് ഉച്ചകഴിഞ്ഞ് മൂന്ന് മുതൽ അഞ്ച് വരെ പെയ്ത കനത്ത മഴയ്ക്ക് പിന്നാലെ താമാൻ ശ്രീ മുഡയിലെയും ക്ലാങിലെ ബുക്കിറ്റ് ടിംഗിയിലെ ഒരു ഷോപ്പിങ് മാളിലെയും വെള്ളപ്പൊക്ക ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചിരുന്നു.

ശക്തമായ മഴയെ തുടർന്ന് പലയിടങ്ങളിലും വെള്ളം ഉയർന്ന് റോഡുകളിലേക്ക് ഒഴുകിയെത്തി. ഓടകൾ കരകവിഞ്ഞതാണ് വെള്ളക്കെട്ടിന് കാരണമായത്. എന്നാൽ ഇതുവരെ ആളുകളെ ഒഴിപ്പിക്കേണ്ട സാഹചര്യമുണ്ടായിട്ടില്ല.

വൈകുന്നേരത്തോടെ മഴയ്ക്ക് ശമനമുണ്ടായെങ്കിലും ആകാശം മേഘാവൃതമായി തുടരുകയാണ്. സെക്ഷൻ 22ലെ ജലാൻ കെബുൻ ബുംഗ, സെക്ഷൻ 13, ജലാൻ കെബുൻ തുടങ്ങിയ പ്രളയസാധ്യതയുള്ള മേഖലകളിലും അധികൃതർ നിരീക്ഷണം തുടരുന്നുണ്ട്.

English Summary : Torrential rainfall triggered sudden flash floods across multiple regions in Selangor, Malaysia, causing severe waterlogging and disrupting traffic.