ന്യൂനമർദ്ദങ്ങൾ ശക്തിപ്രാപിക്കുന്നു; തമിഴ്നാട്ടിൽ അതിശക്തമായ മഴ, കൊടൈക്കനാലിൽ മണ്ണിടിച്ചിൽ

തമിഴ്നാട്ടിൽ അതിശക്തമായ മഴയിൽ കൊടൈക്കനാലിലും മേട്ടുപ്പാളയം–ഊട്ടി പാതയിലും മണ്ണിടിച്ചിൽ. കൊടൈക്കനാൽ സെമ്പകനൂർ മേഖലയിൽ ഉണ്ടായ മണ്ണിടിച്ചിലിൽ രണ്ട് വൈദ്യുതി തൂണുകൾ തകരുകയും റോഡുകളിൽ വലിയ വിള്ളലുകൾ രൂപപ്പെടുകയും ചെയ്തു. ഇതോടെ പ്രദേശത്തെ ഗതാഗതം തടസ്സപ്പെട്ടു. സുരക്ഷാ മുൻകരുതലിന്റെ ഭാഗമായി കൊടൈക്കനാലിലേക്കുള്ള വാഹന ഗതാഗതത്തിനും വിനോദസഞ്ചാരത്തിനും സർക്കാർ വിലക്കേർപ്പെടുത്തി.

മേട്ടുപ്പാളയം–ഊട്ടി പാതയിലെ പാർലിയാർ മേഖലയിൽ ബസിന് മുകളിലേക്ക് മണ്ണിടിഞ്ഞുവീണു. അപകടസമയത്ത് ബസിലുണ്ടായിരുന്ന യാത്രക്കാരെ സുരക്ഷിതമായി രക്ഷപ്പെടുത്തി. മണ്ണിടിച്ചിലിനെത്തുടർന്ന് പാതയിൽ ഗതാഗതം തടസ്സപ്പെട്ടതോടെ കോയമ്പത്തൂർ, നീലഗിരി ജില്ലകളിലേക്കുള്ള യാത്രയും പ്രതിസന്ധിയിലായി. ഡിണ്ടിഗൽ, തിരുച്ചിറപ്പള്ളി, കോയമ്പത്തൂർ ഉൾപ്പെടെ തമിഴ്നാട്ടിലെ പത്ത് ജില്ലകളിൽ ശക്തമായ മഴ മുന്നറിയിപ്പും നൽകിയിട്ടുണ്ട്.

Kerala Weather : അറബിക്കടലിൽ ന്യൂനമർദം; ബംഗാൾ ഉൾക്കടലിൽ ചുഴലിക്കാറ്റ് ഭീഷണി, കേരളത്തിൽ മഴ കനക്കും
അറബിക്കടലിലും ബംഗാൾ ഉൾക്കടലിലും ന്യൂനമർദങ്ങൾ രൂപപ്പെട്ടതോടെ കേരളത്തിൽ മഴ ശക്തമാകാൻ സാധ്യത.
https://metbeatnews.com/dual-weather-systems-trigger-heavy-rain-warning-across-kerala

കേരളത്തിലും അതിശക്തമായ മഴ തുടരുമെന്നാണ് കാലാവസ്ഥാ വകുപ്പിന്റെ മുന്നറിയിപ്പ്. ഇന്ന് സംസ്ഥാനത്തെ 14 ജില്ലകളിലും മഴ മുന്നറിയിപ്പുണ്ട്. നാളെയും വ്യാപക മഴ തുടരുമെന്നാണ് പ്രവചനം.

അറബിക്കടലിൽ കേരള തീരത്തോട് ചേർന്ന് ന്യൂനമർദം നിലനിൽക്കുന്നുണ്ട്. ബംഗാൾ ഉൾക്കടലിൽ ഇന്നലെ രൂപപ്പെട്ട ന്യൂനമർദം ഇന്ന് തീവ്ര ന്യൂനമർദമായി ശക്തിപ്രാപിക്കുമെന്നും കാലാവസ്ഥാ വകുപ്പ് മുന്നറിയിപ്പ് നൽകിയിട്ടുണ്ട്. ഈ രണ്ട് കാലാവസ്ഥാ സംവിധാനങ്ങളുടെയും സ്വാധീനഫലമായാണ് കേരളത്തിൽ മഴ തുടരുന്നത്.

ബംഗാൾ ഉൾക്കടലിൽ ചുഴലിക്കാറ്റ് സാധ്യത

ബംഗാൾ ഉൾക്കടലിൽ രൂപപ്പെടുന്ന ന്യൂനമർദം കൂടുതൽ ശക്തിപ്രാപിച്ച് ചുഴലിക്കാറ്റായി മാറാനും ആന്ധ്രാപ്രദേശ്, ഒഡീഷ തീരങ്ങളിലേക്ക് നീങ്ങാനും സാധ്യതയുണ്ടെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. കേരളത്തിലും തമിഴ്നാട്ടിലും മഴ ശക്തമായി തുടരുന്ന സാഹചര്യത്തിൽ ജാഗ്രത പാലിക്കേണ്ടതുണ്ട്.

English Summary : Heavy rain triggers landslides in Kodaikanal and the Mettupalayam–Ooty route. Kodaikanal entry banned for tourists as depression deepens over the Bay of Bengal.