ബഹ്റൈനിൽ മഴക്കാല മുന്നൊരുക്കങ്ങൾ ശക്തമാക്കി; വെള്ളക്കെട്ട് ഒഴിവാക്കാനായി 63 വാട്ടർ പമ്പുകളും 31 ടാങ്കറുകളും

മഴക്കാലത്ത് വെള്ളക്കെട്ട് ഒഴിവാക്കുന്നതിനും അടിയന്തര സാഹചര്യങ്ങൾ നേരിടുന്നതിനുമായി ബഹ്റൈനിൽ ഉന്നതതല യോഗം ചേർന്നു. ആവശ്യമായ മുൻകരുതലുകൾ സ്വീകരിക്കുക, അടിസ്ഥാന സൗകര്യങ്ങൾ സജ്ജമാക്കുക, വിവിധ വകുപ്പുകളുടെ പ്രവർത്തനങ്ങൾ ഏകോപിപ്പിക്കുക എന്നിവ ലക്ഷ്യമിട്ടായിരുന്നു യോഗം.

മുനിസിപ്പൽ കാര്യ-കാർഷിക മന്ത്രി വഈൽ അൽ മുബാറക്കിന്റെ ഓഫീസിൽ ചേർന്ന യോഗത്തിൽ പൊതുമരാമത്ത് മന്ത്രി ഇബ്രാഹിം അൽ ഹവാജും നാല് ഗവർണറേറ്റുകളിലെയും മുനിസിപ്പൽ കൗൺസിൽ അധ്യക്ഷന്മാരും പങ്കെടുത്തു.

രാജ്യത്തെ നാല് ഗവർണറേറ്റുകളിലായി മഴവെള്ളം കെട്ടിക്കിടക്കാൻ സാധ്യതയുള്ള 565 സ്ഥലങ്ങളാണ് അധികൃതർ അടയാളപ്പെടുത്തിയിരിക്കുന്നത്. ഇതിൽ കൂടുതൽ ശ്രദ്ധ ആവശ്യമായ 221 പ്രധാന കേന്ദ്രങ്ങളിലെ പ്രശ്നങ്ങൾ പരിഹരിക്കുന്നതിന് പ്രത്യേക മുൻഗണന നൽകും.

ദക്ഷിണ മുനിസിപ്പൽ കൗൺസിൽ ചെയർമാൻ അബ്ദുല്ല അബ്ദുല്ലത്തീഫ് തന്റെ ഗവർണറേറ്റിൽ ആവശ്യമായ മുൻകരുതലുകൾ സ്വീകരിച്ചിട്ടുണ്ടെന്ന് യോഗത്തിൽ അറിയിച്ചു. മഹസൂറ അവന്യൂവിൽ അടിയന്തര ഓപ്പറേഷൻ റൂം ആരംഭിക്കാനും പദ്ധതിയുണ്ട്. വെള്ളക്കെട്ട് ഒഴിവാക്കുന്നതിനായി 63 വാട്ടർ പമ്പുകളും 31 ടാങ്കറുകളും സജ്ജമാക്കിയിട്ടുണ്ട്.

ബോധവൽക്കരണ ക്യാമ്പയിൻ

ഗവർണറേറ്റിലെ 110 കേന്ദ്രങ്ങളിൽ വെള്ളക്കെട്ട് നേരിടാൻ അടിയന്തര അറ്റകുറ്റപ്പണി സംഘങ്ങളെ സജ്ജമാക്കും. ഈ കേന്ദ്രങ്ങളിൽ പതിവായി പരിശോധന നടത്തുകയും ആവശ്യമായ നടപടികൾ സ്വീകരിക്കുകയും ചെയ്യും. ഇതിൽ 25 കേന്ദ്രങ്ങളിൽ സ്ഥിതി കൂടുതൽ ഗുരുതരമാണെന്നും അദ്ദേഹം വ്യക്തമാക്കി.

മഴക്കാലത്ത് പൊതുജനങ്ങൾ സ്വീകരിക്കേണ്ട മുൻകരുതലുകളെക്കുറിച്ച് ബോധവൽക്കരണ ക്യാമ്പയിൻ നടത്താനും നിർദേശമുണ്ട്. മഴ പെയ്യുന്ന സമയത്ത് മാൻഹോൾ മൂടികൾ ഒരു കാരണവശാലും തുറക്കരുതെന്ന് അധികൃതർ മുന്നറിയിപ്പ് നൽകി.

അതേസമയം മഴവെള്ളം തടസ്സമില്ലാതെ ഒഴുകിപ്പോകുന്നത് ഉറപ്പാക്കാൻ വിവിധ സർക്കാർ വകുപ്പുകൾ തമ്മിലുള്ള ഏകോപനം ശക്തമാക്കണമെന്നും യോഗം വിലയിരുത്തി.

English Summary : Bahrain has stepped up its flood prevention measures ahead of the rainy season following a high-level coordination meeting chaired by Minister of Municipalities Affairs and Agriculture, Wael Al Mubarak, and Minister of Works, Ibrahim Al Hawaj, alongside municipal leaders from all four governorates.