അപൂർവ നെൽവിത്തുകളുടെ കാവൽക്കാരൻ ചെറുവയൽ രാമൻ അന്തരിച്ചു

അപൂർവ പരമ്പരാഗത നെൽവിത്തുകളുടെ സംരക്ഷകനും നാടൻ നെൽവിത്തുകളുടെ ജീവൻ ബാങ്കെന്ന് അറിയപ്പെട്ടിരുന്ന പത്മശ്രീ ചെറുവയൽ രാമൻ അന്തരിച്ചു. വയനാട് മാനന്തവാടി കമ്മന സ്വദേശിയായ തളക്കര ചെറിയ രാമൻ എന്ന ചെറുവയൽ രാമൻ, തനത് നെൽവിത്തുകളുടെ സംരക്ഷണത്തിനും പരമ്പരാഗത കൃഷിരീതികളുടെ പരിപാലനത്തിനും ജീവിതം സമർപ്പിച്ച കർഷകനായിരുന്നു.

രാജ്യം പത്മശ്രീ നൽകി ആദരിച്ചു

ആദിവാസി വിഭാഗത്തിൽപ്പെട്ട കർഷകനായ ചെറുവയൽ രാമൻ, അപൂർവമായ നാടൻ നെൽവിത്തുകൾ കൃഷിയിലൂടെ സംരക്ഷിച്ചാണ് ശ്രദ്ധേയനായത്. പാരമ്പര്യ നെൽവിത്തുകളുടെ സംരക്ഷണത്തിനും തനത് കാർഷിക രീതികൾ നിലനിർത്തുന്നതിനും നൽകിയ നിസ്വാർഥ സേവനങ്ങൾ പരിഗണിച്ചാണ് രാജ്യം പത്മശ്രീ നൽകി ആദരിച്ചത്.

വിദ്യാർഥികൾക്കും ഗവേഷകർക്കും വഴികാട്ടിയായി

പത്താം വയസ്സിൽ ആരംഭിച്ച കാർഷിക ജീവിതം അവസാന നാളുകൾ വരെയും അദ്ദേഹം തുടർന്നു. പരമ്പരാഗത നെൽകൃഷിയെക്കുറിച്ച് പഠിക്കാനെത്തിയ നിരവധി വിദ്യാർഥികൾക്കും ഗവേഷകർക്കും അദ്ദേഹത്തിന്റെ ജീവിതവും പ്രവർത്തനങ്ങളും വഴികാട്ടിയായി. മണ്ണിനെയും വിത്തിനെയും പ്രകൃതിയെയും ഒരുപോലെ സ്നേഹിച്ച ചെറുവയൽ രാമന്റെ വിയോഗം പരമ്പരാഗത കൃഷിരംഗത്തിനും വിത്ത് സംരക്ഷണ മേഖലയ്ക്കും വലിയ നഷ്ടമാണ്.

അപൂർവ നെൽവിത്തുകളെ വരുംതലമുറകൾക്കായി കാത്തുസൂക്ഷിച്ച ഈ കർഷകന്റെ ഓർമകൾ പ്രകൃതിസംരക്ഷണത്തിന്റെയും കാർഷിക പൈതൃകത്തിന്റെയും ചരിത്രത്തിൽ എന്നും നിലനിൽക്കും. ചെറുവയൽ രാമന്റെ നിര്യാണത്തിൽ അനുശോചനങ്ങളും ആദരാഞ്ജലികളും അർപ്പിച്ച് നിരവധി പേർ രംഗത്തെത്തി.

ചെറുവയല്‍ രാമന്റെ വിയോഗത്തില്‍ മുഖ്യമന്ത്രി അനുശോചിച്ചു

വയനാടിന്റെ മണ്ണില്‍ തലമുറകളുടെ ഓര്‍മ്മകള്‍ക്ക് കാവല്‍ നിന്ന കര്‍ഷകനായിരുന്നു ചെറുവയല്‍ രാമന്‍. അന്യംനിന്നു പോയേക്കാമായിരുന്ന പാരമ്പര്യ നെല്‍ വിത്തിനങ്ങളെ സ്വന്തം ജീവിതത്തിന്റെ ഭാഗമാക്കി, വരും തലമുറയ്ക്കു കരുതിവച്ച ചെറുവയല്‍ രാമന്‍ യാഥാര്‍ത്ഥത്തില്‍ കാര്‍ഷിക പൈതൃകത്തിന്റെ കാവല്‍ക്കാരനായിരുന്നു.

കൃഷി വെറുമൊരു ഉപജീവനമാര്‍ഗമല്ലെന്നും മണ്ണിനോടും പ്രകൃതിയോടുമുള്ള ഉത്തരവാദിത്തമാണെന്നും സ്വന്തം ജീവിതത്തിലൂടെ അദ്ദേഹം ലോകത്തോട് പറഞ്ഞു. മണ്ണിന്റെ മണവും വിത്തുകളുടെ കരുതലും കൃഷിയുടെ നന്മയും പുതിയ തലമുറയ്ക്ക് പകര്‍ന്നു നല്‍കിയ ആ ജീവിതം എക്കാലവും ഓര്‍മിക്കപ്പെടും.

യു.ഡി.എഫ് സര്‍ക്കാര്‍ അധികാരമേറ്റെടുത്ത ശേഷം ചിങ്ങം ഒന്നിന് പ്രഖ്യാപിച്ച പ്രഥമ ഉമ്മന്‍ചാണ്ടി സ്മാരക കാര്‍ഷിക പുരസ്‌കാരം അദ്ദേഹത്തിന് സമ്മാനിക്കാന്‍ കഴിഞ്ഞത് വലിയ സന്തോഷവും അഭിമാനവുമായിരുന്നു.

ചെറുവയല്‍ രാമന്റെ വിയോഗം കേരളത്തിന്റെ കാര്‍ഷിക മേഖലയ്ക്കും പൈതൃക സംരക്ഷണത്തിനും തീരാനഷ്ടമാണ്. അദ്ദേഹം കാത്തു സൂക്ഷിച്ച ഓരോ വിത്തിലും വരും തലമുറയ്ക്കുള്ള പ്രതീക്ഷയുണ്ട്. ആ പ്രതീക്ഷ മണ്ണില്‍ നിലനിര്‍ത്തുക എന്നതാണ് അദ്ദേഹത്തോടുള്ള ഏറ്റവും വലിയ ആദരവ് എന്ന് മുഖ്യമന്ത്രി അനുശോചിച്ചു.

English Summary : Padma Shri Cheruvayal Raman, the legendary guardian of rare traditional rice seeds and indigenous agriculture from Wayanad, Kerala, has passed away. Dedicating his life to seed conservation, organic farming, and sustainable agriculture, his remarkable legacy as a mentor to students and researchers remains an irreplaceable loss to the agricultural community. Read his inspiring life story, awards, and tributes.