വടക്കൻ കേരളത്തിൽ വിമാനങ്ങൾ താഴ്ന്നു പറക്കും, പേടിക്കേണ്ടതില്ല

വടക്കൻ കേരളത്തിലും കർണാടകയുടെ ചില ഭാഗങ്ങളിലും ഭൂമിക്കടിയിലെ ധാതുനിക്ഷേപ സാധ്യത കണ്ടെത്തുന്നതിനായി ജിയോളജിക്കൽ സർവേ ഓഫ് ഇന്ത്യയുടെ (GSI) നേതൃത്വത്തിലുള്ള എയ്റോ ജിയോഫിസിക്കൽ സർവേ തുടങ്ങി. ഇതിൻ്റെ ഭാഗമായി വടക്കൻ ജില്ലകളിൽ വിമാനങ്ങൾ താഴ്ന്നു പറക്കുന്നത് കണ്ടാൽ പേടിക്കേണ്ടതില്ല.

കണ്ണൂർ വിമാനത്താവളം കേന്ദ്രീകരിച്ച് ആണ് സർവേ നടക്കുന്നത്. തോറിയം, യുറേനിയം, മഗ്നീഷ്യം തുടങ്ങിയ ധാതുക്കളുടെ പര്യവേഷണത്തിനായി പ്രത്യേക സെൻസറുകൾ ഘടിപ്പിച്ച രണ്ട് ചെറുവിമാനങ്ങൾ ഭൂനിരപ്പിൽ നിന്നും 120 മീറ്റർ വരെ ഉയരത്തിൽ പറന്നാണ് വിവരങ്ങൾ ശേഖരിക്കുന്നത്.

കാസർകോട്, കണ്ണൂർ, വയനാട്, കോഴിക്കോട് ജില്ലകളും കർണാടകയിലെ വിവിധ പ്രദേശങ്ങളും ഉൾപ്പെടുന്ന ഈ സർവേ ബെംഗളൂരുവിലെ റിമോട്ട് സെൻസിങ് ആൻഡ് ഏരിയൽ സർവേസ് വിഭാഗമാണ് നിയന്ത്രിക്കുന്നത്. ലഭിക്കുന്ന വിവരങ്ങളുടെ അടിസ്ഥാനത്തിൽ മാപ്പ് തയാറാക്കിയ ശേഷം കൂടുതൽ വിശദമായ ഭൂതല പരിശോധനകളും പര്യവേഷണങ്ങളും നടത്തും.

കഴിഞ്ഞ ദിവസം വി.ടി.എ .എസ്‌ .യു, വി.ടി.ഐ.ഐ.സി എന്നീ രണ്ടു ചെറുവിമാനങ്ങൾ കണ്ണൂർ വിമാനത്താവളത്തിലെത്തിയിരുന്നു. 15 ദിവസത്തേക്കു വിമാനം ഇവിടെ പാർക്ക് ചെയ്യുന്നതിന് അനുമതി നേടിയിട്ടുണ്ട്. ഈമാസം 15 വരെ വിമാനം ഇവിടെ സർവേ നടത്തും. ഭൂനിരപ്പിൽനിന്ന് 80–120 മീറ്റർ വരെ മാത്രം ഉയർന്ന് മണിക്കൂറിൽ 200 കിലോമീറ്റർ വേഗത്തിൽ വിമാനം പറക്കും.

തോറിയം, യുറേനിയം, മഗ്നീഷ്യം തുടങ്ങി വിവിധ ധാതുക്കളുടെ പര്യവേഷണത്തിനു സാധ്യതയുള്ള മേഖലകൾ കണ്ടെത്തുകയാണു ലക്ഷ്യം. വിമാനത്തിൽ ഘടിപ്പിച്ച റേഡിയോ സ്പെക്ട്രോ മെട്രിക് സെൻസറുകൾ ശേഖരിക്കുന്ന കാന്തിക, റേഡിയോ മെട്രിക് വിവരങ്ങളുടെ അടിസ്ഥാനത്തിൽ ധാതുസാധ്യതയുള്ള മേഖലകൾ മാപ്പ് ചെയ്യും.

തുടർന്നു ഭൂതല പരിശോധനയും വിശദ പര്യവേഷണവും നടത്തും. ജിഎസ്ഐയുടെ കീഴിൽ ബെംഗളൂരുവിലുള്ള റിമോട്ട് സെൻസിങ് ആൻഡ് ഏരിയൽ സർവേസ് വിഭാഗമാണ് സർവേക്കു നേതൃത്വം നൽകുന്നത്. പൈലറ്റുമാരും സാങ്കേതിക വിദഗ്ധരും ഉൾപ്പെടെ കണ്ണൂരിലെത്തിയിട്ടുണ്ട്.

കാസർകോട്, കണ്ണൂർ, വയനാട്, കോഴിക്കോട്, കർണാടകയിലെ മടിക്കേരി, ദക്ഷിണ കന്നഡ എന്നീ ജില്ലകൾ ഉൾപ്പെടുന്ന പ്രദേശങ്ങളിലാണ് സർവേ. രാവിലെ 9 മുതൽ വൈകിട്ട് 5.30വരെയാണു സർവേ നടക്കുക. കഴിഞ്ഞവർഷം ഡിസംബറിൽ നടപടികൾക്കായി വിമാനം കണ്ണൂരിലെത്തിയിരുന്നെങ്കിലും പ്രതികൂല കാലാവസ്ഥ കാരണം സർവേ ഉപേക്ഷിക്കുകയായിരുന്നു.

നിലവിൽ വടക്കൻകേരളത്തിലാണു സർവേ നടക്കുന്നതെങ്കിലും തെക്കൻ കേരളത്തിലും സമാനമായ സർവേക്കായി ടെൻഡർ നടപടികൾ പുരോഗമിക്കുകയാണ്.

രാജ്യത്തെ 21 ബ്ലോക്കുകളിൽ തീരുമാനിച്ച സർവേ 2017ലാണ് ആരംഭിച്ചത്. 7 ബ്ലോക്കുകളിൽ പൂർത്തിയായി. ഒരു ബ്ലോക്കിലെ സർവേ പൂർത്തിയാക്കി മാപ്പിങ് തയാറാക്കുന്നതിന് 2 വർഷമെങ്കിലും സമയമെടുക്കും. ധാതുനിക്ഷേപ സാധ്യതാപഠനം പൂർണരീതിയിൽ പൂർത്തിയാക്കാൻ പിന്നെയും കാത്തിരിക്കേണ്ടി വരും.

ഇപ്പോഴത്തെ സർവേയിൽ ഉൾപ്പെടുന്ന പ്രധാനസ്ഥലങ്ങൾ

കാസർകോട് ജില്ല – കാഞ്ഞങ്ങാട്, നീലേശ്വരം, ബേക്കൽ, പനത്തടി, രാജപുരം, കുറ്റിക്കോൽ, ബെള്ളൂർ, ബദിയടുക്ക.

കണ്ണൂർ – തളിപ്പറമ്പ്, ഇരിക്കൂർ, ശ്രീകണ്ഠാപുരം, ഇരിട്ടി, പയ്യാവൂർ, ഉളിക്കൽ, പേരാവൂർ.

വയനാട് – അതിർത്തിയോടു ചേർന്ന വളരെ ചെറിയ ഭാഗത്ത്.

കോഴിക്കോട് – വടകര, നാദാപുരം, കുറ്റ്യാടി, പേരാമ്പ്ര, താമരശ്ശേരി.

കർണാടക – ദക്ഷിണ കന്നഡ, മടിക്കേരി, കുടക്, പുത്തൂർ, മംഗളൂരു.

English Summary : The Geological Survey of India (GSI) has launched an aero-geophysical survey in northern Kerala and parts of Karnataka to identify potential underground mineral deposits, such as thorium, uranium, and magnesium. Operating from the Kannur International Airport, two specially equipped small aircraft are flying at low altitudes between 80 to 120 meters at a speed of 200 kilometers per hour.