ദുബായിൽ സ്വർണവിലയിൽ മാറ്റമില്ല; വിപണിയിൽ നേരിയ ഇടിവ്

ദുബായിൽ സ്വർണവിലയിൽ മാറ്റമില്ലാതെ തുടരുകയാണ്. എണ്ണവിലയിലെ വർധനയും ഈ ആഴ്ച യുഎസ് ഫെഡറൽ റിസർവ് പലിശനിരക്ക് ഉയർത്തുമെന്ന പ്രതീക്ഷയും ആഗോള സ്വർണവിപണിയിൽ സമ്മർദം സൃഷ്ടിക്കുന്നതിനിടെയാണ് ദുബായിൽ വില സ്ഥിരമായി തുടരുന്നത്.

കഴിഞ്ഞദിവസം വിപണി തുറന്നപ്പോൾ 24 കാരറ്റ് സ്വർണത്തിന് ഗ്രാമിന് 518.75 ദിർഹമാണ് വില. 22 കാരറ്റിന്, 21 കാരറ്റിന് 460.50 ദിർഹം, 18 കാരറ്റിന് 394.75 ദിർഹം, 14 കാരറ്റിന് 308 ദിർഹം എന്നിങ്ങനെയാണ് വില.

അതേസമയം ആഗോള വിപണിയിൽ സ്വർണവില 0.18 ശതമാനം കുറഞ്ഞ് ഔൺസിന് 4,304 ഡോളറിലെത്തി. വെള്ളിയുടെ വിലയും 0.62 ശതമാനം കുറഞ്ഞ് ഔൺസിന് 63.26 ഡോളറിലെത്തി. ഇന്ത്യയിൽ സ്വർണവിലയിൽ നേരിയ വർധനയാണ് രേഖപ്പെടുത്തിയത്.

സ്വർണ്ണത്തിനൊപ്പം എണ്ണവിലയും ഉയരുന്നു

മധ്യേഷ്യയിലെ സംഘർഷങ്ങളും എണ്ണവിതരണവുമായി ബന്ധപ്പെട്ട ആശങ്കകളുമാണ് വിപണിയെ സ്വാധീനിക്കുന്ന പ്രധാന ഘടകങ്ങളിലൊന്ന്. ഹോർമുസ് കടലിടുക്കിലൂടെ താൽക്കാലിക കപ്പൽപാത സൃഷ്ടിക്കുന്നതിനായി ഇറാനും ചില ഗൾഫ് രാജ്യങ്ങളും തമ്മിൽ നടത്താനിരുന്ന കൂടിക്കാഴ്ച മാറ്റിവച്ചതാണ് എണ്ണവില ഉയരാനുള്ള കാരണങ്ങളിലൊന്നെന്ന് സെഞ്ച്വറി ഫിനാൻഷ്യലിലെ സാമ്പത്തിക വിദഗ്ധനും സിഐഒയുമായ വിജയ് വാലേച്ച പറഞ്ഞു.

വാരാന്ത്യത്തിൽ സൗദി അറേബ്യയിലെ ഈസ്റ്റ്-വെസ്റ്റ് പൈപ്പ്ലൈൻ അടച്ചതും എണ്ണവിലയിൽ കൂടുതൽ സമ്മർദം സൃഷ്ടിച്ചതായി അദ്ദേഹം ചൂണ്ടിക്കാട്ടി.
മധ്യേഷ്യയിലെ പ്രതിസന്ധി ആഗോള സമ്പദ്വ്യവസ്ഥയിൽ വിലക്കയറ്റത്തിന് കാരണമാകുന്നുവെന്നും ക്രൂഡ് ഓയിൽ, പ്രകൃതിവാതകം, ഡീസൽ ഉൾപ്പെടെയുള്ള പെട്രോളിയം ഉൽപ്പന്നങ്ങളുടെ വില ഉയരുകയാണെന്നും വാലേച്ച വിശദീകരിച്ചു.

ഈസ്റ്റ്-വെസ്റ്റ് പൈപ്പ്ലൈനിന് നേരെയുണ്ടായ ആക്രമണത്തിന് മുമ്പുതന്നെ സൗദിയിലെ എണ്ണ ഉൽപ്പാദനം സമ്മർദത്തിലായിരുന്നു. ഓഗസ്റ്റിലെ ക്രൂഡ് ഉൽപ്പാദനം 1990ന് ശേഷമുള്ള ഏറ്റവും താഴ്ന്ന നിലയിലെത്തിയതായി സൗദി അറേബ്യ ഒപെക്കിനെ അറിയിച്ചിരുന്നു.

അതിനിടെ, ഓഗസ്റ്റിൽ അമേരിക്കയിലെ വിലക്കയറ്റത്തിന്റെ വേഗത വർധിച്ചതായി കണക്കുകൾ പുറത്തുവന്നതോടെ ഈ ആഴ്ച ഫെഡറൽ റിസർവ് പലിശനിരക്ക് ഉയർത്തുമെന്ന പ്രതീക്ഷ ശക്തമാണ്. പലിശനിരക്ക് ഉയർന്നാൽ പലിശ ലഭിക്കാത്ത നിക്ഷേപമായ സ്വർണത്തിന് ആവശ്യകത കുറയാനുള്ള സാധ്യതയുണ്ട്. ഇത് സ്വർണവിലയിൽ സമ്മർദം സൃഷ്ടിച്ചേക്കാം.

English Summary : Dubai's gold market remained flat despite widespread pressures in global commodity markets driven by rising crude oil prices and aggressive US Federal Reserve rate hike expectations. While local retail gold rates held firm across standard purities, global spot gold dipped slightly by 0.18% to $4,304 per ounce, and silver eased 0.62% to $63.26 per ounce.