മധ്യ ഫിലിപ്പീൻസിലെ സെബു സിറ്റിയിലുള്ള ബിനാലിവ് (Binaliw) ലാൻഡ്‌ഫില്ലിൽ വ്യാഴാഴ്ചയുണ്ടായ വൻ മാലിന്യമലയിടിച്ചിലിൽ 22 വയസ്സുള്ള ഒരു യുവതി കൊല്ലപ്പെടുകയും മുപ്പതിലധികം പേരെ കാണാതാവുകയും ചെയ്തു.

അവശിഷ്ടങ്ങൾക്കിടയിൽ നിന്ന് പരിക്കേറ്റ 12 ശുചീകരണ തൊഴിലാളികളെ രക്ഷപ്പെടുത്തി ആശുപത്രിയിൽ പ്രവേശിപ്പിച്ചിട്ടുണ്ട്. കാണാതായവരിൽ ഭൂരിഭാഗവും ലാൻഡ്‌ഫില്ലിലെ തൊഴിലാളികളാണെന്നാണ് കരുതപ്പെടുന്നത്.

മാലിന്യമലയുടെ അടിഭാഗം ഉറപ്പില്ലാത്തതിനാൽ രക്ഷാപ്രവർത്തനം അതീവ ദുഷ്കരമാണ്. മുകളിൽ നിന്ന് മാലിന്യം നീക്കം ചെയ്യുമ്പോൾ കൂടുതൽ ഇടിച്ചിലുണ്ടാകാൻ സാധ്യതയുണ്ടെന്ന് സെബു മേയർ നെസ്റ്റർ ആർച്ചിവൽ പറഞ്ഞു.

ശാസ്ത്രീയമായ മാലിന്യ സംസ്കരണ രീതികളുടെ അഭാവമാണ് അപകടത്തിന് കാരണമായതെന്ന് സിറ്റി കൗൺസിലർ ജോയൽ ഗർഗനേര ആരോപിച്ചു.

ഇതൊരു 'സാനിറ്ററി ലാൻഡ്‌ഫിൽ' അല്ലെന്നും മറിച്ച് ഒരു തുറന്ന മാലിന്യക്കൂമ്പാരമായി മാറിയിരിക്കുകയാണെന്നും അദ്ദേഹം കൂട്ടിച്ചേർത്തു.

നിലവിലെ അവസ്ഥ

ഏകദേശം 300 ഓളം രക്ഷാപ്രവർത്തകരും വിവിധ യന്ത്രസാമഗ്രികളും സ്ഥലത്ത് തിരച്ചിൽ തുടരുകയാണ്. കാണാതായവരുടെ കുടുംബാംഗങ്ങൾ പ്രിയപ്പെട്ടവർക്കായി ആശങ്കയോടെ കാത്തിരിക്കുകയാണ്.
"മണ്ണ് തുരന്ന് മാറ്റിയ ശേഷം അവിടെ മാലിന്യം കുന്നുകൂട്ടി മറ്റൊരു മലയുണ്ടാക്കുകയാണ് അധികൃതർ ചെയ്തത്. ഇതൊരു സാധാരണ മണ്ണിടിച്ചിൽ പോലെയല്ല, വളരെ അപകടകരമായ സാഹചര്യമാണ്." - ജോയൽ ഗർഗനേര (സിറ്റി കൗൺസിലർ) പറഞ്ഞു.

ഫിലിപ്പീൻസിലെ പ്രധാന വ്യാപാര കേന്ദ്രങ്ങളിലൊന്നായ സെബു സിറ്റിയിൽ മാലിന്യ സംസ്കരണം വലിയൊരു വെല്ലുവിളിയായി തുടരുന്നതിനിടയിലാണ് ഈ ദുരന്തം സംഭവിച്ചിരിക്കുന്നത്.

Metbeat news