തെക്കുപടിഞ്ഞാറൻ മൺസൂൺ (കാലവർഷം) അവസാനിക്കാൻ ഇനി ഒരു മാസവും ഒരാഴ്ചയും ബാക്കി . നാളെ മുതൽ സെപ്റ്റംബർ 20 വരെ നാല് തവണ ബംഗാൾ കടലിൽ ന്യൂനമർദ്ദം / ചക്രവാതചുഴി രൂപപ്പെടാൻ സാധ്യത. സെപ്റ്റംബർ 30 നാണ് കാലവർഷം അവസാനിക്കുക.

ജൂൺ 1 മുതൽ സെപ്റ്റംബർ 30 വരെയാണ് കാലവർഷത്തിന്റെ ഭാഗമായുള്ള മഴ കണക്കുകൾ റെക്കോർഡ് ചെയ്യുന്നത്. സെപ്റ്റംബർ 30ന് മഴ കണക്കുകൾ കാലവർഷത്തിന്റെ കണക്കിൽ അവസാനിക്കുമെങ്കിലും കാലവർഷം വിടവാങ്ങാൻ ഒക്ടോബർ പകുതി വരെയെങ്കിലും ആകും.

ഒക്ടോബർ മാസം ഒന്നു മുതൽ ഡിസംബർ 31 വരെ പെയ്യുന്ന മഴ തുലാവർഷത്തിന്റെ (വടക്കു കിഴക്കൻ മൺസൂൺ) കണക്കിലാണ് ഉൾപ്പെടുത്തുക. എന്നാൽ തുലാവർഷം തുടങ്ങാൻ ഒക്ടോബർ പകുതിയെങ്കിലും ആകും.

സെപ്റ്റംബർ മാസത്തിൽ സാധാരണയെക്കാൾ കുറവ് മഴയാണ് കേന്ദ്ര കാലാവസ്ഥാവകുപ്പ് (IMD) ഉൾപ്പെടെയുള്ള ഏജൻസികൾ കേരളത്തിൽ പ്രവചിക്കുന്നത്. സെപ്റ്റംബർ മാസത്തിൽ മൺസൂൺ കാലത്ത് ഏറ്റവും കുറവ് മഴയാണ് കേരളത്തിൽ ലഭിക്കാറുള്ളത്. ദീർഘകാല ശരാശരി (LPA) പ്രകാരം ഏറ്റവും കൂടുതൽ മഴ ലഭിക്കുന്നത് ജൂൺ , ജൂലൈ മാസങ്ങളിലാണ്.

ഇന്നുമുതൽ സെപ്റ്റംബർ 20 വരെയുള്ള ദിവസങ്ങളിൽ നാലു തവണയെങ്കിലും ബംഗാൾ ഉൾക്കടലിൽ ന്യൂനമർദ്ദം രൂപപ്പെടാൻ സാധ്യതയുണ്ട് എന്നാണ് കാലാവസ്ഥ മോഡലുകൾ സൂചിപ്പിക്കുന്നത്.
വടക്കൻ ബംഗാൾ ഉൾക്കടലിൽ ഒഡീഷ തീരത്തായാണ് ഇതിൽ എല്ലാ സിസ്റ്റങ്ങളും രൂപപ്പെടാൻ സാധ്യത. അവ ഒസിഷ വഴിയോ പശ്ചിമ ബംഗാൾ വഴിയോ കരകയറും.

കേരളത്തിൽ നേരിയതോതിൽ മഴയെ ചില ന്യൂനമർദ്ദങ്ങൾ സ്വാധീനിക്കും. എന്നാൽ വ്യാപകമായ മഴ സാധ്യത ഈ ഘട്ടത്തിൽ പ്രവചിക്കാൻ കഴിയില്ല. ചില സിസ്റ്റങ്ങൾ ഉടലെടുക്കുമ്പോൾ കേരളത്തിൽ മഴ വർദ്ധനവ് അനുഭവപ്പെടും.

ഓഗസ്റ്റ് 23 നും 25 നും ഇടയിലാണ് ആദ്യ ന്യൂനമർദം / ചക്രവാത ചുഴി പ്രതീക്ഷിക്കുന്നത്. രണ്ടാമത്തേത് ഓഗസ്റ്റ് 27 നും 30 നും ഇടയിൽ . സെപ്റ്റംബർ 1 നും 6 നും ഇടയിൽ മൂന്നാമത്തെയും 10 നും 20 നും ഇടയിൽ നാലാമത്തെയും ന്യൂനമർദ്ദം പ്രതീക്ഷിക്കാം.

കേരളത്തിലെ മഴ സാധ്യത

ഓഗസ്റ്റ് 23നും 25നും ഇടയിൽ രൂപപ്പെടുന്ന സിസ്റ്റം കാരണം കേരളത്തിൽ എല്ലാ ജില്ലകളിലും മഴയിൽ വർദ്ധനവ് ഉണ്ടാകും. ഓഗസ്റ്റ് 30ന് ഉണ്ടാകുന്ന ന്യൂനമർദ്ദവും നേരിയതോതിൽ കേരളത്തിൽ മഴ വർദ്ധനവ് ഉണ്ടാക്കിയേക്കും . പക്ഷേ സെപ്റ്റംബർ ആദ്യവാരം ഒരു രൂപപ്പെടുന്ന സിസ്റ്റം കേരളത്തിൽ മഴയ്ക്ക് പകരം വെയിലിലാണ് സാധ്യത.

ശ്രധിക്കുക: ഇത് വളരെ നേരത്തെ ഉള്ള പ്രവചനം ആയതിനാൽ കൃത്യത കുറവാകാൻ സാധ്യതയുണ്ട്. അതിനാൽ ഏറ്റവും പുതിയ അപ്ഡേറ്റുകൾ ശ്രദ്ധിക്കുക.

Summary : Southwest Monsoon Update: Low-Pressure Systems Expected and Rainfall Forecast for Kerala. With one month and a week remaining for the southwest monsoon season which officially ends on September 30 weather models indicate that four low-pressure areas or cyclonic circulations are likely to form in the Bay of Bengal between now and September 20.