യുഎഇയിൽ ഇന്ന് മഴയ്ക്ക് സാധ്യത; ശക്തമായ കാറ്റിനും സാധ്യത

യുഎഇയിൽ ഇന്ന് ചില മേഖലകളിൽ മഴയ്ക്ക് സാധ്യതയെന്ന് ദേശീയ കാലാവസ്ഥാ നിരീക്ഷണ കേന്ദ്രം (NCM). കിഴക്കൻ മേഖലകളിൽ രൂപപ്പെടുന്ന സംവഹന മേഘങ്ങൾ (Convective Clouds) ഉച്ചയോടെ രാജ്യത്തിന്റെ ഉൾപ്രദേശങ്ങളിലേക്കും പടിഞ്ഞാറൻ മേഖലകളിലേക്കും വ്യാപിച്ചേക്കും. ഇതോടെ വിവിധയിടങ്ങളിൽ മഴ ലഭിക്കാൻ സാധ്യതയുണ്ട്.

രാത്രിയിലും വെള്ളിയാഴ്ച രാവിലെയും തീരദേശ, ഉൾപ്രദേശങ്ങളിൽ ഈർപ്പം വർധിക്കാനും മൂടൽമഞ്ഞ് (Fog), മഞ്ഞുമൂടൽ (Mist) എന്നിവ രൂപപ്പെടാനും സാധ്യതയുണ്ട്. തെക്കുകിഴക്കൻ ദിശയിൽ നിന്ന് വീശിത്തുടങ്ങുന്ന കാറ്റ് പിന്നീട് വടക്കുപടിഞ്ഞാറൻ ദിശയിലേക്ക് മാറും. കാറ്റിന്റെ വേഗം മണിക്കൂറിൽ 50 കിലോമീറ്റർ വരെ ഉയർന്നേക്കും. മേഘങ്ങളുടെ സാന്നിധ്യത്തിൽ കാറ്റ് ശക്തമാകാനും പൊടിക്കാറ്റ് ദൃശ്യപരതയെ ബാധിക്കാനും സാധ്യതയുള്ളതിനാൽ ജാഗ്രത വേണം.

ഇന്ന് അബുദാബിയിലും ഷാർജയിലും പരമാവധി താപനില 38 ഡിഗ്രി സെൽഷ്യസായിരിക്കും. ദുബായിൽ 37 ഡിഗ്രി സെൽഷ്യസ് വരെ താപനില ഉയർന്നേക്കും. കുറഞ്ഞ താപനില അബുദാബിയിലും ദുബായിലും 29 ഡിഗ്രിയും ഷാർജയിൽ 26 ഡിഗ്രി സെൽഷ്യസുമായിരിക്കുമെന്നും കാലാവസ്ഥാ നിരീക്ഷണ കേന്ദ്രം അറിയിച്ചു.

English Summary : The National Center of Meteorology (NCM) has issued a weather alert for the UAE, warning of convective clouds bringing potential rainfall across eastern, internal, and western regions by afternoon. Strong winds reaching up to 50 km/h may cause dust storms and reduced visibility. Meanwhile, maximum temperatures are expected to peak at 38°C in Abu Dhabi and Sharjah, and 37°C in Dubai, with rising humidity and fog likely heading into the night and Friday morning.