യുഎഇയിൽ മഴ തുടങ്ങി; വെള്ളപൊക്കത്തിന് സാധ്യത, വാഹനമോടിക്കുന്നവർക്ക് നിർദേശം

യുഎഇയുടെ വിവിധ ഭാഗങ്ങളിൽ ചൊവ്വാഴ്ച ഉച്ചയോടെ മഴ ആരംഭിച്ചു. ഷാർജയിലെ ഫിലി മേഖലയിൽ മഴ പെയ്യുന്ന ദൃശ്യങ്ങൾ സ്റ്റോം സെന്റർ പുറത്തുവിട്ടു. രാജ്യത്തിന്റെ കിഴക്കൻ മേഖലകളിൽ കൂടുതൽ മഴ ലഭിക്കുമെന്നാണ് പ്രതീക്ഷ.
അൽ ഐനിൽനിന്ന് വടക്കോട്ട് മലനിരകൾ വഴി ഫുജൈറയിലേക്കും കിഴക്കൻ തീരത്തേക്കും വ്യാപിക്കുന്ന മേഖലകളിലാണ് പ്രധാനമായും ജാഗ്രതാ നിർദേശം. പടിഞ്ഞാറൻ അബുദാബിയിലെ അൽ ദഫ്റ മേഖലയിലെ ഉൾനാടൻ പ്രദേശങ്ങളും മുന്നറിയിപ്പിന്റെ പരിധിയിൽ ഉൾപ്പെടുന്നു.

ഇടിമിന്നലോട് കൂടിയ മഴ

ഇടിമിന്നലോടുകൂടിയ മഴമേഘങ്ങൾ രൂപപ്പെടാൻ സാധ്യതയുള്ളതിനാൽ ചിലയിടങ്ങളിൽ ശക്തമായ മഴയും കാറ്റും ദൃശ്യപരിധി കുറയുന്ന സാഹചര്യവും ഉണ്ടാകാമെന്ന് അധികൃതർ മുന്നറിയിപ്പ് നൽകി. മലമ്പ്രദേശങ്ങളിൽ പെട്ടെന്നുള്ള വെള്ളപ്പൊക്കത്തിനും സാധ്യതയുണ്ട്. ഇതിന്റെ പശ്ചാത്തലത്തിൽ ചൊവ്വാഴ്ച ഉച്ചയ്ക്ക് 2.30 മുതൽ രാത്രി ഒമ്പതുമണി വരെ ചില മലമ്പ്രദേശങ്ങളിൽ മിന്നൽ പ്രളയ മുന്നറിയിപ്പും നൽകിയിരുന്നു.

അപ്രതീക്ഷിത മഴയെ തുടർന്ന് വാഹനമോടിക്കുന്നവർ ജാഗ്രത പാലിക്കണമെന്ന് അബുദാബി പോലീസ് നിർദേശിച്ചു. നനഞ്ഞ റോഡുകളിൽ വേഗം കുറയ്ക്കുക, മുന്നിലുള്ള വാഹനവുമായി സുരക്ഷിത അകലം പാലിക്കുക, കാഴ്ചപരിധി കുറയുമ്പോൾ ഹെഡ്‌ലൈറ്റ് തെളിയിക്കുക എന്നിവയാണ് പ്രധാന നിർദേശങ്ങൾ. റോഡുകളിലെ ഇലക്ട്രോണിക് വിവരബോർഡുകളിൽ പ്രദർശിപ്പിക്കുന്ന മാറിക്കൊണ്ടിരിക്കുന്ന വേഗപരിധി കൃത്യമായി പാലിക്കണമെന്നും പോലീസ് എക്‌സിലൂടെ അറിയിച്ചു.

മഴക്കാലത്ത് വെള്ളം പെട്ടെന്ന് ഉയരാൻ സാധ്യതയുള്ള താഴ്‌വരകളിൽനിന്നും വാദികളിൽനിന്നും അകന്നുനിൽക്കണമെന്നും അധികൃതർ നിർദേശിച്ചു. കാലാവസ്ഥയിൽ പെട്ടെന്നുള്ള മാറ്റങ്ങൾക്ക് സാധ്യതയുള്ളതിനാൽ ദേശീയ കാലാവസ്ഥാ കേന്ദ്രത്തിന്റെയും പൊലീസിന്റെയും ഔദ്യോഗിക അറിയിപ്പുകൾ പിന്തുടരണമെന്നും താമസക്കാരോട് ആവശ്യപ്പെട്ടിട്ടുണ്ട്.

English Summary : Rainfall began across parts of the UAE, prompting authorities to issue safety warnings for motorists and residents. The showers affected areas including the Al Dhafra region in western Abu Dhabi, parts of Sharjah, and eastern regions stretching from Al Ain to Fujairah.