ഒമാനിൽ ലോബ്സ്റ്റർ പിടിത്ത സീസണിന് തുടക്കം

ഒമാനിൽ ഈ വർഷത്തെ ലോബ്സ്റ്റർ പിടിത്ത സീസണിന് തുടക്കമായി. ഇതോടെ കടലിന്റെ ആഴങ്ങളിൽ നിന്നുള്ള ലോബ്സ്റ്ററുകൾ ഇനി തീരത്തേക്ക് എത്തും. ഒക്ടോബർ ഒന്ന് മുതൽ നവംബർ 30 വരെയാണ് ലോബ്സ്റ്റർ പിടിത്തത്തിന് അനുമതിയുള്ളത്. രണ്ട് മാസത്തെ സീസണിൽ രാജ്യത്തിന്റെ വിവിധ തീരങ്ങളിൽ നിന്നായി മത്സ്യത്തൊഴിലാളികൾ ലോബ്സ്റ്റർ പിടിത്തത്തിനായി കടലിലിറങ്ങും. സമുദ്രസമ്പത്ത് സംരക്ഷിക്കുന്നതിനൊപ്പം മത്സ്യത്തൊഴിലാളികളുടെ ഉപജീവനത്തിന് പിന്തുണ നൽകുകയെന്നതും സീസണിന്റെ പ്രധാന ലക്ഷ്യമാണ്.

നിയമങ്ങളും നിയന്ത്രണങ്ങളും പാലിക്കുക

ലോബ്സ്റ്റർ പിടിത്തത്തിന് അംഗീകൃത കെണികൾ മാത്രമേ ഉപയോഗിക്കാവൂവെന്ന് കൃഷി, മത്സ്യബന്ധനം, ജലവിഭവ മന്ത്രാലയം അറിയിച്ചു. നിയമങ്ങളും നിയന്ത്രണങ്ങളും പാലിച്ച് സുസ്ഥിരമായ രീതിയിൽ മത്സ്യബന്ധനം നടത്തണമെന്നും മന്ത്രാലയം നിർദേശിച്ചിട്ടുണ്ട്.

ലക്ഷ്യം, പുനരുജ്ജീവനം

ലോബ്സ്റ്ററുകളുടെ ആവാസവ്യവസ്ഥയും സമുദ്രത്തിലെ സ്വാഭാവിക വിഭവങ്ങളും സംരക്ഷിക്കുന്നതിനാണ് മത്സ്യബന്ധനത്തിന് നിയന്ത്രണങ്ങൾ ഏർപ്പെടുത്തിയിരിക്കുന്നത്. സീസൺ അവസാനിക്കുന്നതോടെ ലോബ്സ്റ്ററുകളുടെ പ്രജനനത്തിനും സമുദ്രസമ്പത്തിന്റെ സ്വാഭാവിക പുനരുജ്ജീവനത്തിനും ആവശ്യമായ സംരക്ഷണം ഉറപ്പാക്കാനാണ് അധികൃതരുടെ ലക്ഷ്യം.

English Summary : The official lobster fishing season in Oman has officially kicked off, running from October 1 to November 30, 2026. Regulated by the Ministry of Agriculture, Fisheries and Water Resources, this two-month season aims to support local fishermen's livelihoods while safeguarding marine wealth.