Fact Check : ചൂടു കൂടി, വാട്‌സ്ആപ്പ് വ്യാജ പ്രചാരണം കേട്ട് ഞെട്ടാൻ വരട്ടെ

ചൂട് കൂടിയതോടെ കടുത്ത ചൂടുമായി ബന്ധപ്പെട്ട വ്യാജ പ്രചാരണങ്ങളും വാട്സാപ്പിൽ സജീവമാകുന്നു. ഔദ്യോഗിക മുന്നറിയിപ്പ് എന്നുള്ള തരത്തിലാണ് പ്രചാരണങ്ങൾ നടക്കുന്നത്.

ഏപ്രിൽ 29 മുതൽ മെയ് 12 വരെ താപനില 45 ഡിഗ്രി മുതൽ 55 ഡിഗ്രി വരെ ഉയരും എന്നും തുറസായ സ്ഥലങ്ങളിൽ നിൽക്കരുതെന്നും ചൂട് മൂലം മൊബൈൽ ഫോണുകൾ പൊട്ടിത്തെറിക്കാം. കാറുകളിൽ ഇന്ധന ടാങ്കുകൾ മുഴുവനായി നിറയ്ക്കരുത് തുടങ്ങിയ നിർദേശങ്ങൾ അടങ്ങിയ വാട്സാപ്പ് പ്രചാരണമാണ് പ്രചരിക്കുന്നത്. ഇതിൽ ആന്ധ്രപ്രദേശിലെ വാട്സ്ആപ്പ് ചാനലിന്റെ ലിങ്കും നൽകിയിട്ടുണ്ട്. സിവിൽ ഡിഫൻസ് വകുപ്പ് എന്ന പേരിലാണ് സന്ദേശം പ്രചരിക്കുന്നത്.

ഇനി വേനൽ മഴ ഉണ്ടാകില്ലെന്നും മഴപെയ്യേണ്ട സമയത്ത് ചൂട് കൂടുകയാണ് ചെയ്യുക എന്നും El nino യുടെ പ്രതിഭാസമാണ് ഇതിന് പിന്നിൽ എന്നുമാണ് മറ്റൊരു വ്യാജ പ്രചാരണം.

2026 ലെ വേനൽക്കാലത്ത് എൽനിനോ പ്രതിഭാസമില്ല. അതിനാൽ സാധാരണയിൽ കൂടുതൽ വേനൽ മഴ ലഭിക്കാനാണ് സാധ്യത എന്നാണ് അന്താരാഷ്ട്ര, ദേശീയ കാലാവസ്ഥ ഏജൻസികളുടെ നിരീക്ഷണം. എന്നാൽ ഇതിനു നേർ വിപരീതമാണ് വാട്സ്ആപ്പ് പ്രചാരണം.

നിലവിൽ പസഫിക് സമുദ്രത്തിലെ ഭൂമധ്യരേഖ പ്രദേശത്ത് സമുദ്രോപരി താപനില (Sea Surface Temperature) ആയി ബന്ധപ്പെട്ട ENSO ന്യൂട്രലിലാണ്. ഇത് മൺസൂൺ വരെ തുടരാനാണ് സാധ്യത.

മൺസൂൺ കാലയളവിലാണ് ഇത്തവണ എൽ നിനോ പ്രതിഭാസം പ്രവചിക്കപ്പെടുന്നത്. അതിനാൽ ഇത്തവണ വേനലിൽ മഴ കുറയാൻ സാധ്യത ഒന്നുമില്ല.

പ്രചാരണം ശരിയല്ലെന്ന് ദുരന്തനിവാരണ അതോറിറ്റിയും കേന്ദ്ര കാലാവസ്ഥ വകുപ്പും

കേരളത്തിൽ സിവിൽ ഡിഫൻസ് എന്ന വകുപ്പ് തന്നെയില്ല എന്ന് സംസ്ഥാന ദുരന്തനിവാരണ അതോറിറ്റി മെമ്പർ സെക്രട്ടറി ഡോ. ശേഖർ കുര്യാക്കോസ് Metbeat News നോട് പറഞ്ഞു. കേരളത്തിലെ സിവിൽ ഡിഫൻസ് അഗ്നിരക്ഷാസേനയുടെ കീഴിൽ പ്രവർത്തിക്കുന്ന സന്നദ്ധ സേനയാണ്.

ഔദ്യോഗിക അറിയിപ്പുകൾക്കും മുന്നറിയിപ്പുകൾക്കും സംസ്ഥാന ദുരന്തനിവാരണ അതോറിറ്റിയുടെ (KSDMA ) ഔദ്യോഗിക പേജുകൾ , വെബ്സൈറ്റ് എന്നിവ സന്ദർശിക്കണമെന്ന് അദ്ദേഹം അഭ്യർത്ഥിച്ചു.

വാട്സ്ആപ്പ് പോസ്റ്റിൽ പ്രചരിക്കുന്ന സന്ദേശം കാലാവസ്ഥാവകുപ്പ് നൽകിയതല്ലെന്ന് കേന്ദ്ര കാലാവസ്ഥ വകുപ്പിന്റെ (IMD) തിരുവനന്തപുരം അന്തരീക്ഷ ശാസ്ത്ര കേന്ദ്രം ഡയരക്ടർ ഡോ. നിത ഗോപാലും Metbeat News നോട് പറഞ്ഞു.

കേരളത്തിൽ വരും ദിവസങ്ങളിൽ കോഴിക്കോട്, പാലക്കാട്, കാസർകോട് , കൊല്ലം ജില്ലകളിൽ ഒറ്റപ്പെട്ട സ്ഥലങ്ങളിൽ പകൽ ചൂട് 38 ഡിഗ്രി സെൽഷ്യസ് വരെ എത്താമെന്ന് കേന്ദ്ര കാലാവസ്ഥ വകുപ്പ് പറഞ്ഞു. ആലപ്പുഴ, കോട്ടയം, എറണാകുളം, തൃശ്ശൂർ, കണ്ണൂർ ജില്ലകളിൽ 37 ഡിഗ്രി സെൽഷ്യസും പത്തനംതിട്ട ജില്ലയിൽ 36 ഡിഗ്രി സെൽഷ്യസുമാണ് പ്രതീക്ഷിക്കുന്നതെന്ന് കാലാവസ്ഥാവകുപ്പ് അറിയിച്ചു.

ചൂടിനെ തുടർന്ന് പൊതുജനങ്ങൾ സ്വീകരിക്കേണ്ട മുന്നൊരുക്കങ്ങളും കാലാവസ്ഥ വകുപ്പ് നിർദ്ദേശിച്ചിട്ടുണ്ട്. താഴെപ്പറയുന്ന നിർദ്ദേശങ്ങൾ ആണ് ഇവ.

ദീർഘനേരം ചൂടിൽ ഏൽക്കുന്നത് ഒഴിവാക്കുക.
ഭാരം കുറഞ്ഞതും ഇളം നിറമുള്ളതും അയഞ്ഞതുമായ കോട്ടൺ വസ്ത്രങ്ങൾ ധരിക്കുക.
തല മൂടുക: പുറത്തുപോകുമ്പോൾ തുണി, തൊപ്പി അല്ലെങ്കിൽ കുട ഉപയോഗിക്കുക.
ദാഹിക്കുന്നില്ലെങ്കിൽ പോലും ആവശ്യത്തിന് വെള്ളം കുടിക്കുക - നിർജ്ജലീകരണം ഒഴിവാക്കാൻ.
ദിവസത്തിലെ തണുത്ത സമയങ്ങളിലേക്ക് കഠിനമായ ജോലികൾ ക്രമീകരിക്കുക.
പുറത്തെ പ്രവർത്തനങ്ങൾക്ക് വിശ്രമ ഇടവേളകളുടെ ആവൃത്തിയും ദൈർഘ്യവും വർദ്ധിപ്പിക്കുക.
ഗർഭിണികളായ തൊഴിലാളികൾക്കും ആരോഗ്യപ്രശ്നങ്ങളുള്ള തൊഴിലാളികൾക്കും കൂടുതൽ ശ്രദ്ധ നൽകണം.
രാവിലെ 11 മുതൽ ഉച്ചയ്ക്ക് 3 വരെ നേരിട്ട് സൂര്യപ്രകാശം ഏൽക്കുന്നത് ഒഴിവാക്കാൻ തൊഴിലാളികൾക്ക് മുന്നറിയിപ്പ് നൽകുക.
രാവിലെ 11 മുതൽ ഉച്ചയ്ക്ക് 3 വരെ കന്നുകാലികളെ വീടിനുള്ളിൽ സൂക്ഷിക്കുക.
പാർക്ക് ചെയ്തിരിക്കുന്ന വാഹനങ്ങളിൽ കുട്ടികളെയോ വളർത്തുമൃഗങ്ങളെയോ തനിച്ചാക്കി പോകരുത്
തിരക്കേറിയ സമയങ്ങളിൽ (രാവിലെ 11 മുതൽ ഉച്ചയ്ക്ക് 3 വരെ) റാലികൾ/കൂട്ടായ്മകൾ നിരീക്ഷിക്കേണ്ടതുണ്ട്.

Metbeat News

English Summary : Fact Check: Fake Heatwave Warnings and 54°C Temperature Alerts on WhatsApp. The rising temperatures in Kerala have triggered a wave of misinformation on WhatsApp. Viral messages, falsely attributed to a non-existent "Civil Defense Department.