എൽ നിനോ; ചൂടുകാലം വരുന്നു, 2027 ൻ്റെ തുടക്കത്തിൽ ചൂട് കൂടുമെന്ന് പഠനം

എൽ നീനോ പ്രതിഭാസവും ഉയർന്നുവരുന്ന ആഗോള താപനിലയും കാരണം 2027 ഫെബ്രുവരി മുതൽ ഇന്ത്യയിൽ വേനൽച്ചൂട് ആരംഭിച്ചേക്കുമെന്ന് കാലാവസ്ഥാ പഠന സംഘടനയായ ക്ലൈമറ്റ് ട്രെൻഡ്സ് പുറത്തുവിട്ട റിപ്പോർട്ടിൽ മുന്നറിയിപ്പ് നൽകുന്നു. സാധാരണയിൽ കുറഞ്ഞ മഴയും ആഗോളതാപനവും എൽ നീനോയുടെ ആഘാതം വർധിപ്പിക്കുമെന്നും ഇത് രാജ്യത്ത് കുടിവെള്ള ക്ഷാമം, കൃഷിനാശം, ആരോഗ്യപ്രശ്നങ്ങൾ എന്നിവയ്ക്ക് വഴിവെച്ചേക്കുമെന്നും റിപ്പോർട്ട് മുന്നറിയിപ്പ് നൽകുന്നു.

കാർഷിക മേഖലയ്ക്ക് വെല്ലുവിളി

2027-ൽ എൽ നീനോയുടെ പ്രഭാവം ശക്തമാകാനുള്ള സാധ്യത കണക്കിലെടുത്ത് ജലലഭ്യത സംബന്ധിച്ച ആശങ്കകളും ഉയരുന്നുണ്ട്. ജലസംഭരണികളിലെ വെള്ളം കുറയുന്നതും ഭൂഗർഭ ജലനിരപ്പ് താഴുന്നതും റാബി വിളകളെയും വേനൽക്കാല കൃഷിയെയും പ്രതികൂലമായി ബാധിച്ചേക്കാം. ഉയർന്ന താപനിലയും ജലക്ഷാമവും ഒരേസമയം നേരിടേണ്ടിവരുന്നത് കാർഷിക മേഖലയ്ക്ക് വലിയ വെല്ലുവിളിയാകുമെന്നാണ് വിലയിരുത്തൽ.

അപകടകരമായ മാറ്റങ്ങളുമായി 'സൂപ്പർ എൽനിനോ'; കേരളത്തിലെ തുലാവർഷത്തെയും കടലിലെ കാലാവസ്ഥയെയും എങ്ങനെ ബാധിക്കും?
Super El Niño Intensifies: What It Means for Kerala’s Monsoon and Coastal Weather
https://metbeatnews.com/super-el-nino-intensifies-what-it-means-for-keralas-monsoon-and-coastal-weather

ആവശ്യമായ മുന്നൊരുക്കങ്ങൾ ഉടനടി

ചൂടിന്റെ ആഘാതം കുറയ്ക്കാൻ പ്രാദേശികതലത്തിൽ അടിയന്തര നടപടികൾ സ്വീകരിക്കണമെന്നും റിപ്പോർട്ട് നിർദേശിക്കുന്നു. ഹീറ്റ് ആക്ഷൻ പ്ലാനുകൾ ശക്തിപ്പെടുത്തുക, കൃത്യമായ മുന്നറിയിപ്പ് സംവിധാനങ്ങൾ ഒരുക്കുക, പൊതുജനാരോഗ്യ സംവിധാനങ്ങളെ സജ്ജമാക്കുക തുടങ്ങിയ നടപടികൾക്ക് ഉടൻ മുൻഗണന നൽകണം. കടുത്ത ചൂട് ഏറ്റവും കൂടുതൽ ബാധിക്കാൻ സാധ്യതയുള്ള വിഭാഗങ്ങളെ സംരക്ഷിക്കുന്നതിനും ആവശ്യമായ മുന്നൊരുക്കങ്ങൾ വേണം.

രാജ്യത്ത് 13 ശതമാനം മഴക്കുറവ്

2026-ലെ തെക്കുപടിഞ്ഞാറൻ മൺസൂൺ മഴയിൽ ഇന്ത്യയിൽ 13 ശതമാനം കുറവാണ് രേഖപ്പെടുത്തിയത്. മഴയുടെ കുറവ് രാജ്യത്തെ കാർഷിക മേഖലയെയും ബാധിച്ചു. ദേശീയതലത്തിൽ നെൽകൃഷി വിസ്തൃതിയിൽ 15.56 ലക്ഷം ഹെക്ടറിന്റെ കുറവുണ്ടായി. കഴിഞ്ഞ ഒരു പതിറ്റാണ്ടിനിടയിലെ ഏറ്റവും കുറഞ്ഞ കണക്കാണിത്.

അതേസമയം താപനിലയിലെ വർധനയും ആശങ്കയുയർത്തുന്നുണ്ട്. 1901-ന് ശേഷമുള്ള ഏറ്റവും ചൂടേറിയ ഓഗസ്റ്റ് മാസവും അഞ്ചാമത്തെ ഏറ്റവും ചൂടേറിയ സെപ്റ്റംബർ മാസവുമാണ് 2026-ൽ രേഖപ്പെടുത്തിയത്. മഴക്കുറവും ഉയർന്ന താപനിലയും തുടർന്നാൽ വരും വർഷത്തെ വേനൽക്കാലത്ത് വെള്ള കിട്ടാകനിയായി കൃഷിയെയും പൊതുജനാരോഗ്യത്തെയും ബാധിക്കുന്ന പ്രതിസന്ധികൾ രൂക്ഷമായേക്കാമെന്ന ആശങ്കയാണ് റിപ്പോർട്ട് മുന്നോട്ടുവയ്ക്കുന്നത്.

English Summary : A latest report by the climate research organization Climate Trends warns that India could face early and severe summer heatwaves starting as early as February 2027, driven by the El Niño phenomenon and rising global temperatures. Combined with below-average rainfall, this extreme weather combination threatens severe drinking water shortages, heavy agricultural losses, and public health risks.