ഒക്ടോബർ വാഴകൃഷിക്ക് അനുയോജ്യമായ കാലം; ഇക്കാര്യങ്ങൾ ശ്രദ്ധിക്കൂ

വാഴക്കൃഷിക്ക് പുതിയ സീസണിൽ ഒരുങ്ങാം. ഓണക്കാലത്തെ വിളവെടുപ്പിന് ശേഷം, തുലാവർഷത്തിന് മുന്നോടിയായി പുതിയ കൃഷിയിറക്കാനുള്ള സമയം എത്തിയിരിക്കുകയാണ്. സെപ്റ്റംബർ അവസാനം മുതൽ ഒക്ടോബർ വരെയാണ് പുതിയ വാഴക്കൃഷിക്ക് അനുയോജ്യമായ കാലയളവ്. വെള്ളം കെട്ടിക്കിടക്കാത്തതും നല്ല നീർവാർച്ചയുള്ളതുമായ പശയുള്ള മണ്ണാണ് വാഴക്കൃഷിക്ക് ഏറ്റവും അനുയോജ്യം. അതേസമയം രോഗകീടബാധകളില്ലാത്ത ആരോഗ്യമുള്ള സൂചിക്കന്നുകൾ വേണം നടാനായി തെരഞ്ഞെടുക്കാൻ.

നടുന്നതിന് മുൻപ് ഇങ്ങനെ ചെയ്യൂ

കുലവെട്ടിയശേഷം ലഭിക്കുന്ന മികച്ച കന്നുകളുടെ പുറംതൊലി ചെത്തിമാറ്റി കേടുപാടുകൾ നീക്കം ചെയ്തശേഷം ചാണകക്കുഴമ്പിൽ മുക്കി മൂന്നോ നാലോ ദിവസം വെയിലത്ത് ഉണക്കണം. തുടർന്ന് രണ്ടാഴ്ച തണലിൽ സൂക്ഷിച്ചശേഷം നടുന്നത് കന്നുകളുടെ മുളയ്ക്കാനുള്ള ശേഷിയും രോഗപ്രതിരോധശേഷിയും വർധിപ്പിക്കാൻ സഹായിക്കും.

സൂര്യപ്രകാശമേൽക്കുന്നത് ഗുണം ചെയ്യും

കൃഷിയിടത്തിൽ കുഴിയെടുത്ത ശേഷം ഏതാനും ദിവസം സൂര്യപ്രകാശം കൊള്ളിച്ച് തുറന്നിടുന്നത് ഗുണകരമാണ്. മണ്ണിലെ ദോഷകരമായ കീടങ്ങളെയും പൂപ്പലുകളെയും നിയന്ത്രിക്കാൻ ഇത് സഹായിക്കും.

How to Double Cardamom Yield: ഏലത്തിൽ നിറയെ ചിമ്പുകളും ചരങ്ങളും വേണോ? വിളവ് ഇരട്ടിയാക്കാൻ ശ്രദ്ധിക്കേണ്ട കാര്യങ്ങൾ
ഒരു ഏലത്തട്ടയുടെ ഇരുവശങ്ങളിലുമായി നാല് ചരങ്ങളും നാല് ചിമ്പുകളും വരാനുള്ള സ്വാഭാവിക ശേഷിയുണ്ടെങ്കിലും പല തോട്ടങ്ങളിലും എല്ലാ മുകുളങ്ങളും (Eye buds)
https://metbeatnews.com/expert-tips-for-higher-yield

വളപ്രയോഗത്തിൽ കൂടുതൽ ശ്രദ്ധ വേണം

വാഴയ്ക്ക് വളം പ്രയോഗിക്കുന്നത് ഏറ്റവും കൂടുതൽ ഗുണം ചെയ്യും. വാഴയുടെ വളർച്ചയുടെ ഓരോ ഘട്ടത്തിലും കൃത്യമായ വളപ്രയോഗം നിർണായകമാണ്. കന്നുകാലിവളം, കോഴിവളം, മണ്ണിരക്കമ്പോസ്റ്റ് തുടങ്ങിയ ജൈവവളങ്ങൾ കൃഷിയിടം ഒരുക്കുമ്പോൾ തന്നെ അടിവളമായി നൽകണം. ഇതിനൊപ്പം കൃത്യമായ അളവിൽ നൈട്രജൻ, ഫോസ്ഫറസ്, പൊട്ടാസ്യം വളങ്ങളും നൽകുന്നത് മികച്ച കുലകൾ ലഭിക്കാൻ സഹായിക്കും.

അനുയോജ്യമായത് തിരഞ്ഞെടുക്കാം

കാലാവസ്ഥയും വിപണിയിലെ ആവശ്യകതയും പരിഗണിച്ച് നേന്ത്രൻ, പൂവൻ, കദളി, ചെറിപ്പൂവൻ, പാളയൻകോടൻ തുടങ്ങിയ ഇനങ്ങളിൽ അനുയോജ്യമായത് തെരഞ്ഞെടുക്കാം.

വരുമാനം കുലയിൽ നിന്ന് മാത്രമല്ല

വാഴക്കൃഷിയിൽ നിന്ന് പഴം വിൽപ്പനയിലൂടെ മാത്രമല്ല, വാഴയിലയിലൂടെയും അധിക വരുമാനം നേടാം. കേരളത്തിലെ സദ്യകൾക്കും ഹോട്ടലുകൾക്കും ഭക്ഷണശാലകൾക്കും വാഴയിലയ്ക്ക് സ്ഥിരമായ ആവശ്യക്കാരുണ്ട്.

പ്ലാസ്റ്റിക് ഉൽപ്പന്നങ്ങൾക്ക് പകരമായി വാഴയിലയിൽ നിർമിക്കുന്ന പ്ലേറ്റുകൾക്കും പാത്രങ്ങൾക്കും ഇപ്പോൾ വിപണിയിൽ ആവശ്യകത വർധിച്ചുവരികയാണ്. ഇല ഉൽപ്പന്നങ്ങൾക്ക് അന്താരാഷ്ട്ര വിപണിയിലും സാധ്യതയുണ്ട്.
പരിസ്ഥിതി സൗഹൃദവും ആരോഗ്യപരവുമായ ഉൽപ്പന്നങ്ങളോടുള്ള താൽപര്യം വർധിക്കുന്ന സാഹചര്യത്തിൽ സൂപ്പർമാർക്കറ്റുകൾ, ഓൺലൈൻ വിപണികൾ എന്നിവയിലേക്കും വാഴയില ഉൽപ്പന്നങ്ങൾക്ക് കൈയ്യടി ലഭിക്കും.

ശാസ്ത്രീയ കൃഷിരീതികളും കൃത്യമായ പരിചരണവും വിപണി കണ്ടെത്താനുള്ള പുതിയ വഴികളും സ്വീകരിച്ചാൽ വാഴക്കൃഷിയെ കൂടുതൽ ലാഭകരമാക്കാം.

English Summary : Get ready for the new banana farming season this October! Learn expert tips on seed selection, soil preparation, organic fertilization, and high-yielding varieties like Nendran and Poovan. Discover how to maximize your agricultural profits through traditional fruit harvest and eco-friendly banana leaf products.