കടൽ നൂറ് മീറ്ററോളം പിൻവലിഞ്ഞു; പരപ്പനങ്ങാടി തീരത്ത് ആശങ്ക

കടൽ അസാധാരണമായി പിൻവാങ്ങിയതോടെ പരപ്പനങ്ങാടി പുത്തൻകടപ്പുറം തീരത്ത് വൻ ആശങ്ക. തീരത്തുനിന്ന് ഏകദേശം നൂറുമീറ്ററോളം കടൽ പിന്നിലേക്ക് മാറിയതോടെ സാധാരണയായി വെള്ളത്തിനടിയിലായിരുന്ന തീരഭാഗങ്ങൾ പുറത്തുകാണുന്ന നിലയിലാണ്. ചിലയിടങ്ങളിൽ കടലിന്റെ അടിത്തട്ട് ചെളിമയമായും കാണപ്പെട്ടു.

കടലിന്റെ സ്വാഭാവിക രീതിയിലുണ്ടായ ഈ കാഴ്ച്ച കാണാൻ നിരവധി പേരാണ് തീരത്തെത്തിയത്. രണ്ടാഴ്ചയ്ക്കിടെ രണ്ടാം തവണയാണ് പരപ്പനങ്ങാടി തീരത്ത് സമാനമായ പ്രതിഭാസം റിപ്പോർട്ട് ചെയ്യുന്നത്. നേരത്തെ ചെട്ടിപ്പടി ആലുങ്ങൽ ബീച്ച് ബദർപള്ളി തീരത്ത് അരക്കിലോമീറ്ററോളം ഭാഗത്ത് കടൽ പിൻവാങ്ങിയിരുന്നു.

പുത്തൻകടപ്പുറത്തും കടൽ ഉൾവലിഞ്ഞതോടെ മത്സ്യത്തൊഴിലാളികൾക്കിടയിലും ആശങ്ക ശക്തമായി. കടലിലെ ജലനിരപ്പിലെ താൽക്കാലിക വ്യതിയാനങ്ങൾ, കാറ്റിന്റെ ശക്തി, തിരമാലകളിലെ മാറ്റങ്ങൾ, അന്തരീക്ഷ-സമുദ്ര താപനിലയിലെ വ്യതിയാനങ്ങൾ തുടങ്ങിയ വിവിധ ഘടകങ്ങൾ ഇത്തരം പ്രതിഭാസങ്ങൾക്ക് കാരണമാകാം.

Kerala Weather : കേരളത്തിൽ മഴ ശക്തമാകാൻ സാധ്യത; മൂന്ന് ദിവസങ്ങളിൽ മഞ്ഞ അലർട്ട്, കേരള തീരത്ത് കള്ളക്കടൽ ജാഗ്രത
സംസ്ഥാനത്ത് അടുത്ത അഞ്ച് ദിവസങ്ങളിൽ വിവിധ ജില്ലകളിൽ ഒറ്റപ്പെട്ട ശക്തമായ മഴയ്ക്ക് സാധ്യയെന്ന് കേന്ദ്ര കാലാവസ്ഥ വകുപ്പ്.
https://metbeatnews.com/yellow-alert-issued-for-5-districts-heavy-rainfall-expected

മത്സ്യത്തൊഴിലാളികൾ ജാഗ്രത പാലിക്കുക

കടൽ പിൻവാങ്ങുന്നത് മാത്രം സുനാമിയുടെ സൂചനയാണെന്ന് വിലയിരുത്താനാകില്ലെങ്കിലും അസാധാരണമായ കടൽമാറ്റങ്ങൾ അധികൃതർ നിരീക്ഷിക്കേണ്ടതുണ്ട്. വരും ദിവസങ്ങളിൽ കടൽ പ്രക്ഷുബ്ധമാകാനുള്ള സാധ്യതയും കള്ളക്കടൽ (Kallakkadal) മുന്നറിയിപ്പുകളും നേരത്തെ നൽകിയ സാഹചര്യത്തിൽ തീരദേശവാസികളും മത്സ്യത്തൊഴിലാളികളും ജാഗ്രത പാലിക്കണമെന്നാണ് നിർദേശം.

കടൽ പെട്ടെന്ന് പിൻവാങ്ങിയതിന് പിന്നാലെ ശക്തമായ തിരമാലകൾ ഉണ്ടാകുന്ന സാഹചര്യമുണ്ടായാൽ തീരത്തുനിന്ന് മാറിനിൽക്കണമെന്നും അധികൃതർ നിർദേശിക്കുന്നു. പുത്തൻകടപ്പുറത്തെ സ്ഥിതിഗതികൾ നിലവിൽ നിരീക്ഷിച്ചുവരികയാണ്.

English Summary : Panic gripped the Puthenkadappuram coast in Parappanangadi, Kerala, after the sea unexpectedly retreated by nearly 100 meters, exposing the seabed. This marks the second such abnormal phenomenon reported in the region within a fortnight.