പ്രവാസികൾക്കായി നോർക്ക പ്രവാസി ഐഡി കാർഡ്
ആർക്കെല്ലാം ലഭിക്കും?

വിദേശ രാജ്യങ്ങളിൽ ആറു മാസത്തിലധികമായി ജോലി ചെയ്യുകയോ താമസിക്കുകയോ ചെയ്യുന്ന 18 മുതൽ 70 വയസ് വരെയുള്ള പ്രവാസി മലയാളികൾക്ക് നോര്‍ക്ക റൂട്ട്‌സ് (NORKA Roots) നൽകുന്ന നോര്‍ക്ക പ്രവാസി ഐഡി കാർഡ് (Pravasi ID Card) ലഭിക്കും. മൂന്ന് വർഷമാണ് കാർഡിന്റെ കാലാവധി. അപേക്ഷാ ഫീസ് 408 രൂപയാണ്.

ഇൻഷുറൻസ് പരിരക്ഷയും മറ്റ് ആനുകൂല്യങ്ങളും

നോര്‍ക്ക പ്രവാസി ഐഡി കാർഡ് ഉടമകൾക്ക് അപകടമരണത്തിന് അഞ്ച് ലക്ഷം രൂപ വരെയും സ്ഥിരമായ അംഗവൈകല്യങ്ങൾക്ക് രണ്ട് ലക്ഷം രൂപ വരെയും ഇൻഷുറൻസ് പരിരക്ഷ ലഭിക്കും. പ്രവാസികൾക്ക് വിവിധ സർക്കാർ സേവനങ്ങളും ക്ഷേമപദ്ധതികളും ലഭ്യമാക്കുന്നതിലും കാർഡ് സഹായകരമാണ്.

അപേക്ഷിക്കേണ്ട വിധം

നോര്‍ക്ക റൂട്ട്‌സിന്റെ ഔദ്യോഗിക വെബ്സൈറ്റ് വഴിയാണ് അപേക്ഷ സമർപ്പിക്കേണ്ടത്. അപേക്ഷകൾ ഓൺലൈനായി മാത്രമേ സ്വീകരിക്കുകയുള്ളൂ.

അപേക്ഷയ്ക്കായി താഴെപ്പറയുന്ന രേഖകൾ JPEG അല്ലെങ്കിൽ PDF രൂപത്തിൽ അപ്‌ലോഡ് ചെയ്യണം:

* പാസ്‌പോർട്ടിലെ ഫോട്ടോ പതിച്ച പേജിന്റെ പകർപ്പ്
* വിലാസ വിവരങ്ങളുള്ള പേജിന്റെ പകർപ്പ്
* വിസ, ഇഖാമ, വർക്ക് പെർമിറ്റ് അല്ലെങ്കിൽ റസിഡന്റ് പെർമിറ്റ് എന്നിവയുടെ പകർപ്പ്
* പാസ്‌പോർട്ട് സൈസ് ഫോട്ടോ
* അപേക്ഷകന്റെ ഒപ്പ്

ഇ-കാർഡ് സംവിധാനം

അപേക്ഷയ്ക്ക് അംഗീകാരം ലഭിക്കുന്നതോടെ അപേക്ഷകർക്ക് വാട്ട്‌സ്ആപ്പിലൂടെയും ഇമെയിലിലൂടെയും ഡിജിറ്റൽ ഐഡി കാർഡ് (E-Card) ലഭിക്കും. ഐഡി കാർഡുകളും ഇൻഷുറൻസ് രേഖകളും ഇനി മുതൽ ഡിജിറ്റൽ രൂപത്തിൽ മാത്രമാണ് വിതരണം ചെയ്യുന്നത്.

പുതുക്കൽ എപ്പോൾ?

സാധുവായ വിസയുള്ളവർക്ക് കാർഡിന്റെ കാലാവധി അവസാനിക്കുന്നതിന് മൂന്ന് മാസം മുമ്പ് തന്നെ പുതുക്കലിന് അപേക്ഷിക്കാം.

നോർക്ക കെയർ പദ്ധതികൾക്ക് നിർബന്ധം

നോർക്ക റൂട്ട്‌സ് നടപ്പാക്കുന്ന സമഗ്ര ആരോഗ്യ-അപകട ഇൻഷുറൻസ് പദ്ധതികളായ നോർക്ക കെയർ (NORKA Care), നോർക്ക കെയർ പ്ലസ് (NORKA Care Plus) എന്നിവയിൽ അംഗമാകാൻ നോർക്ക പ്രവാസി ഐഡി കാർഡ്, സ്റ്റുഡന്റ് ഐഡി കാർഡ് (Student ID Card), അല്ലെങ്കിൽ എൻആർകെ ഐഡി കാർഡ് (NRK ID Card) ഉണ്ടായിരിക്കണം.

സർക്കാർ സേവനങ്ങൾക്കും അംഗീകാരം

സംസ്ഥാന റവന്യൂ വകുപ്പിന്റെ വിവിധ സേവനങ്ങൾ ലഭിക്കുന്നതിനും ബിഎസ്‌സി നഴ്‌സിംഗ് (BSc Nursing) എൻആർഐ സീറ്റുകളിലേക്കുള്ള പ്രവേശനത്തിന് സ്പോൺസറുടെ തിരിച്ചറിയൽ രേഖകളിലൊന്നായും നോർക്ക പ്രവാസി ഐഡി കാർഡ് അംഗീകരിച്ചിട്ടുണ്ട്.

10.5 ലക്ഷം പ്രവാസികൾ അംഗങ്ങൾ

പ്രവാസി മലയാളികളുടെ ആവശ്യപ്രകാരം 2008-ലാണ് നോർക്ക പ്രവാസി ഐഡി കാർഡ് പദ്ധതി ആരംഭിച്ചത്. ഇതുവരെ 10.5 ലക്ഷത്തിലധികം പ്രവാസികൾ പദ്ധതിയിൽ അംഗങ്ങളായിട്ടുണ്ട്. ലോകത്തെ 181 രാജ്യങ്ങളിലുള്ള മലയാളി പ്രവാസികളുടെ വിവരശേഖരണത്തിനും അവരുമായി ബന്ധം നിലനിർത്തുന്നതിനും ഈ പദ്ധതി സഹായകരമാണെന്ന് നോർക്ക റൂട്ട്‌സ് വ്യക്തമാക്കുന്നു.

English Summary : Unlock exclusive benefits with the NORKA Pravasi ID Card! Kerala expatriates (NRKs) aged 18–70 living abroad for over 6 months can apply online for just ₹408. Valid for 3 years, this digital E-Card offers up to ₹5 Lakhs in accident insurance, smooth access to NORKA Care schemes, NRI nursing seat quotas, and essential state revenue services. Learn about eligibility, required documents, and how to download your digital card via WhatsApp or email.