കോട്ടയത്ത് മിന്നലേറ്റ് ആന ചരിഞ്ഞു. പല്ലാട്ട് ബ്രഹ്മദത്തന്‍ എന്ന ആനയാണ് ഇന്ന് വൈകിട്ടുണ്ടായ ഇടിമിന്നലേറ്റ് ചെരിഞ്ഞത്. ഇന്ന് വൈകിട്ടാണ് മിന്നലേറ്റ് ബ്രഹ്മദത്തന് ഗുരുതര പരിക്കേറ്റിരുന്നു. ഈരാറ്റുപേട്ട സ്വദേശി രാജേഷ് പല്ലാട്ടിന്റെ ഉടമസ്ഥതയിലുള്ള ആനയാണ്.

വീട്ടുപരിസരത്ത് തന്നെയാണ് തളച്ചിരുന്നത്. മൃഗഡോക്ടറെത്തി മരണം സ്ഥീരികരിക്കുകയായിരുന്നു. അരുണാചല്‍ വനങ്ങളില്‍ നിന്ന് കേരളത്തിലേക്ക് കൊണ്ടുവന്നതാണ് പല്ലാട്ട് ബ്രഹ്മദത്തനെ. 25 വര്‍ഷമായി കേരളത്തിലുള്ള പല്ലാട്ട് ബ്രഹ്മദത്തന് ഏകദേശം 45 വയസാണ് പ്രായം.

മുന്‍പ് കേരളത്തില്‍ മിന്നലേറ്റ് കൊളക്കാടന്‍ മിനി എന്ന നാട്ടാന ചരിഞ്ഞത് വാര്‍ത്തയായിരുന്നു. വീട്ടുപറമ്പില്‍ തളച്ചിരുന്ന ആനയ്ക്ക് ശക്തമായ ഇടിമിന്നലില്‍ ഗുരുതരമായി പരിക്കേല്‍ക്കുകയും തുടര്‍ന്ന് മരണപ്പെടുകയുമായിരുന്നു.

കേരളത്തിലെ വനങ്ങളിലോ അതിര്‍ത്തി മേഖലകളിലോ കനത്ത വേനല്‍മഴയിലോ തുലാവര്‍ഷത്തിലോ ഉണ്ടാകുന്ന ശക്തമായ ഇടിമിന്നലില്‍പെട്ട് കാട്ടാനകളും മറ്റ് വന്യജീവികളും ചരിയുന്ന സംഭവങ്ങള്‍ മുന്‍പും വനംവകുപ്പ് സ്ഥിരീകരിച്ചിട്ടുണ്ട്. അത്തരം അവസരങ്ങളില്‍ വലിയ മരങ്ങള്‍ക്ക് താഴെ നില്‍ക്കുന്ന ആനകള്‍ക്കാണ് മിന്നലാഘാതമേല്‍ക്കാന്‍ കൂടുതല്‍ സാധ്യത.

ഉയരമുള്ള ശരീരപ്രകൃതിയായതിനാലും, മഴയത്ത് ചങ്ങലയോ മരങ്ങളോ വഴി വൈദ്യുതി പെട്ടെന്ന് പ്രവഹിക്കാന്‍ സാധ്യതയുള്ളതിനാലും, ശക്തമായ മിന്നലേറ്റാല്‍ ആനകള്‍ക്ക് ഹൃദയസ്തംഭനമോ രക്തസഞ്ചാരം നിലച്ചോ തല്‍ക്ഷണം മരണം സംഭവിക്കാറുണ്ട്.

English Summary : A captive elephant named Pallatt Brahmadathan, aged around 45, died after being struck by lightning in Kottayam during the evening. Owned by Rajesh Pallatt of Erattupetta, the elephant had been tethered on his home premises when severe lightning caused fatal injuries