ഇടിമിന്നൽ; ജാഗ്രത വേണം, ചെറിയ അശ്രദ്ധ പോലും ജീവന് ഭീഷണി

മഴക്കാലത്ത് ഇടിമിന്നലും വൈദ്യുതാപകടങ്ങളും ഉയർത്തുന്ന ഭീഷണികൾക്കെതിരെ ജാഗ്രത പാലിക്കണമെന്ന് മുന്നറിയിപ്പ്. ചെറിയ അശ്രദ്ധ പോലും ഗുരുതരമായ പൊള്ളലിനും ഹൃദയാഘാതത്തിനും പിന്നീട് മരണത്തിനും കാരണമാകാം. ശരിയായ മുൻകരുതലുകളും അടിയന്തര സാഹചര്യങ്ങളിൽ നൽകേണ്ട പ്രാഥമിക ശുശ്രൂഷയെക്കുറിച്ചുള്ള അറിവും ഇത്തരം അപകടങ്ങളിൽ ജീവൻ രക്ഷിക്കാൻ നിർണായകമാണ്.

ഇക്കാര്യങ്ങൾ ശ്രദ്ധിക്കുക

ഇടിമുഴക്കം കേൾക്കുന്ന നിമിഷം തന്നെ സുരക്ഷിതമായ കെട്ടിടങ്ങളിലേക്കോ ജനലുകളും വാതിലുകളും അടച്ചിട്ട കാറുകളിലേക്കോ മാറണം. മഴ പെയ്യാൻ തുടങ്ങുന്നതുവരെ കാത്തുനിൽക്കുന്നത് അപകടകരമാണ്. ശക്തമായ ഭിത്തികളും മേൽക്കൂരയുമുള്ള കെട്ടിടങ്ങളാണ് ഏറ്റവും സുരക്ഷിതമായ അഭയകേന്ദ്രങ്ങൾ. ഒറ്റപ്പെട്ട മരങ്ങൾ, തുറസ്സായ സ്ഥലങ്ങൾ, മലമുകൾ, ബീച്ചുകൾ, നീന്തൽക്കുളങ്ങൾ, വൈദ്യുതിത്തൂണുകൾ, താത്കാലിക ഷെഡുകൾ എന്നിവയ്ക്ക് സമീപം അഭയം തേടരുത്. മരത്തിന് താഴെ നിൽക്കുന്നത് മിന്നലേറ്റാൽ വൈദ്യുതി ശരീരത്തിലേക്ക് പടരാനുള്ള സാധ്യത വർധിപ്പിക്കും.

Kerala Weather : കേരളത്തിൽ ഇടിമിന്നലോടു കൂടിയ മഴയ്ക്ക് സാധ്യത; ഇന്ന് മൂന്ന് ജില്ലകളിൽ മഞ്ഞ അലർട്ട്
ഇന്ന് (നവംബർ 9) പത്തനംതിട്ട, കോട്ടയം, ഇടുക്കി ജില്ലകളിൽ മഞ്ഞ അലർട്ട് പ്രഖ്യാപിച്ചു.
https://metbeatnews.com/imd-issues-yellow-warning-for-3-districts-heavy-rain

വെള്ളം അപകടം

തുറസ്സായ സ്ഥലത്ത് അകപ്പെട്ടാൽ ഉയർന്ന പ്രദേശങ്ങളിൽനിന്ന് മാറിനിൽക്കണം. നിലത്ത് പൂർണമായി കിടക്കുന്നതും ഒഴിവാക്കണം. സുരക്ഷിതമായ കെട്ടിടത്തിനുള്ളിലാണെങ്കിലും ഇടിമിന്നൽ സമയത്ത് ചില കാര്യങ്ങളിൽ പ്രത്യേക ശ്രദ്ധ വേണം. വയറിങ്ങിലൂടെയും പൈപ്പ് ലൈനുകളിലൂടെയും മിന്നൽ വൈദ്യുതി പ്രവഹിക്കാമെന്നതിനാൽ കുളിക്കുക, പാത്രം കഴുകുക തുടങ്ങിയവ ഒഴിവാക്കണം. പ്ലഗിൽ ഘടിപ്പിച്ചിട്ടുള്ള വൈദ്യുതോപകരണങ്ങൾ, ലാൻഡ്‌ഫോൺ, ജനലുകൾ, ബാൽക്കണി എന്നിവയിൽനിന്നും അകന്നുനിൽക്കണം. ചാർജറുമായി ബന്ധിപ്പിക്കാത്ത മൊബൈൽ ഫോൺ ഉപയോഗിക്കാം.

ബൈക്കുകളും തുറന്ന വാഹനങ്ങളും സുരക്ഷിതമല്ല. കെട്ടിടങ്ങളിൽ മിന്നൽ രക്ഷാചാലകങ്ങൾ സ്ഥാപിച്ചിട്ടുണ്ടെങ്കിലും പൂർണ സുരക്ഷ ഉറപ്പാക്കാനാവില്ല. അവസാനമായി ഇടിമുഴക്കം കേട്ടശേഷം കുറഞ്ഞത് 30 മിനിറ്റ് കഴിഞ്ഞുമാത്രമേ പുറത്തിറങ്ങാവൂ.

മിന്നലേറ്റാൽ ഉടൻ പ്രാഥമിക ശുശ്രൂഷ നൽകണം

മിന്നലേറ്റ വ്യക്തിയുടെ ശരീരത്തിൽ വൈദ്യുതചാർജ് തങ്ങിനിൽക്കില്ലെന്നതിനാൽ സുരക്ഷിതമാണെന്ന് ഉറപ്പാക്കിയശേഷം രക്ഷാപ്രവർത്തകർക്ക് വ്യക്തിയെ സ്പർശിക്കാനും പ്രാഥമിക ശുശ്രൂഷ നൽകാനും കഴിയും.
ബോധമില്ലാതിരിക്കുകയും സാധാരണ രീതിയിൽ ശ്വസിക്കാതിരിക്കുകയും ചെയ്താൽ ഉടൻ സി.പി.ആർ (CPR) നൽകണം. മിനിറ്റിൽ 100 മുതൽ 120 തവണ വരെ നെഞ്ചിന്റെ മധ്യഭാഗത്ത് അമർത്തിയാണ് സി.പി.ആർ നൽകേണ്ടത്. ബോധം തിരിച്ചുകിട്ടിയാലും ഉടൻ വിദഗ്ധ പരിശോധനയ്ക്കായി ആശുപത്രിയിലെത്തിക്കുക.

വൈദ്യുതാഘാതമേറ്റയാളെ നേരിട്ട് തൊടരുത്

മഴക്കാലത്ത് പൊട്ടിവീണ വൈദ്യുതിക്കമ്പികൾ, തകരാറിലായ വയറുകൾ, വെള്ളക്കെട്ടുകൾ എന്നിവയിലൂടെ വൈദ്യുതാഘാതത്തിന് സാധ്യതയുണ്ട്. ഷോക്കേറ്റ വ്യക്തിയെ വൈദ്യുതിബന്ധം വിച്ഛേദിക്കാതെ നേരിട്ട് സ്പർശിക്കരുത്. ഇത് രക്ഷിക്കാൻ ശ്രമിക്കുന്നയാളുടെ ജീവനും അപകടത്തിലാക്കും.

ഉടൻ മെയിൻ സ്വിച്ച് അല്ലെങ്കിൽ സർക്യൂട്ട് ബ്രേക്കർ ഓഫ് ചെയ്ത് വൈദ്യുതിബന്ധം വിച്ഛേദിക്കണം. വൈദ്യുതിത്തൂണുകളിൽനിന്നോ ലൈനുകളിൽനിന്നോ അപകടമുണ്ടായാൽ കെ.എസ്.ഇ.ബി.യെയോ അഗ്നിരക്ഷാസേനയെയോ അറിയിക്കണം. പൊള്ളലേറ്റ ഭാഗത്ത് പേസ്റ്റ്, എണ്ണ, വെണ്ണ തുടങ്ങിയവ പുരട്ടരുത്. പകരം വൃത്തിയുള്ള തുണികൊണ്ട് പൊള്ളലേറ്റ ഭാഗം മൂടണം.

വീടുകളിലും സുരക്ഷാ സംവിധാനങ്ങൾ ഉറപ്പാക്കണം

വീടുകളിലെ വൈദ്യുതിവയറിങ് കൃത്യമായ ഇടവേളകളിൽ പരിശോധിക്കുകയും ആർ.സി.സി.ബി (RCCB), ശരിയായ എർത്തിങ് എന്നിവ ഉറപ്പാക്കുകയും വേണം. ഈറൻ കൈകളോടെയോ നഗ്നപാദനായോ വൈദ്യുതോപകരണങ്ങൾ പ്രവർത്തിപ്പിക്കരുത്. വൈദ്യുതിലൈനുകൾക്ക് സമീപമുള്ള വെള്ളക്കെട്ടുകളിലേക്ക് ഇറങ്ങുന്നതും ഒഴിവാക്കണം.

ഇടിമുഴക്കം കേട്ടാൽ ഉടൻ സുരക്ഷിതമായ കെട്ടിടത്തിനുള്ളിലേക്ക് മാറുക, മരച്ചുവട്ടിൽ അഭയം തേടാതിരിക്കുക, വൈദ്യുതാഘാതമേറ്റയാളെ വൈദ്യുതിബന്ധം വിച്ഛേദിക്കാതെ സ്പർശിക്കാതിരിക്കുക തുടങ്ങിയ കാര്യങ്ങളിൽ ജാഗ്രത പാലിക്കണമെന്നും മുന്നറിയിപ്പുണ്ട്.

English Summary : This guide details critical safety measures during monsoon thunderstorms, focusing on lightning protection and electrical shock prevention. Key guidelines include seeking immediate shelter in sturdy buildings upon hearing thunder, staying away from tall trees and open water bodies, avoiding wired appliances and plumbing, and waiting at least 30 minutes after the last thunderclap before going outside.