എൽ നിനോ 2027 വരെ തുടരും, യുഎഇയിൽ ചൂടിനൊപ്പം ശക്തമായ മഴയ്ക്കും സാധ്യത

എൽ നിനോ (El Nino) പ്രതിഭാസം യുഎഇയിലെ കാലാവസ്ഥ മാറ്റി മറിക്കുന്നു. വരും മാസങ്ങളിൽ യുഎഇ (uae)യിൽ കാലാവസ്ഥയിൽ വലിയ മാറ്റങ്ങൾക്ക് സാധ്യതയെന്നാണ് അധികൃതർ മുന്നറിയിപ്പ് നൽകിയിരിക്കുന്നത്. എൽ നിനോ പ്രതിഭാസം പസഫിക് സമുദ്രത്തിൽ ശക്തിപ്രാപിച്ചുകൊണ്ടിരിക്കുകയാണ്. ഇത് 2027 ഫെബ്രുവരി വരെ തുടരാൻ സാധ്യതയുണ്ടെന്നാണ് യുഎഇ നാഷണൽ സെന്റർ ഓഫ് മെറ്റീരിയോളജി (NCM)യുടെ വിലയിരുത്തൽ. ഇതിന്റെ കാലാവസ്ഥാ പ്രത്യാഘാതങ്ങൾ 2027 ഏപ്രിൽ വരെ യുഎഇയിൽ അനുഭവപ്പെട്ടേക്കാമെന്നും അധികൃതർ മുന്നറിയിപ്പ് നൽകുന്നു.

എന്താണ് എൽ നിനോ

മധ്യ-കിഴക്കൻ ഉഷ്ണമേഖലാ പസഫിക് സമുദ്രത്തിലെ സമുദ്രോപരിതല ജലം സാധാരണയേക്കാൾ ചൂടാകുന്ന പ്രതിഭാസമാണ് എൽ നിനോ. ഇതിന്റെ സ്വാധീനം ആഗോള അന്തരീക്ഷ ചംക്രമണത്തിലുണ്ടാകുകയും വിവിധ മേഖലകളിലെ മഴയിലും താപനിലയിലും കാര്യമായ മാറ്റങ്ങൾക്ക് കാരണമാകുകയും ചെയ്യും. അതുകൊണ്ടുതന്നെ യുഎഇയിൽ വരാനിരിക്കുന്ന ശൈത്യകാലം പതിവിൽ നിന്ന് വ്യത്യസ്തമായിരിക്കുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്.

വരുന്നു കടുത്ത കാലാവസ്ഥാ മുന്നറിയിപ്പ്: എൽനിനോ 2027 വരെ തുടരും; പ്രളയവും വരൾച്ചയും കടുക്കും
UN Alert: El Niño to Persist Until February 2027, Triggering Severe Floods, Heatwaves, and Droughts
https://metbeatnews.com/un-alert-el-nino-to-persist-until-february-2027-triggering-severe-floods-heatwav

ശൈത്യകാലം പതിവിലും വ്യത്യസ്തം

യുഎഇ യിൽ ഒക്ടോബർ മുതലാണ് ശൈത്യകാലം ആരംഭിക്കുന്നത്. ഇത്തവണ പതിവിൽ നിന്ന് വ്യത്യസ്തമായ കാലാവസ്ഥയായിരിക്കും ശൈത്യകാലത്ത് യുഎഇയിൽ അനുഭവപ്പെടുക. സാധാരണയേക്കാൾ ഉയർന്ന താപനിലയ്ക്കൊപ്പം കുറഞ്ഞ സമയത്തിനുള്ളിൽ ശക്തമായ മഴ ലഭിക്കാനും സാധ്യതയുണ്ട്.

എൽ നിനോക്ക് ശക്തികൂടും

ഇനിയങ്ങോട്ട് എൽ നിനോയുടെ വിവിധ ഭാവങ്ങൾ കാണാം. ഒക്ടോബർ മുതൽ 2027 ഫെബ്രുവരി വരെയുള്ള കാലയളവിൽ എൽ നിനോ ശക്തമായി തുടരാൻ 99 ശതമാനം സാധ്യതയുണ്ടെന്നാണ് നിലവിലെ കാലാവസ്ഥാ നിരീക്ഷണങ്ങൾ സൂചിപ്പിക്കുന്നത്. ഒക്ടോബർ-നവംബർ മാസങ്ങളിൽ പ്രതിഭാസം ഏറ്റവും ശക്തമായ ഘട്ടത്തിലെത്താനും സാധ്യതയുണ്ട്.

എൽ നിനോയുടെ ശക്തി വിലയിരുത്തുന്ന നിനോ 3.4 സൂചിക നിലവിൽ 1.8 ഡിഗ്രി സെൽഷ്യസാണ്. ഇത് ശക്തമായ എൽ നിനോ സാഹചര്യത്തെയാണ് സൂചിപ്പിക്കുന്നത്. വരും മാസങ്ങളിൽ ഈ താപനില വ്യതിയാനം മൂന്ന് ഡിഗ്രി സെൽഷ്യസ് വരെ ഉയരാനുള്ള സാധ്യതയും കാലാവസ്ഥാ മാതൃകകൾ മുന്നോട്ടുവയ്ക്കുന്നുണ്ട്.

ശൈത്യകാലത്ത് ഉയർന്ന താപനില

ശൈത്യകാലം അനുഭവിക്കാനുള്ള അവസരം യുഎഇ ജനതയ്ക്ക് ഇത്തവണ കിട്ടില്ല എന്നു തന്നെ പറയാം. ഇത്തവണത്തെ ശൈത്യകാലത്ത് ചൂട് കുറയുന്നതിന് പകരം സാധാരണയേക്കാൾ ഉയർന്ന താപനില അനുഭവപ്പെടാനാണ് സാധ്യത. അതേസമയം മഴയുടെ കാര്യത്തിലും മാറ്റമുണ്ടാകാം.

സാധാരണയേക്കാൾ നേരത്തെ മഴ ലഭിക്കാനും ചില ഘട്ടങ്ങളിൽ ശക്തമായ മഴയ്ക്ക് കാരണമാകുന്ന കാലാവസ്ഥാ സാഹചര്യങ്ങൾ രൂപപ്പെടാനും സാധ്യതയുണ്ട്. അതേസമയം എൽ നിനോ ശക്തമാകുന്നു എന്നതിനർത്ഥം യുഎഇയിൽ തുടർച്ചയായി മഴ പെയ്യുമെന്നല്ലെന്ന് കാലാവസ്ഥാ വിദഗ്ധർ പറയുന്നു. ചെറിയ സമയത്തിനുള്ളിൽ ശക്തമായ മഴ ലഭിക്കുന്ന സാഹചര്യങ്ങളും പെട്ടെന്നുള്ള കാലാവസ്ഥാ മാറ്റങ്ങളുമാണ് സംഭവിക്കുക.

2026 അവസാനത്തോടെ എൽ നിനോ കൂടുതൽ ശക്തമാകും

2026 അവസാനത്തോടെ പ്രതിഭാസം അതിശക്തമായ ഘട്ടത്തിലേക്ക് കടക്കാനുള്ള സാധ്യതയുണ്ടെന്നാണ് അന്താരാഷ്ട്ര കാലാവസ്ഥാ ഏജൻസികളുടെ വിലയിരുത്തൽ. ആഗോളതലത്തിലും എൽ നിനോയുടെ ശക്തമായ സ്വാധീനം സംബന്ധിച്ച് മുന്നറിയിപ്പുകൾ ഉയരുന്നുണ്ട്.

English Summary : The UAE National Center of Meteorology (NCM) has issued a warning that the ongoing El Niño phenomenon in the Pacific Ocean will persist until February 2027, with its climatic impacts affecting the country through April 2027.