ശവ്വാൽ മാസപ്പിറവി കണ്ടു; കേരളത്തിൽ വെള്ളിയാഴ്ച ചെറിയ പെരുന്നാൾ

ശവ്വാൽ മാസപ്പിറവി കണ്ടു; കേരളത്തിൽ വെള്ളിയാഴ്ച ചെറിയ പെരുന്നാൾ

കേരളത്തിൽ ശവ്വാൽ മാസപ്പിറവി പരപ്പനങ്ങാടി  ചെട്ടിപ്പടിയില്‍ കണ്ടതിന്റെ അടിസ്ഥാനത്തില്‍ നാളെ (20.03.2026) ഈദുല്‍ ഫിത്വര്‍ ആയിരിക്കുമെന്ന് ഖാസിമാ രായ സമസ്ത കേരള ജംഇയ്യത്തുല്‍ ഉലമാ പ്രസിഡന്റ് സയ്യിദ് മുഹമ്മദ് ജിഫ്രി മുത്തുക്കോയ തങ്ങള്‍, പാണക്കാട് സയ്യിദ് സ്വാദിഖ് അലി ശിഹാബ് തങ്ങള്‍, സമസ്ത ജനറല്‍ സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍, കോഴിക്കോട് ഖാസിമാരായ സയ്യിദ് മുഹമ്മദ് കോയ തങ്ങള്‍ ജമലുല്ലൈലി, സയ്യിദ് അബ്ദുല്‍ നാസര്‍ഹയ്യ് ശിഹാബ് തങ്ങള്‍ പാണക്കാട് എന്നിവര്‍ അറിയിച്ചു.  

ഒരുമാസം നീണ്ടുനിന്ന റമദാൻ വ്രതാനുഷ്ഠാനത്തിന് സമാപ്തി കുറിക്കുന്ന പ്രധാന ഇസ്‌ലാമിക ആഘോഷമാണ് ഈദുൽ ഫിത്തർ.

മാസപ്പിറവി ദൃശ്യമാകുന്ന നിമിഷം മുതൽ തന്നെ പള്ളികളിൽ തക്ബീർ ധ്വനികൾ മുഴങ്ങിത്തുടങ്ങി. വിശ്വാസികൾ ആത്മീയ ആവേശത്തോടെയും സന്തോഷത്തോടെയും പെരുന്നാൾ ദിനത്തെ വരവേൽക്കാൻ തയ്യാറെടുക്കും. പെരുന്നാൾ നമസ്‌കാരത്തിന് മുമ്പ് നിർബന്ധമായും നൽകേണ്ട ഫിത്തർ സക്കാത്ത് വിതരണം പൂർത്തിയാക്കുന്നതും വിശ്വാസികളുടെ പ്രധാന ചുമതലയായിരിക്കും.

പെരുന്നാൾ ദിനത്തിൽ പുത്തനുടുപ്പുകൾ അണിഞ്ഞ് വിശ്വാസികൾ ഈദ് ഗാഹുകളിലും പള്ളികളിലും ഒത്തുകൂടി കൂട്ടായ്മയായി നമസ്‌കാരം നിർവഹിക്കും. തുടർന്ന് പരസ്പരം ആശംസകൾ നേർന്ന് സ്നേഹവും സൗഹൃദവും പങ്കുവെച്ച് ആഘോഷം തുടരുന്നു.

കുടുംബബന്ധങ്ങളും സൗഹൃദങ്ങളും കൂടുതൽ ഉറപ്പിക്കുന്ന അവസരമായി കൂടിയാണ് ചെറിയ പെരുന്നാൾ കണക്കാക്കപ്പെടുന്നത്. വീടുകളിൽ പ്രത്യേക വിഭവങ്ങൾ തയ്യാറാക്കി ബന്ധുക്കളെയും സുഹൃത്തുക്കളെയും ക്ഷണിച്ച് സന്തോഷം പങ്കിടുന്നതും ഈ ആഘോഷത്തിന്റെ ഭാഗമാണ്.

എല്ലാ വായനക്കാർക്കും ഹൃദയം നിറഞ്ഞ ചെറിയ പെരുന്നാൾ ആശംസകൾ.

English summary : The Shawwal moon has been sighted in Kerala, marking the end of Ramadan. Religious leaders (Khazis) have officially announced that Eid al-Fitr will be celebrated on Friday. As the month-long fast concludes, believers are preparing for Eid prayers, Fitr Zakat distribution, and festive gatherings. Stay updated on the latest Eid celebrations and prayer timings across Kerala.