പ്ലാസ്റ്റിക് മാലിന്യം കൊണ്ട് വീടുണ്ടാക്കാം; വെറും ഒരാഴ്ചയിൽ വീട് റെഡി

ദിനംപ്രതിയെന്നോണം പ്ലാസ്റ്റിക് മാലിന്യം (plastic pollution) ലോകമെമ്പാടും വർദ്ധിച്ചു വരികയാണ്. ഇത് വലിയ പരിസ്ഥിതി ഭീഷണിയായി മാറുകയാണ്. വരും തലമുറയെ വലിയരീതിയിൽ ഈ പ്രശ്‌നം ബാധിക്കാനുള്ള സാധ്യതയും ഏറെയാണ്. ഇപ്പോഴിതാ പ്ലാസ്റ്റിക് മാലിന്യം ഒരു വലിയ വിപത്തായി മാറുന്നതിനിടെ, ഉപേക്ഷിക്കപ്പെടുന്ന പ്ലാസ്റ്റിക് ഉപയോഗിച്ച് വളരെ കുറഞ്ഞ ചെലവിൽ വീടുകൾ നിർമിക്കാമെന്ന് തെളിയിച്ചിരിക്കുകയാണ് മെക്സിക്കോയിലെ ഒരു സംരംഭകൻ.

വീടില്ലാത്ത വർക്കും പ്ലാസ്റ്റിക് വലിയ തുക ലോണെടുത്ത് വീട് നിർമിക്കുന്നവർക്കും ഈ ഭവനനിർമാണം വളരെയേറെ ഉപകാരപ്രദമാകും. ഇക്കോഡോം (EcoDom) പദ്ധതിയാണ് ഇത് നടപ്പിലാക്കുന്നത്. 2013-ലാണ് ഇക്കോഡോം പദ്ധതിക്ക് തുടക്കമിട്ടത്. മാലിന്യസംസ്‌കരണത്തിനും ഭവനക്ഷാമത്തിനും ഒരേസമയം പരിഹാരം കാണുകയെന്ന ലക്ഷ്യത്തോടെയാണ് പദ്ധതി മുന്നിട്ടിറക്കിയിരിക്കുന്നത്.

പ്ലാസ്റ്റിക് മാലിന്യത്തിൽ നിന്ന് നിർമിച്ച വീട്

സ്വന്തം അനുഭവം ഒരുപാട് പേർക്ക് തണലൊരുക്കുന്നു

അതിദരിദ്ര കുടുംബത്തിലാണ് ഗോൺസാലസിൻ ജനിച്ചത്. അതുകൊണ്ട് തന്നെ വീട്ടില്ലാത്ത അനുഭവം അദ്ദേഹത്തെ വലിയവലിയ പാഠങ്ങൾ പഠിപ്പിച്ചു. മെക്സിക്കോയിലെ പുവെബ്ല സംസ്ഥാനത്തെ മലനിരകളിൽ വളർന്നുവന്ന ഗോൺസാലസിന് ദാരിദ്ര്യവും സുരക്ഷിതമായ വീടുകളുടെ അഭാവവും നേരിട്ട് അനുഭവിച്ചത് ഇന്നും മറന്നിട്ടില്ല. ഈ അനുഭവങ്ങളാണ് പ്ലാസ്റ്റിക് മലിനീകരണത്തിനും ഭവനപ്രശ്നത്തിനും ഒരുമിച്ച് പരിഹാരം കണ്ടെത്താനുള്ള ആശയത്തിലേക്ക് അദ്ദേഹത്തെ എത്തിച്ചത്.

പ്ലാസ്റ്റിക് മാലിന്യമായി കണ്ടില്ല, പകരം പുതിയ ഉപയോഗം കണ്ടെത്തി

പ്ലാസ്റ്റിക്കിനെ മാലിന്യമായി കാണാതെ അതിനു പകരം അതൊരു നിർമാണ വസ്തുവാക്കി മാറ്റുകയാണ് ഇക്കോഡോമിന്റെ രീതി. ഇതിനായി ഉപയോഗിക്കുന്ന പ്ലാസ്റ്റിക്കുകൾ കണ്ടെത്തിയാണ് നിർമ്മാണം. പെറ്റ് പ്ലാസ്റ്റിക്, ഹൈ ഡെൻസിറ്റി പോളിഥിലീൻ (HDPE), പോളിപ്രൊപ്പിലീൻ (PP), എബിഎസ് (ABS) തുടങ്ങിയ പ്ലാസ്റ്റിക്കുകളാണ് ഇതിനായി ഉപയോഗിക്കുന്നത്.

മാലിന്യം വേർതിരിച്ച് ആദ്യം വൃത്തിയാക്കും, പിന്നീട് പൊടിച്ചെടുക്കും

പ്നമ്മൾ ദിനം പ്രതി ഉപയോഗിക്കുന്ന പ്ലാസ്റ്റിക്കുകളാണ് പ്രധാനമായും നിർമാണത്തിന് ഉപയോഗിക്കുന്നത്. പ്രധാനമായും പ്ലാസ്റ്റിക് കുപ്പികൾ, ബക്കറ്റുകൾ, കളിപ്പാട്ടങ്ങൾ, പ്ലാസ്റ്റിക് ബാഗുകൾ തുടങ്ങിയവയിൽനിന്ന് ശേഖരിക്കുന്ന മാലിന്യമാണ് കൂടുതലും നിർമാണത്തിന് ഉപയോഗിക്കുന്നത്. ആദ്യം തന്നെ ഇവ വേർതിരിച്ച് വൃത്തിയാക്കും. തുടർന്ന് ചെറിയ കഷണങ്ങളാക്കി പൊടിച്ചെടുത്ത് പ്രത്യേക മോൾഡുകളിൽ ചൂടാക്കി അമർത്തിയാണ് നിർമാണ പാനലുകൾ തയ്യാറാക്കുന്നത്.
ഭിത്തികൾ, സ്ലാബുകൾ, മേൽക്കൂരകൾ, മെസാനൈൻ നിലകൾ തുടങ്ങിയവയ്ക്കാവശ്യമായ നിർമാണ ഘടകങ്ങൾ ഈ മാലിന്യമായ പ്ലാസ്റ്റിക്കിൽനിന്ന് നിർമിക്കാനാകുമെന്നാണ് കമ്പനി അധികൃതർ പറയുന്നത്. ഓരോ ഭിത്തിയും നിർമിക്കാൻ ആറ് കിലോഗ്രാമോളം പ്ലാസ്റ്റിക് ആവശ്യമാണ്.

ഒരാഴ്ചകൊണ്ട് വീട് നിർമിക്കാം

കല്ലും മണ്ണും ഉപയോഗിച്ച് വർഷങ്ങളെടുക്കും ഓരോവീടുംനിർമിക്കാൻ. എന്നാൽ ഈ പദ്ധതി ഒരാഴ്ചകൊണ്ട് നമുക്ക് വീടുണ്ടാക്കി തരും. പരമ്പരാഗത നിർമാണ രീതികളേക്കാൾ വളരെ വേഗത്തിൽ വീടുകൾ പൂർത്തിയാക്കാനാകുന്നതാണ് പദ്ധതിയുടെ മറ്റൊരു പ്രത്യേകത. ഒരാഴ്ചകൊണ്ട് 42 ചതുരശ്ര മീറ്റർ വിസ്തീർണമുള്ള ഒരു വീട് നിർമിക്കാനാകുമെന്നാണ് കമ്പനി പറയുന്നത്.

വീട് നിർമിക്കാൻ ലക്ഷങ്ങൾ വേണ്ട

കമ്പനിയുടെ കണക്കുകൾ പ്രകാരം ഒരു വീടിന് ഏകദേശം 28,170 ഇന്ത്യൻ രൂപ വരും. ഒരു കിടപ്പുമുറിയുള്ള ചെറിയ വീടുകൾ ഇതിലും കുറഞ്ഞ ചെലവിൽ നിർമിക്കാനാകുമെന്നും കമ്പനി പറയുന്നു. കുടുംബാംഗങ്ങൾക്ക് തന്നെ നിർമാണപ്രവർത്തനങ്ങളിൽ പങ്കാളികളാകാം. ഇത് കൂടുതൽ ചിലവ് കുറയ്ക്കാൻ സാധിക്കും.

സൗജന്യമായോ സബ്സിഡിയോടെയോ വീടുകൾ

നിരവധി കാര്യങ്ങൾ ഈ പദ്ധതി ലക്ഷ്യമിടുന്നു. സാമ്പത്തികമായി പിന്നാക്കം നിൽക്കുന്ന കുടുംബങ്ങൾക്ക് സൗജന്യമായോ സബ്സിഡിയോടെയോ വീടുകൾ നൽകുന്ന പദ്ധതികളും ഇക്കോഡോം നടപ്പാക്കുന്നുണ്ട്.
ഇതിനകം രണ്ട് വീടുകൾ വിൽക്കുകയും അഞ്ച് വീടുകളും മൂന്ന് കിടപ്പുമുറികളും സൗജന്യമായി നൽകുകയും ചെയ്തിട്ടുണ്ടെന്ന് കമ്പനി പറയുന്നു.

അന്താരാഷ്ട്ര തലത്തിലും കൈയ്യടി

പ്ലാസ്റ്റിക് മാലിന്യത്തെ ഇത്രയധികം പ്രയോജനകരമാക്കുന്ന ഈ നിർമാണ പദ്ധതി അന്താരാഷ്ട്ര തലത്തിലും ശ്രദ്ധ നേടി കഴിഞ്ഞു. ഇന്ത്യ, കാനഡ, ഫ്രാൻസ്, ബ്രസീൽ, ദക്ഷിണാഫ്രിക്ക, ഗ്വാട്ടിമാല, ഡൊമിനിക്കൻ റിപ്പബ്ലിക് തുടങ്ങിയ രാജ്യങ്ങളിലെ സ്ഥാപനങ്ങളും സംഘടനകളും പദ്ധതിയിൽ താൽപര്യം പ്രകടിപ്പിച്ചിട്ടുണ്ട്.
പരിസ്ഥിതി സംരക്ഷണവും വീടില്ലാത്ത പ്രശ്‌നത്തിന് പരിഹാരവും ഒരേ പദ്ധതിയിലൂടെ മുന്നോട്ടുകൊണ്ടുപോകാമെന്നതിന് ശ്രദ്ധേയമായ മാതൃകയാണ് ഈ സംരംഭം.

English Summary : EcoDom, a Mexican green-technology venture founded in 2013 by entrepreneur Jesús González, has introduced an innovative construction model that transforms post-consumer plastic waste into affordable, durable housing. Based in Puebla, Mexico, the company solves two critical global problems simultaneously: plastic pollution and severe housing shortages among low-income families.