അറബിക്കടലിൽ ന്യൂനമർദം; ബംഗാൾ ഉൾക്കടലിൽ ചുഴലിക്കാറ്റ് ഭീഷണി, കേരളത്തിൽ മഴ കനക്കും

അറബിക്കടലിലും ബംഗാൾ ഉൾക്കടലിലും ന്യൂനമർദങ്ങൾ രൂപപ്പെട്ടതോടെ കേരളത്തിൽ മഴ ശക്തമാകാൻ സാധ്യത. ബംഗാൾ ഉൾക്കടലിൽ രൂപപ്പെട്ട ന്യൂനമർദം അടുത്ത ദിവസങ്ങളിൽ ശക്തിപ്രാപിച്ച് ചുഴലിക്കാറ്റായി മാറാൻ സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. ഒക്ടോബർ 23, 24, 25 തീയതികളിൽ സംസ്ഥാനത്ത് ഒറ്റപ്പെട്ട സ്ഥലങ്ങളിൽ ശക്തമായതോ അതിശക്തമായതോ ആയ മഴയ്ക്ക് സാധ്യതയുണ്ട്.

അറബിക്കടലിൽ ന്യൂനമർദം

തെക്കുകിഴക്കൻ അറബിക്കടലിലും അതിനോട് ചേർന്ന ലക്ഷദ്വീപിന് മുകളിലുമായാണ് നിലവിൽ ന്യൂനമർദം സ്ഥിതിചെയ്യുന്നത്. ഇതുമായി ബന്ധപ്പെട്ട ചക്രവാതച്ചുഴിയിൽനിന്ന് കേരളത്തിലൂടെ വടക്കൻ തമിഴ്‌നാട് തീരം വരെ ന്യൂനമർദ പാത്തിയും (Trough) രൂപപ്പെട്ടിട്ടുണ്ട്. ഇതിന്റെ സ്വാധീനഫലമായി കേരളത്തിൽ മഴ ലഭിക്കാനിടയുണ്ട്.

ബംഗാൾ ഉൾക്കടലിൽ ചുഴലിക്കാറ്റ് സാധ്യത

തെക്കുകിഴക്കൻ ബംഗാൾ ഉൾക്കടലിലും സമീപ മധ്യകിഴക്കൻ ബംഗാൾ ഉൾക്കടലിലുമായി പുതിയ ന്യൂനമർദം രൂപപ്പെട്ടു. ഇത് ഒക്ടോബർ 24-ഓടെ തീവ്ര ന്യൂനമർദമായും ഒക്ടോബർ 25-ന് അതിതീവ്ര ന്യൂനമർദമായും (Deep Depression) ശക്തിപ്രാപിക്കാൻ സാധ്യതയുണ്ട്.

ഒക്ടോബർ 26-ന് രാവിലെ മധ്യപടിഞ്ഞാറൻ ബംഗാൾ ഉൾക്കടലിൽ ചുഴലിക്കാറ്റായി മാറാനാണ് സാധ്യത. തുടർന്നുള്ള രണ്ട് ദിവസങ്ങളിൽ കൂടുതൽ ശക്തിപ്രാപിച്ച് പടിഞ്ഞാറ്-വടക്കുപടിഞ്ഞാറൻ ദിശയിൽ നീങ്ങുന്ന സംവിധാനം വടക്കൻ ആന്ധ്രാപ്രദേശ് തീരത്തേക്കും സമീപ തെക്കൻ ഒഡിഷ തീരത്തേക്കും നീങ്ങാൻ സാധ്യതയുണ്ടെന്നും കാലാവസ്ഥാ വകുപ്പ് അറിയിച്ചു.

English Summary : The India Meteorological Department (IMD) has issued a heavy rainfall alert for Kerala following the simultaneous formation of low-pressure systems in both the Arabian Sea and the Bay of Bengal.