മഴ ചതിച്ചു, കെനിയ കൊടും വരൾച്ചയിൽ, ഈ ദുരിതം ലോകത്തിന് നൽകുന്ന മുന്നറിയിപ്പ്

മഴ തകർത്തുപെയ്യേണ്ട കെനിയ(Kenya)യിൽ ഇന്ന് കൊടും വരൾച്ചയാണ്. ഒക്ടോബർ-ഡിസംബർ മാസങ്ങളിൽ ഒരു പേരിന് ചാറ്റൽ മഴ പോലും ലഭിച്ചില്ല. ഇത്രയും വലിയ വർൾച്ചയ്ക്ക് കാരണമായത് ഇന്ത്യൻ മഹാസമുദ്ര(Indian Ocean)ത്തിലെ താപനിലയിലുണ്ടായ വർധനവാണ്. ഇത് ഇവിടുത്തെ കാറ്റിന്റെ ഗതിയെ മാറ്റിമറിച്ച് മഴ ഇല്ലാതാക്കി. 1981-ന് ശേഷം കെനിയ നേരിട്ട ഏറ്റവും വലിയ പാരിസ്ഥിതിക വെല്ലുവിളിയാണിത്. ഇതുമൂലം സോമാലിയ, ടാൻസാനിയ, ഉഗാണ്ട, എത്യോപ്യ എന്നീ രാജ്യങ്ങളിലായി ഏകദേശം 2.4 കോടി ആളുകൾ ജലക്ഷാമം നേരിടുന്നുണ്ട്. അതുകൊണ്ട് തന്നെ ഇത് കെനിയയിൽ മാത്രം ഒതുങ്ങുന്ന പ്രതിസന്ധിയല്ല. സാധാരണ ലഭിക്കേണ്ട മഴയുടെ 30 ശതമാനം മാത്രമാണ് ഇത്തവണ ലഭിച്ചത്. ഇതോടെ കിഴക്കൻ കെനിയയിലെ ജലാശയങ്ങൾ പൂർണമായും വറ്റിവരണ്ട അവസ്ഥയിലാണ്.

കെനിയയിലെ തുർക്കാന കൗണ്ടിയിലെ കിണറ്റിൽ നിന്ന് വെള്ളം ശേഖരിക്കുന്നവർ | PHOTO: AP

പോഷകാഹാര കുറവ്

ദീർഘകാല വരൾച്ചയ്ക്കള്ള ഒരു പ്രധാന കാരണം കാലാവസ്ഥാ വ്യതിയാനം മൂലം ഇന്ത്യൻ മഹാസമുദ്രം ചൂടുപിടിക്കുന്നതാണ്. അതിനാൽ ഈ മേഖലയിൽ തീവ്രമായ ഉഷ്ണതരംഗങ്ങൾക്കും അത് കാരണമാകുന്നു. ഇത് ഇവിടുത്തെ മണ്ണിന്റെ കടുപ്പം കൂടാൻ കാരണമാകുന്നു. പിന്നീട് മഴ ലഭിക്കുമ്പോൾ വെള്ളം ആഗിരണം ചെയ്യാൻ ഈ മണ്ണിന് സാധിക്കാതെവരികയും പെട്ടെന്നുള്ള വെള്ളപൊക്കത്തിന് (Flash floods) കാരണമാവുകയും ചെയ്യുന്നു. ഇത് ജലജന്യ രോഗങ്ങൾ പടർത്തുന്നു. കെനിയയിൽ ഇന്ന് എട്ട് ലക്ഷം കുട്ടികൾ കടുത്ത പോഷകാഹാരക്കുറവ് അനുഭവിക്കുന്നുണ്ടെന്നാണ് കെനിയയിലെ നാഷണൽ ഡ്രോട്ട് മാനേജ്മെന്റ് അതോറിറ്റിയുടെ (NDMA) കണക്കിൽ പറയുന്നത്.

പകർച്ചവ്യാധികൾ പടരുന്നു

വരൾച്ച മൂലം സസ്യജാലങ്ങൾ നശിക്കുകയും രോഗവാഹകരായ ജീവികൾ പുഴകളിലോ കുളങ്ങൾക്കു ചുറ്റിലോ കേന്ദ്രീകരിക്കുന്നു. ഇത് പകർച്ചവ്യാധികളുടെ വ്യാപനം വർധിപ്പിക്കുന്നു. ഇതോടെ ജലസ്രോതസ്സ് ആശ്രയിക്കുന്ന കന്നുകാലികൾ കൂട്ടത്തോടെ ചത്തൊടുങ്ങുന്നു. അവയെ വരുമാനമാർഗ്ഗമാക്കിയവർ പട്ടിണിയിലാകുന്നു. ശുദ്ധജലത്തിന്റെ അഭാവം മൂലം കോളറ, ടൈഫോയ്ഡ് തുടങ്ങിയ രോഗങ്ങൾ പടരുന്നു. എന്നാൽ ഇത് തടയാൻ ലോകാരോഗ്യ സംഘടന (WHO) അടിയന്തര വൈദ്യസഹായം എത്തിക്കുന്നുണ്ടെങ്കിലും ഫലമില്ലാതാവുകയാണ്.

ലോകത്തിന് കാണിച്ചു തരുന്ന ഒരു വലിയ പാഠം

പരിസ്ഥിതിയെ സംരക്ഷിച്ചില്ലെങ്കിൽ വരാൻ പോകുന്നത് ഒരു വലിയ വിപത്താണെന്ന് ഉദാഹരണസഹിതം കാണിച്ചു തരികയാണ് കെനിയ. ഈ സംരക്ഷണം വരും തലമുറയ്ക്കുകൂടി അത്യാവശ്യമാണ്. കെനിയയിലെ ഈ പ്രതിസന്ധി ലോകത്തിന് കാണിച്ചു തരുന്ന ഒരു വലിയ പാഠമാണ്. അടുത്ത തവണ വരൾച്ച വരാതിരിക്കാൻ നാം ഇന്നുമുതലേ പ്രവർത്തിച്ചു തുടങ്ങണം. കെനിയയിലെ വറ്റി വരണ്ട ഒരോ പുഴയും കുളവും പുൽനാമ്പും വരെ മനുഷ്യന് കാണിച്ചു തരുന്ന ഒരു വലിയ ഉദാഹരണമാണ്. പരിസ്ഥിതിക്ക് വേണ്ടി എന്തെങ്കിലും ചെയ്യാൻ നമുക്ക് സാധിച്ചാൽ അത് നാളേക്കുള്ള ഏറ്റവും വലിയ അനുഗ്രഹമാകും.

English Summary : The situation in Kenya is a reminder to the world that if we do not protect the environment, we will face great disaster. It is imperative that we take action today to preserve nature for future generations.