90° ഉത്തരധ്രുവത്തിലെത്തിയ ആദ്യ മലയാളിയായി
കുസാറ്റ് പ്രൊഫ. ഡോ. എസ്. ബിജോയ് നന്ദൻ

ഉത്തരധ്രുവത്തിലെ അക്ഷാംശ രേഖ 90° യിൽ എത്തിയ ആദ്യ മലയാളിയായി ഡോ. എസ് ബിജോയ് നന്ദൻ. കൊച്ചി ശാസ്‌ത്ര സാങ്കേതിക സർവകലാശാല (കുസാറ്റ്) മറൈൻ സയൻസസ് ഫാക്കൽറ്റി ഡീനും സി.എസ്.ഐ.ആർ.-എമിരിറ്റസ് സയന്റിസ്റ്റുമാണ് (CSIR-Emeritus Scientist) അദ്ദേഹം.

ഭൂമിശാസ്ത്രപരമായ ഉത്തരധ്രുവത്തിലെ 90° വടക്കൻ അക്ഷാംശത്തിൽ (90° North) എത്തുന്ന ആദ്യ കേരളീയനെന്ന ചരിത്രനേട്ടമാണ് അദ്ദേഹം സ്വന്തമാക്കിയത്.

2026 ഓഗസ്റ്റ് 4 മുതൽ 13 വരെ നടന്ന ഏഴാമത് റോസാറ്റോം ഇന്റർനാഷണൽ ആർട്ടിക് എക്സ്പെഡിഷൻ (ROSATOM International Arctic Expedition) – ‘ഐസ്ബ്രേക്കർ ഓഫ് നോളജ്’ (Icebreaker of Knowledge) എന്ന അന്താരാഷ്ട്ര പര്യവേഷണത്തിന്റെ ഭാഗമായാണ് ഡോ. ബിജോയ് നന്ദൻ ഉത്തരധ്രുവത്തിലെത്തിയത്.

ഈ പര്യവേഷണത്തിലേക്ക് ഇന്റർനാഷണൽ എക്സ്പെർട്ടായി (International Expert – അന്താരാഷ്ട്ര വിദഗ്ധൻ) തിരഞ്ഞെടുക്കപ്പെട്ട ആദ്യ ഇന്ത്യക്കാരനും ഡോ. നന്ദനാണ്.

റഷ്യയിലെ മുർമാൻസ്കിൽ (Murmansk) നിന്ന് ആണവശക്തിയിൽ പ്രവർത്തിക്കുന്ന ‘50 ലെറ്റ് പോബെഡി’ (50 Let Pobedy – 50 Years of Victory) എന്ന ഐസ്ബ്രേക്കർ കപ്പലിലാണ് സംഘം ഭൂമിശാസ്ത്രപരമായ ഉത്തരധ്രുവത്തിലെത്തിയത്.

അന്താരാഷ്ട്ര വിദഗ്ധനെന്ന നിലയിൽ വിവിധ രാജ്യങ്ങളിൽ നിന്നുള്ള ശാസ്ത്രജ്ഞർ, ആർട്ടിക് ഗവേഷകർ, ശാസ്ത്ര ആശയവിനിമയ വിദഗ്ധർ , അധ്യാപകർ തുടങ്ങിയവരോടൊപ്പം ഡോ. നന്ദൻ പര്യവേഷണത്തിന്റെ ശാസ്ത്ര-വിദ്യാഭ്യാസ പരിപാടികളിൽ പങ്കെടുത്തു.

സമുദ്ര-ധ്രുവ ശാസ്ത്രം (Ocean and Polar Science), കാലാവസ്ഥാ വ്യതിയാനം, പരിസ്ഥിതി സുസ്ഥിരത, സമുദ്ര സംരക്ഷണം തുടങ്ങിയ വിഷയങ്ങളിൽ വിദ്യാർഥികളുമായും മറ്റ് പങ്കാളികളുമായും അദ്ദേഹം ആശയവിനിമയം നടത്തി.

ആർട്ടിക് ഗവേഷണരംഗത്ത് ദീർഘകാല പരിചയമുള്ള ശാസ്ത്രജ്ഞനാണ് ഡോ. നന്ദൻ. ഇന്ത്യൻ ആർട്ടിക് ഗവേഷണ പദ്ധതിയുടെ (Indian Arctic Research Programme) ഭാഗമായി 2015 മുതൽ 2021 വരെ നോർവേയിലെ സ്വാൽബാർഡിലുള്ള നൈ-ഓൾസൺ ഇന്റർനാഷണൽ ആർട്ടിക് റിസർച്ച് ബേസിൽ (Ny-Ålesund International Arctic Research Base) അദ്ദേഹം ഗവേഷണം നടത്തിയിട്ടുണ്ട്.

ആർട്ടിക് ഫ്യോർഡ് പരിസ്ഥിതിശാസ്ത്രം (Arctic Fjord Ecology), ബ്ലൂ കാർബൺ സാധ്യതകൾ (Blue Carbon Potential), ബെന്തിക് ജൈവവൈവിധ്യം (Benthic Biodiversity) തുടങ്ങിയ മേഖലകളിലാണ് അദ്ദേഹത്തിന്റെ പ്രധാന ഗവേഷണ സംഭാവനകൾ.