ബംഗാൾ ഉൾക്കടലിൽ രൂപം കൊണ്ട അതിശക്തമായ 'ഡിറ്റ് വ' ചുഴലിക്കാറ്റ് ശ്രീലങ്കയിൽ കനത്ത നാശനഷ്ടമാണ് ഉണ്ടാക്കിയത്. മരണസംഖ്യ 50 കടന്നു, 25 പേരെ ഇനിയും കണ്ടെത്താനായിട്ടില്ല. റെക്കോർഡ് മഴയും കിഴക്കൻ കാറ്റുമാണ് ശ്രീലങ്കയുടെ താളം തെറ്റിച്ചത്.

എല്ലാ പ്രധാന നദികളിലും ജലനിരപ്പ് ഉയർന്നിട്ടുണ്ട്. റോഡുകൾ തകർന്നു, പലയിടത്തും വൈദ്യുതി ബന്ധം പൂർണ്ണമായി വിച്ഛേദിക്കപ്പെട്ട സാഹചര്യമാണ്. ആയിരക്കണക്കിന് ആളുകൾക്ക് വീട് നഷ്ടമായി. നിരവധി ആളുകൾ ദുരിതാശ്വാസ ക്യാമ്പുകളിലേക്ക് മാറി.
ചുഴലിക്കാറ്റിനെ തുടർന്ന്ശ്രീലങ്കൻ സർക്കാർ ഇന്ന് എല്ലാ സർക്കാർ സ്ഥാപനങ്ങൾക്കും പൊതു അവധി പ്രഖ്യാപിച്ചു. ട്രെയിൻ സർവീസുകൾ പൂർണ്ണമായി നിർത്തിവെച്ചിരിക്കുകയാണ്.

വിമാനങ്ങൾ വഴിതിരിച്ചുവിടുന്നു

കൊളംബോ അന്താരാഷ്ട്ര വിമാനത്താവളത്തിൽ വിമാനങ്ങൾ ഇറക്കാൻ കഴിയാത്തതിനാൽ, തിരുവനന്തപുരത്തേക്കോ കൊച്ചിയിലേക്കോ തിരിച്ചുവിടുമെന്ന് അധികൃതർ അറിയിച്ചിട്ടുണ്ട്. സൈന്യവും പൊലിസും ചേർന്ന് റിലീഫ് പ്രവർത്തനങ്ങൾ ഊർജ്ജിതമാക്കി. ദേശീയോദ്യാനങ്ങൾ അടച്ചു സുരക്ഷ ഉറപ്പാക്കിയിട്ടുണ്ട്.

'ഡിറ്റ് വ' ചുഴലിക്കാറ്റ് ശക്തി പ്രാപിച്ച് ഇന്ത്യൻ തീരത്തേക്ക് അടുക്കുന്ന സാഹചര്യത്തിൽ തമിഴ്നാട്, ആന്ധ്രാപ്രദേശ്, പുതുച്ചേരി തീരങ്ങൾ അതീവ ജാഗ്രതയിലാണ്. കാലാവസ്ഥാ നിരീക്ഷണ വകുപ്പ് (IMD) ശക്തമായ കാറ്റിനു മഴയ്ക്കും സാഹചര്യം ഉണ്ടെന്ന് മുന്നറിയിപ്പ് നൽകി. തമിഴ്നാട്ടിലെ 4 ജില്ലകളിൽ റെഡ് അലർട്ടും 6 ജില്ലകളിൽ ഓറഞ്ച് അലർട്ടും പ്രഖ്യാപിച്ചിരിക്കുകയാണ്.

തീരദേശ മേഖലകളിൽ മത്സ്യത്തൊഴിലാളികൾ കടലിൽ പോകുന്നത് പൂർണ്ണമായും വിലക്കിയിട്ടുണ്ട് . ചെന്നൈയിലെ റെഡ് ഹിൽസ്, പൂണ്ടി, ചെമ്പരമ്പാക്കം ജലസംഭരണികളിൽ ജലനിരപ്പ് ഉയർന്നതിനെ തുടർന്ന് മുൻകരുതലെന്ന നിലയിൽ സെക്കൻഡിൽ 200 ഘനയടി വെള്ളം തുറന്നുവിടുന്നു. ഇത് തീരദേശത്ത് വെള്ളപ്പൊക്ക സാധ്യത വർദ്ധിക്കാൻ കാരണമായേക്കും .

തമിഴ്നാട് മുഖ്യമന്ത്രി എം.കെ. സ്റ്റാലിൻ ദുരന്തനിവാരണ അതോറിറ്റി ആസ്ഥാനത്തെത്തി സ്ഥിതിഗതികൾ വിലയിരുത്തിയിരുന്നു. തീരദേശവാസികളെ സുരക്ഷിതമായി മാറ്റിപ്പാർപ്പിക്കാൻ നിർദേശം നൽകിയിട്ടുണ്ട്.'ഡിറ്റ് വ' അടുത്ത 24 മണിക്കൂറിനുള്ളിൽ കൂടുതൽ ശക്തി പ്രാപിച്ച് ഇന്ത്യൻ തീരത്തേക്ക് എത്തുമെന്നാണ് IMD മുന്നറിയിപ്പ്. ദുരന്തസാഹചര്യം നേരിടാൻ സംസ്ഥാന സർക്കാരുകൾ ചേർന്ന് പ്രതിരോധ പ്രവർത്തനങ്ങൾ ശക്തമാക്കി.

Metbeat news