"Different Abilities, One Earth": കോഴിക്കോട് ബീച്ചിൽ പരിസ്ഥിതി ദിനാചരണം മാതൃകയായി

കോഴിക്കോട്: ലോക പരിസ്ഥിതി ദിനത്തോടനുബന്ധിച്ച് "Different Abilities, One Earth" എന്ന സന്ദേശമുയർത്തി കോഴിക്കോട് ബീച്ചിൽ സംഘടിപ്പിച്ച ശുചീകരണ ക്യാമ്പയിൻ ശ്രദ്ധേയമായി. ഹെൽത്ത് കെയർ ഫൗണ്ടേഷന്റെ ആഭിമുഖ്യത്തിൽ യു.കെ ഫിൻവേഴ്സിന്റെ സ്പോൺസർഷിപ്പിലും ഫെബിനോറ ഇവെന്റ്സിന്റെ സഹകരണത്തിലും നടന്ന പരിപാടിയിൽ ഭിന്നശേഷി വിദ്യാർത്ഥികളും സാമൂഹിക പ്രവർത്തകരും പൊതുജനങ്ങളും ഒന്നിച്ച് അണിനിരന്നു.

വെള്ളിയാഴ്ച രാവിലെ 11 മണിക്ക് ഫ്രീഡം സ്ക്വയറിൽ നടന്ന ചടങ്ങ് കോഴിക്കോട് പ്രസ് ക്ലബ് പ്രസിഡന്റ് ഇ.പി മുഹമ്മദ് ഉദ്ഘാടനം ചെയ്തു. കമ്മ്യൂണിറ്റി സൈക്യാട്രിക് ക്ലിനിക് ചെയർമാൻ എ. മുഹമ്മദ് സാലിഹ് അധ്യക്ഷത വഹിച്ചു. ഹെൽത്ത് കെയർ ഫൗണ്ടേഷൻ സി.ഒ.ഒ മുഹമ്മദ് നവാസ് ഐ.പി സ്വാഗതം പറഞ്ഞു.

ബീച്ച് ശുചീകരണത്തിന് തുടക്കം കുറിച്ച് സാഫി കോളേജ് വിദ്യാർത്ഥിനി ലുബ്ന പരിസ്ഥിതി സംരക്ഷണ പ്രതിജ്ഞ ചൊല്ലിക്കൊടുത്തു. കാരുണ്യതീരം സ്പെഷ്യൽ സ്കൂൾ, സാഫി കോളേജ്, പ്രൊവിഡൻസ് വിമൻസ് കോളേജ് എന്നിവിടങ്ങളിലെ സോഷ്യൽ വർക്ക് വിദ്യാർത്ഥികൾ, അധ്യാപകർ, സന്നദ്ധപ്രവർത്തകർ ഉൾപ്പെടെ ഇരുന്നൂറോളം പേർ ഒരു മണിക്കൂർ നീണ്ട ശുചീകരണ യജ്ഞത്തിൽ പങ്കാളികളായി.

ശേഖരിച്ച മാലിന്യം ഉപയോഗിച്ച് 'Best from Waste' എന്ന ആശയത്തിൽ തീരത്ത് താൽക്കാലിക കലാസൃഷ്ടികളും ഒരുക്കി. "പ്ലാസ്റ്റിക് കുപ്പി 450 വർഷം മാലിന്യമാകാം, അല്ലെങ്കിൽ 10 മിനിറ്റിൽ ഒരു ചെടിച്ചട്ടിയാകാം. തിരഞ്ഞെടുപ്പ് നമ്മുടേതാണ്" എന്ന സന്ദേശം കലാസൃഷ്ടികൾക്കൊപ്പം പങ്കുവെച്ചു.

പൊതുജനങ്ങളിൽ ബോധവൽക്കരണം നടത്തുന്നതിന്റെ ഭാഗമായി "Bring your own bag" ക്യാമ്പയിൻ സംഘടിപ്പിച്ചു. ഒരു തുണിസഞ്ചിയുടെ ഉപയോഗം ഒരു വർഷം 500 പ്ലാസ്റ്റിക് കവറുകൾ ഒഴിവാക്കുമെന്ന സന്ദേശം വോളന്റിയർമാർ വിശദീകരിച്ചു.

വിശിഷ്ടാതിഥി സന്നാഫ് പാലക്കണ്ടി, ഹെൽത്ത് കെയർ ഫൗണ്ടേഷൻ എക്സിക്യൂട്ടീവ് മെമ്പർ അഡ്വ. ടി.പി.എ നസീർ, കാരുണ്യതീരം പ്രിൻസിപ്പാൾ ലുംതാസ് സി.കെ, പ്രതീക്ഷഭവൻ സൂപ്രണ്ട് പാർവതി ഭായ്, വൊക്കേഷണൽ റീഹാബിലിറ്റേഷൻ HOD നിത്യ, വ്യവസായി റിബു സി.കെ എന്നിവർ ആശംസകൾ അർപ്പിച്ചു.

"കഴിവുകൾ പലതാണ്, പക്ഷേ ഭൂമി ഒന്നേയുള്ളൂ. അതിനെ സംരക്ഷിക്കേണ്ട ഉത്തരവാദിത്തവും നമുക്ക് ഒന്നാണ് എന്ന് ഈ കൂട്ടായ്മ തെളിയിച്ചു," ഉദ്ഘാടന പ്രസംഗത്തിൽ ഇ.പി മുഹമ്മദ് പറഞ്ഞു.

പരിപാടിയുടെ ഭാഗമായി ശേഖരിച്ച പ്ലാസ്റ്റിക് മാലിന്യം ശാസ്ത്രീയമായി സംസ്കരിക്കുന്നതിനായി കോർപ്പറേഷന് കൈമാറി. ഹെൽത്ത് കെയർ ഫൗണ്ടേഷൻ ആർ.എം.ഒ ഫർസിൻ അഹ്മദ് നന്ദി പറഞ്ഞു.