ഗ്രീൻ കെയർ മിഷൻ 'പ്രതിഭാ പുരസ്കാരം' ദേവസ്യ ദേവഗിരിക്ക്

പരിസ്ഥിതി സംരക്ഷണത്തോടൊപ്പം കാർഷിക-സാംസ്കാരിക മേഖലകളിൽ കഴിഞ്ഞ 14 വർഷമായി പ്രവർത്തിച്ചു വരുന്ന സന്നദ്ധ സംഘടനയായ ഗ്രീൻ കെയർ മിഷൻ, മലബാർ കാർണിവൽ 2026-ന്റെ ഭാഗമായി നൽകുന്ന അഞ്ചാമത് 'ഗ്രീൻ കെയർ മിഷൻ പ്രതിഭാ പുരസ്കാരം 2026' പ്രശസ്ത ചിത്രകാരനും അധ്യാപകനുമായ ദേവസ്യ ദേവഗിരിക്ക് സമ്മാനിക്കും. രണ്ട് വർഷത്തിലൊരിക്കൽ സമൂഹത്തിന് നിസ്വാർത്ഥ സേവനം കാഴ്ചവെക്കുന്ന മികച്ച കലാകാരന്മാർക്കും സാമൂഹിക പ്രവർത്തകർക്കുമായി നൽകിവരുന്നതാണ് ഈ അവാർഡ്.

തന്റെ വീടിന്റെ ഒരു നില മുഴുവൻ ചിത്രങ്ങളും ശില്പങ്ങളും കൊണ്ട് സമൃദ്ധമാക്കി മാറ്റിയ ദേവസ്യ ദേവഗിരി, ഈ ഗാലറി കുട്ടികൾക്കും കലാസ്നേഹികൾക്കുമായി സൗജന്യമായാണ് തുറന്നുകൊടുത്തിരിക്കുന്നത്. പുതിയ തലമുറയിലേക്ക് ഗാന്ധിയൻ ദർശനങ്ങളും സർഗ്ഗാത്മകതയും പകർന്നു നൽകുന്ന അദ്ദേഹത്തിന്റെ ഈ മാതൃകാപരമായ പ്രവർത്തനവും കലാസേവനവുമാണ് അവാർഡിനായി തെരഞ്ഞെടുക്കാൻ ജൂറി കമ്മിറ്റിയെ പ്രേരിപ്പിച്ചത്. പ്രമുഖ പരിസ്ഥിതി ശാസ്ത്രജ്ഞൻ ഡോക്ടർ മാധവൻ കോമത്ത്, ബിൽഡേഴ്സ് അസോസിയേഷൻ ഓഫ് ഇന്ത്യ സ്റ്റേറ്റ് ചെയർമാൻ കെ സതീഷ് കുമാർ, ജിഎം ഐ പ്രസിഡണ്ട് സുബൈർ കൊളക്കാടൻ എന്നിവരടങ്ങിയതാണ് ജൂറി.

മാസ്റ്റർപീസ് കലാസൃഷ്ടി

മഹാത്മാഗാന്ധിയുടെ ജീവിതം ഒറ്റ സ്കെച്ചിൽ ആവിഷ്കരിച്ചതാണ് അദ്ദേഹത്തിന്റെ മാസ്റ്റർപീസ് കലാസൃഷ്ടി. കലയിലൂടെ ഗാന്ധിയൻ ആശയങ്ങളും ചിന്തകളും പുതിയ തലമുറയിലേക്ക് എത്തിക്കുക എന്നതും അദ്ദേഹത്തിന്റെ പ്രധാന ലക്ഷ്യങ്ങളിലൊന്നാണ്.
10010 രൂപയും പ്രമുഖ കലാകാരൻ ചോല രൂപകൽപ്പന ചെയ്ത ശില്പവും അടങ്ങുന്ന പുരസ്കാരം ഒക്ടോബർ 31 ശനിയാഴ്ച, കോഴിക്കോട് ബീച്ചിലെ മലബാർ കർണ്ണിവൽ വേദിയിൽ വെച്ച് നടക്കുന്ന ചടങ്ങിൽ ബഹുമാനപ്പെട്ട മന്ത്രി ടി. സിദ്ദിഖ് കൈമാറും.

ചടങ്ങിൽ എം എ റസാഖ് മാസ്റ്റർ എം എൽ എ, മലബാർ ഗ്രൂപ്പ് ചെയർമാൻ എപി അഹമ്മദ് തുടങ്ങിയ പ്രമുഖ വ്യക്തിത്വങ്ങളുടെയും സാന്നിധ്യമുണ്ടാകും. സാംസ്കാരിക മുന്നേറ്റത്തോടൊപ്പം പരിസ്ഥിതി ബോധവൽക്കരണം ശക്തിപ്പെടുത്തുക എന്ന സന്ദേശവുമായാണ് ഗ്രീൻ കെയർ മിഷൻ ഈ അവാർഡ് സംഘടിപ്പിക്കുന്നത്.

English Summary : Renowned artist and educator Devasya Devagiri has been selected for the 5th Green Care Mission Prathibha Puraskaram 2026, presented as part of the Malabar Carnival.