ന്യൂനമർദ്ദം തീവ്ര ന്യൂനമർദ്ദം ആകും; മഴ കനക്കും, ഇന്നും നാളെയും ഓറഞ്ച് അലർട്ട്

ബംഗാൾ ഉൾക്കടലിലെ ന്യൂനമർദത്തെയും ഫിലിപ്പൈൻസിന് സമീപമുള്ള ബൗലേയ് ചുഴലിക്കാറ്റിനെയും (Typhoon Bualoy) തുടർന്ന് തെക്കൻ കേരളത്തിൽ ശക്തമായ മഴ തുടരുന്നു. തിരുവനന്തപുരം ജില്ലയുടെ കിഴക്കൻ മേഖലകളിൽ ജാഗ്രത നിർദേശം നൽകി.

ബംഗാൾ ഉൾക്കടലിലെ ന്യൂനമർദ്ദം വീണ്ടും ശക്തിപ്പെട്ടു തീവ്ര ന്യൂനമർദ്ദം ( Depression) ആകാനാണ് സാധ്യത. ഇന്ന് തിരുവനന്തപുരത്ത് തീവ്രമഴ റിപ്പോർട്ട് ചെയ്തു. കൃഷ്ണപുരത്ത് 24 മണിക്കൂറിൽ 21 സെ.മി മഴ രേഖപ്പെടുത്തി. പൊന്മുടിയിലും ചെമ്പൻകോട്ടിലും 18 സെ.മി മഴ രേഖപ്പെടുത്തി.

തിരുവനന്തപുരത്ത് വിദ്യാഭ്യാസ സ്ഥാപനങ്ങൾക്ക് അവധി

ഇന്നലെ മുതൽ കനത്ത മഴ തുടരുകയാണ് തിരുവനന്തപുരം, കൊല്ലം ജില്ലകളിൽ. തിരുവനന്തപുരത്ത് ഇന്നലെ രാത്രി തുടങ്ങിയ മഴ ഇന്ന് രാവിലെയും തുടർന്നു. ഇതേ തുടർന്ന് രാവിലെ പ്രൊഫഷണൽ കോളേജുകൾ ഉൾപ്പെടെയുള്ള വിദ്യാഭ്യാസ സ്ഥാപനങ്ങൾക്ക് ജില്ലാ കലക്ടർ അവധി നൽകി.

മഴക്കെടുതിയിൽ വലഞ്ഞ് തലസ്ഥാനം : വിവിധ പ്രദേശങ്ങളിൽ വെള്ളക്കെട്ട് രൂക്ഷമായി തുടരുന്നു
The capital is reeling under heavy rains: Waterlogging continues in various areas
https://metbeatnews.com/the-capital-is-reeling-under-heavy-rains

അരുവിക്കര ഡാം തുറന്നു

തിരുവനന്തപുരത്ത് കനത്ത മഴയെ തുടർന്ന് അരുവിക്കര ഡാമിന്റെ ഷട്ടറുകൾ 5 ഷട്ടറുകൾ ഒരു മീറ്റർ വീതം ഉയർത്തി. പൊൻ‌മുടിയിൽ ഇനി ഒരു അറിയിപ്പ് ഉണ്ടാകുന്നത് വരെ യാത്രാ വിലക്ക് പ്രഖ്യാപിച്ചിട്ടുണ്ട്.

തിരുവനന്തപുരത്തിന്റെ മലയോര മേഖലയിൽ ജാഗ്രത തുടരേണ്ട സാഹചര്യമാണ്. നഗരത്തിലെ താഴ്ന്ന പ്രദേശങ്ങളിൽ വെള്ളക്കെട്ട് രൂപപ്പെട്ടു.

ഇടുക്കിയിൽ ഏലത്തോട്ടം ഒലിച്ചുപോയി

കൊല്ലം ജില്ലയിലും ശക്തമായ മഴ തുടരുന്നുണ്ട്. ഇടുക്കി ജില്ലയിൽ കനത്ത മഴയിൽ മണ്ണിടിച്ചിൽ ഉണ്ടായി ഒരു ഏക്കറോളം കൃഷിഭൂമി ഒലിച്ചുപോയി. കുറ്റിയാനി സണ്ണിയുടെ ഒരേക്കർ ഭൂമിയാണ് ഒലിച്ചു പോയത്. ഏലത്തോട്ടം ഉൾപ്പെടെയാണ് ഒലിച്ചു പോയത്.

നാലു ജില്ലകളിൽ ഓറഞ്ച് അലർട്ട്

ഇന്ന് ഉച്ചക്കുള്ള കേന്ദ്ര കാലാവസ്ഥാ വകുപ്പിന്റെ പ്രവചന പ്രകാരം നാലു ജില്ലകളിൽ ഓറഞ്ച് അലർട്ട് നൽകി. തിരുവനന്തപുരം, പത്തനംതിട്ട, കോട്ടയം, ഇടുക്കി ജില്ലകളിലാണ് ഓറഞ്ച് അലർ ഉള്ളത്. പാലക്കാട്, തൃശൂർ, എറണാകുളം, ആലപ്പുഴ കൊല്ലം ജില്ലകളിൽ മഞ്ഞ അലർട്ട് ആണ് കാലാവസ്ഥ വകുപ്പ് ഇന്ന് നൽകിയത്.

തീവ്ര ന്യൂനമർദ്ദം ആകും

ബംഗാൾ ഉൾകടലിൽ രൂപപ്പെട്ട ന്യുനമർദ്ദം ( Low pressure area - LPA) ശക്തി കൂടിയ ന്യൂന മർദ്ദമായി ( Well Marked Low Pressure (WML) മാറി. നാളെയോടെ ആന്ധ്രാ - ഒഡിഷ തീരത്തിനു സമീപം തീവ്ര ന്യൂന മർദ്ദമായി (Depression ) വീണ്ടും ശക്തി പ്രാപിച്ചു ശനിയാഴ്ച രാവിലെയോടെ ആന്ധ്രാ പ്രദേശ് - ഒഡിഷ തീരത്ത് കരയിൽ പ്രവേശിക്കാൻ സാധ്യതയുണ്ട്.

വരുംദിവസങ്ങളിൽ വടക്കൻ കേരളത്തിലും മഴ

ന്യൂനമർദ്ദം ശക്തിപ്പെട്ടതിനെ തുടർന്ന് കേരളത്തിൽ മധ്യ തെക്കൻ കേരളത്തിൽ ഇന്നും ഇടവിട്ടുള്ള ശക്തമായ മഴ തുടരും. തീവ്ര ന്യൂനമർദ്ദം ( Depression ) കരയോട് അടുക്കുന്നതിനനുസരിച്ചു മഴ അടുത്ത ദിവസങ്ങളിൽ മധ്യ കേരളം മുതൽ വടക്കൻ കേരള ത്തിലേക്ക് വ്യാപിക്കും.

വടക്കൻ ജില്ലകളിൽ നാളെ ഓറഞ്ച് അലർട്ട്

വടക്കൻ കേരളത്തിൽ കേന്ദ്ര കാലാവസ്ഥ വകുപ്പ് നാളെ (ശനി) ഓറഞ്ച് അലർട്ട് പ്രഖ്യാപിച്ചു. കോഴിക്കോട്, വയനാട്, കണ്ണൂർ, കാസർകോട് ജില്ലകളിലാണ് ഓറഞ്ച് അലർട്ട്. എറണാകുളം, തൃശ്ശൂർ, പാലക്കാട്, മലപ്പുറം ജില്ലകളിൽ നാളെ മഞ്ഞ അലർട്ട് ആണ്.

തിരുവനന്തപുരത്ത് വിമാന ലാൻഡിങ് വൈകി

കനത്ത മഴയിൽ റൺവേ കാണാനാകാത്തതിനെ തുടർന്ന് തിരുവനന്തപുരം അന്താരാഷ്ട്ര വിമാനത്താവളത്തിൽ ഇറങ്ങേണ്ട വിമാനത്തിന്റെെ ലാൻഡിങ് വൈകി. കുവൈത്ത് എയർവേയ്സിൻ്റെ വിമാനത്തിനാണ് ഇറങ്ങാൻ വൈകിയത്.

ഇന്നു രാവിലെ 5.45 ന് തിരുവനന്തപുരം അന്താരാഷ്ട്ര വിമാനത്താവളത്തിൽ ഇറങ്ങേണ്ടിയിരുന്ന വിമാനത്തിൻ്റെ പൈലറ്റിന് കനത്ത മഴയെ തുടർന്ന് ദൃശ്യപരത (Visibility ) കുറഞ്ഞതിനാൽ റൺവെ കാണാനായില്ല. ഇതിനു പിന്നാലെ ഏറെനേരം വട്ടമിട്ട് പറന്ന് ഒരു മണിക്കൂറോളം വൈകിയാണ് വിമാനം ലാൻഡ്‌ ചെയ്തത്.

ഇന്ന് പുലർച്ചെ 5.45-ന് എത്തിയ വിമാനം ഇറങ്ങാൻ ശ്രമിച്ചുവെങ്കിലും കനത്തമഴ കാരണം റൺവേ കാണാനായില്ല. തുടർന്ന് എയർ ട്രാഫിക് കൺട്രോളിന്റെ നിർദേശത്തെ തുടർന്ന് വിമാനം വട്ടമിട്ടുപറന്നു. ഇതിനുശേഷമാണ് ലാൻഡ് ചെയ്തത്.

English Summary : severe depression is set to bring heavy rains today and tomorrow. Stay alert with the orange warning in place for your safety.