വായു മലിനീകരണം; വാഹന നിയന്ത്രണം ശക്തമാക്കി ഡൽഹി; ആദ്യദിനം 68.4 ലക്ഷം രൂപ പിഴ

ഡൽഹിയിൽ വായുമലിനീകരണം നിയന്ത്രിക്കുന്നതിന്റെ ഭാഗമായി ശക്തമായ പരിശോധനയിലാണ് പോലീസ്. നിയന്ത്രണത്തിന്റെ ആദ്യദിനം 15,000ത്തിലധികം വാഹനങ്ങളാണ് അധികൃതർ പരിശോധിച്ചത്. വാഹന നിയന്ത്രണങ്ങൾ ലംഘിച്ചവർക്ക് ആദ്യദിനം തന്നെ ചുമത്തിയത് 68.4 ലക്ഷം രൂപയുടെ പിഴയാണ്. ഇന്നലെ നടന്ന പരിശോധനയിൽ പിഴയായും പാരിസ്ഥിതിക നഷ്ടപരിഹാരമായും ഉൾപ്പെടെയാണ് ഇത്രയും തുക ഈടാക്കിയത്.

1,539 വാഹനങ്ങൾ തിരിച്ചയച്ചു

ഡൽഹി അതിർത്തികളിൽ ബി.എസ്-6 മലിനീകരണ നിയന്ത്രണ മാനദണ്ഡങ്ങൾ പാലിക്കാത്ത 1,539 വാഹനങ്ങളെ തിരിച്ചയച്ചു. മലിനീകരണ നിയന്ത്രണ സർട്ടിഫിക്കറ്റ് ഇല്ലാത്ത 566 വാഹനങ്ങൾക്കും പിഴ ചുമത്തി. പുക മലിനീകരണ മാനദണ്ഡങ്ങൾ ലംഘിച്ചതിന് 56.6 ലക്ഷം രൂപയും പ്രവേശന നിയന്ത്രണം ലംഘിച്ചതിന് രണ്ട് ലക്ഷം രൂപയും പാരിസ്ഥിതിക നഷ്ടപരിഹാരമായി 9.8 ലക്ഷം രൂപയുമാണ് ഈടാക്കിയത്.

Air Pollution Kochi : കൊച്ചിയെ മൂടി പുകമഞ്ഞ്; AQI 240 വരെ ഉയർന്നു, അടിയന്തര ഇടപെടലിന് മുഖ്യമന്ത്രിയുടെ ഉറപ്പ്
കൊച്ചി നഗരത്തെ ദിവസവും രാവിലെ മൂടുന്ന പുകമഞ്ഞും ഉയരുന്ന വായുമലിനീകരണ തോതും ആശങ്കയാകുന്നു.
https://metbeatnews.com/aqi-hits-240-as-kerala-cm-assures-urgent-action

ഡൽഹി പൊലീസും ഗതാഗത വകുപ്പും സംയുക്തമായി 14,930 വാഹനങ്ങളാണ് പരിശോധിച്ചത്. ഇതിൽ 10.31 ശതമാനം വാഹനങ്ങളെ അതിർത്തിയിൽ നിന്ന് തിരിച്ചയച്ചു. നിയന്ത്രണങ്ങൾ ലംഘിച്ച 62 വാഹനങ്ങൾ ട്രാഫിക് പൊലീസ് പിടിച്ചെടുക്കുകയും ചെയ്തു.

ശീതകാല മലിനീകരണ നിയന്ത്രണ പദ്ധതി

ബി.എസ്-6 നിലവാരത്തിന് താഴെയുള്ള വാഹനങ്ങൾക്ക് ഡൽഹിയിൽ പ്രവേശിക്കുന്നതിനാണ് വിലക്കേർപ്പെടുത്തിയിരിക്കുന്നത്. ശീതകാല മലിനീകരണ നിയന്ത്രണ പദ്ധതിയുടെ ഭാഗമായാണ് നടപടി. അതേസമയം, സി.എൻ.ജി, ഇലക്ട്രിക് വാഹനങ്ങൾക്കും അവശ്യ സർവീസുകൾക്കായി ഉപയോഗിക്കുന്ന വാഹനങ്ങൾക്കും ഇളവുണ്ട്.

മലിനീകരണ നിയന്ത്രണ മാനദണ്ഡങ്ങൾ ഉറപ്പാക്കണം

മലിനീകരണ നിയന്ത്രണ സർട്ടിഫിക്കറ്റ് ഇല്ലാത്ത വാഹനങ്ങൾക്ക് ഇന്ധനം നൽകരുതെന്നും സർക്കാർ പെട്രോൾ പമ്പ് ഉടമകൾക്ക് നിർദേശം നൽകിയിട്ടുണ്ട്. അയൽസംസ്ഥാനങ്ങളിൽ നിന്ന് ഡൽഹിയിലേക്ക് എത്തുന്നവർ വാഹനങ്ങളുടെ മലിനീകരണ നിയന്ത്രണ മാനദണ്ഡങ്ങൾ ഉറപ്പാക്കണമെന്ന് മുഖ്യമന്ത്രി രേഖ ഗുപ്തയും മുന്നറിയിപ്പ് നൽകി. നിർദേശങ്ങൾ ലംഘിക്കുന്നവർക്ക് കനത്ത പിഴ ചുമത്തുന്നതിനൊപ്പം വാഹനങ്ങൾ അതിർത്തിയിൽ നിന്ന് തിരിച്ചയക്കുമെന്നും മുഖ്യമന്ത്രി വ്യക്തമാക്കി.

English Summary : In response to worsening air quality levels, the Delhi Government, alongside the Delhi Traffic Police and the Transport Department, has initiated strict vehicular crackdowns across the capital city.