ആഴക്കടൽ ഖനനം സമുദ്രത്തിനു ഭീഷണി, കടൽ ജീവികളുടെ എണ്ണത്തിൽ വൻ നഷ്ട്ടമുണ്ടാക്കുമെന്ന് പഠനം

ആഴക്കടൽ ധാതുഖനനം അടിത്തട്ടിലുള്ള ജീവജാലങ്ങളെ അപകടത്തിലാക്കുമെന്ന് കണ്ടെത്തി ശാസ്ത്രജ്ഞർ. ലണ്ടനിലെ നാച്ചുറൽ ഹിസ്റ്ററി മ്യൂസിയം, യുകെ നാഷണൽ ഓഷനാഗ്രഫി സെന്റർ, ഗോഥൻബർഗ് സർവകലാശാല എന്നിവചേർന്ന് പസഫിക് സമുദ്രത്തിലാണ് പഠനം നടത്തിയത്. വാഹനത്തിന്റെ സഞ്ചാരപാതയിലെ ജീവികളുടെ എണ്ണം വാഹനസ്പർശമേൽക്കാത്ത പ്രദേശങ്ങളിലേതിനെക്കാൾ 37 ശതമാനം കുറഞ്ഞെന്നാണ് ശാസ്ത്രജ്ഞർ കണ്ടെത്തിയിരിക്കുന്നത്. ആഴക്കടൽ ഖനനത്തിന്റെ ആഘാതംസംബന്ധിച്ച് ഇത്രവലിയ പഠനം നടക്കുന്നത് ഇതാദ്യമാണ്.

ഒരു രാജ്യത്തിന്റെയുമല്ലാത്ത സമുദ്രത്തിലെ ഖനനത്തിന് അനുമതിയില്ല

പസഫിക് സമുദ്രത്തിന്റെ അടിത്തട്ടിലെ ആഴത്തിൽ‌ നാലായിരത്തിലേറെ ജീവികളെയാണ് കണ്ടെത്തിയിട്ടുള്ളത്. ഇതിൽ 90 ശതമാനം പുതിയ ജീവിവർഗങ്ങളാണ്.
കാലാവസ്ഥാവ്യതിയാനം നേരിടുന്നതിനുള്ള കാർബൺരഹിത സാങ്കേതികവിദ്യകൾക്ക് അവശ്യംവേണ്ട നിർണായക ധാതുക്കളുടെ വൻശേഖരം പലസമുദ്രങ്ങളുടെയും അടിത്തട്ടിലുണ്ട്. എന്നാൽ എന്നാൽ, ഒരു രാജ്യത്തിന്റെയുമല്ലാത്ത സമുദ്രത്തിലെ ഖനനത്തിന് നിലവിൽ അനുമതിയില്ല എന്നതാണ് സത്യം. സമുദ്രാന്തർഭാഗത്തെ ധാതുസാന്നിധ്യം കണ്ടെത്താൻ 31 ലൈസൻസുകൾ നൽകിയിട്ടുണ്ടെങ്കിലും വാണിജ്യാടിസ്ഥാനത്തിലുള്ള ഖനനത്തിന് ഐഎസ്എ അനുമതി നൽകിയിട്ടില്ല. ഖനനത്തിൻ്റെ പാരിസ്ഥിതികാഘാതമെന്തെന്ന് പൂർണമായി മനസ്സിലാക്കുംവരെ അതു നിരോധിക്കണമെന്ന് ബ്രിട്ടനും ഫ്രാൻസും ഉൾപ്പെടെ 37 രാജ്യങ്ങളാണ് ആവശ്യപ്പെട്ടത്.
അതേസമയം പാരിസ്ഥിതിക ആഘാതങ്ങളെക്കുറിച്ച് കൂടുതൽ മനസ്സിലാക്കിയശേഷമേ ഇവിടെ ഖനനമുണ്ടാകൂ. ഈ പശ്ചാത്തലത്തിലാണ് കാനഡയിലെ ആഴക്കടൽ ഖനന കമ്പനിയായ ‘ദ് മെറ്റൽസ് കമ്പനി’യുടെ ആവശ്യപ്രകാരം ശാസ്ത്രജ്ഞർ പാരിസ്ഥിതികാഘാതത്തെക്കുറിച്ച് പഠനം നടത്തിയത്.

ഇതിനായി പസഫിക് സമുദ്രത്തിലെ ക്ലാരിയൻ-ക്ലിപ്പർടൺ മേഖലയിൽ സമുദ്രാടിത്തട്ടിൽ 80 കിലോമീറ്റർഭാഗത്ത് പരീക്ഷണഖനനം നടത്തുകയായിരുന്നു. തുടർന്ന് ഖനനം നടന്ന് രണ്ടുമാസത്തിനുശേഷമാണ് ശാസ്ത്രജ്ഞർ ഇവിടത്തെ ജീവസാന്നിധ്യം പരിശോധിച്ചത്. രണ്ടുവർഷംമുൻപ്‌ ഇവിടെയുണ്ടായിരുന്ന ജൈവവൈവിധ്യവുമായി അതിനെ താരതമ്യംചെയ്തു. അപ്പോഴാണ് ഖനനയന്ത്രം കടന്നുപോയ പാതയിലെ ജീവികളുടെ എണ്ണത്തിൽ 37 ശതമാനം കുറവുണ്ടായെന്ന സത്യം ശാസ്‌ത്രജ്ഞർ കണ്ടെത്തിയത്. കടൽ ജീവികളുടെ വൈവിധ്യത്തിൽ 32 ശതമാനം കുറവും സംഭവിച്ചു. 0.33 മില്ലിമീറ്ററിനും രണ്ടു സെന്റീമീറ്ററിനും ഇടയിൽ വലുപ്പമുള്ള ജീവികളായ വിരകൾ, കടൽച്ചിലന്തികൾ, ഒച്ചുകൾ, കക്കകൾ എന്നിവയുടെ സാന്നിധ്യത്തിലെ വ്യത്യാസമാണ് പ്രത്യേകമായി ശ്രദ്ധിച്ചത്.

ചെറുജീവികൾ വസിക്കുന്നത് എക്കൽപ്പാളിയിൽ

ഖനനത്തിനു വേണ്ടി സമുദ്രാടിത്തട്ടിലെ എക്കൽപ്പാളി അഞ്ചുസെന്റീമീറ്റർ കനത്തിൽ യന്ത്രമുപയോഗിച്ചു കൊണ്ട് ശാസ്‌ത്രജ്ഞർ നീക്കി. കാരണം ഈ എക്കൽപ്പാളിയിലാണ് ഭൂരിഭാഗം ചെറുജീവികളും വസിക്കുന്നത്. ഇതു മാറ്റുന്നതോടെ ആ ജീവികളെക്കൂടിയാണ് മാറ്റുന്നതെന്ന് ശാസ്‌ത്രജ്ഞർ പറഞ്ഞു. യന്ത്രം ഇവയെ കൊന്നില്ലെങ്കിലും ഖനനത്തിന്റെ ഫലമായുണ്ടാകുന്ന മലിനീകരണം സാവധാനം ഇവയെ ഇല്ലാതാക്കുമെന്നും അവർ ചൂണ്ടികാട്ടി. വലിയ പ്രദേശത്ത് ഖനനം നടക്കുമ്പോൾ ആഘാതവും വലുതായിരിക്കുമെന്നാണ് ശാസ്ത്രജ്ഞരുടെ വിലയിരുത്തൽ

ആഴക്കടൽ ഖനനം എന്തിനു വേണ്ടി ?

കാലാവസ്ഥാവ്യതിയാനം നേരിടുന്നതിനുള്ള മാർഗങ്ങളായ സോളാർ പാനലുകൾ കാറ്റാടിയന്ത്രങ്ങൾ, വൈദ്യുതവാഹനങ്ങൾ തുടങ്ങിയവയുടെ നിർമാണത്തിന് ലിഥിയം, നിക്കൽ, കൊബാൾട്ട് തുടങ്ങിയ നിർണായക ധാതുക്കൾ വേണം. ഇത് ആഴകടൽ ഖനനത്തിലൂടെ സാധ്യമാകുന്ന കാര്യങ്ങളാണ്. അതേസമയം പടക്കോപ്പുകളുടെ നിർമാണത്തിനാവശ്യമായ അപൂർവമൂലകങ്ങളുടെയും നിർണായകധാതുക്കളുടെയും ഖനനം വേഗത്തിലാക്കാനുള്ള നടപടികളിലാണ് യുഎസ്. ഇതേ പാതയിലാണ് ചൈനയും.

English Summary : Scientists have removed a 5 cm layer from the seabed for mining, impacting vital habitats for small marine life. Discover the potential ecological consequences.